Formannskapet bad i førre møte om eit nytt budsjettframlegg frå administrasjonen der det vert lagt opp til ei styrking av eldreomsorga på minimum ein million kroner.

I den samanheng har etatsjefane utarbeidd framlegg til innsparingar i sin etat. Desse vart drøfta då formannskapet heldt fram med budsjettdrøftingane tysdag. Sentralt i drøftingane stod framlegga til oppvekstsjefen.

Kan spara 450.000

Flytting av 5. og 6. klasse frå Onarheim til Tysnes skule er eit av alternativa oppvekstsjef Helge F. Kjellevold peikar på.

Onarheim skule vil i så fall sitja att med 10 elevar og vert dermed udelt. Dette kan gje innsparingar på om lag 450.000 kroner årleg. Effekten for 2010 vert om lag 225.000.

Rådmann Audun Hovland kommenterte i formannskapet at oppvekstsjefen peikar på ein del av livets realitetar og at han føl oppvekstsjefen i ein del av argumentasjonen.

– Det er grunn til å sjå på dette. Me står føre store investeringar på Onarheim skule. Viss ein går for å flytta 5. og 6. klasse, kan ein sleppa millioninvesteringar på skulen. Difor er det viktig å vera i forkant, og det hastar med ei avgjersle. Planlegginga av utbetringane skal etter planen starta i desse dagar, sa Hovland.

Kortsiktig grep

Ordførar Helge Hauge vedgjekk at det kan vera «ein besnærande tanke» å flytta 5. og 6. klasse frå Onarheim skule til Tysnes skule.

– Det er vanskeleg å investera så store beløp i skulen på Onarheim når me har dei elevtala me har. Samstundes trur eg det vil vera kortsiktig å flytta elevane i høve til den utviklinga eg ventar at vil koma på Onarheim, sa Hauge.

Han la til at det bør vera ein tankekross at pengane som trengst til skule går såpass mykje opp samstundes som elevtalet i kommunen går ned.

– Kommunen brukar mykje pengar per elev, og lite per person til eldre. Me bør gjera oss ein del generelle tankar kring dette utan å gå inn på struktur. Eg set spørsmålsteikn ved kvifor det er ein så stor auke innan skule samstundes som det vert færre elevar, sa Hauge.

– Destruktivt

Torstein Hatlevik (V) lanserte tanken om å flytta 5. og 6. klasse for ein periode, for å sjå korleis utviklinga på Onarheim vert.

– Det vil vera ein mildare måte å gjera det på, påpeika Hatlevik.

Lorentz Lunde (KrF) meinte det vil vera fullstendig destruktivt å flytta dei to klassane til Tysnes skule, særleg i eit Prosjekt 3012-perspektiv og arbeidet med å få tilflyttarar til øya.

Tore Atle Humlevik (H) kommenterte at «Onarheim er den mest nasjonalistiske bygda på Tysnes, i positiv forstand», og meinte det vert feil og forhasta å flytta dei to klassane.

– Må vera vaksne nok

Magne Fauskanger (FrP) meinte at det er på tide at politikarane tek strukturdebatten.

– Det er skremmande elevtalsprognosar oppvekstsjefen kjem med. Me må vera vaksne nok til å ta debatten. Eg har ikkje teke stilling til kva skular som bør leggjast ned og ikkje, men innbyggjarane må få vita korleis me ser for oss skulestrukturen i framtida, sa Fauskanger.

Vil setja ned nemnd

Ordførar Helge Hauge meinte at ein strukturdebatt om skule og barnehage bør takast utanfor budsjettdrøftingane. Hauge tok til orde for at det snarast bør setjast ned ei nemnd som skal sjå på skulestrukturen, og at dette arbeidet bør starta til våren.