Kommunelege Magne Skartveit fortel at svineinfluensaen mest sannsynleg har kome til Tysnes.

– Me har hatt ein god del pasientar med influensa eller «influensaliknande sjukdom» dei siste tre vekene, seier han.

Viruslaboratoriet ved Haukeland universitetssjukehus slit med kapasiteten, og ein har difor slutta å senda inn prøver til analyse. Det gjer det vanskeleg å stadfesta om det faktisk dreier seg om svineinfluensa eller ikkje.

Tamiflulager på legekontoret
– Ut frå «fyrtårnkommunar» som overvakar epidemien med aktiv prøvetaking, er det likevel ganske sikkert at me har ein god del svineinfluensa-tilfelle på Tysnes, meiner kommunelegen.

På grunn av lang reiseveg til næraste apotek har legekontoret kjøpt inn eit lager med Tamiflu. Dette er ein medisin som kan forkorta sjukdomsperioden og redusera risikoen for komplikasjonar. For mest mogleg effektiv behandling må ein starta med Tamiflu så tidleg som mogleg etter sjukdomsutbrot.