GODT SAMARBEID: Utflytta tysnesing Camilla Brekke Dalland (t.v.) fekk med seg Torstein Hatlevik og luren hans på Lysefjorden Mikrobryggeri sin porsplukking-dugnad på Os denne veka.
GODT SAMARBEID: Utflytta tysnesing Camilla Brekke Dalland (t.v.) fekk med seg Torstein Hatlevik og luren hans på Lysefjorden Mikrobryggeri sin porsplukking-dugnad på Os denne veka.

Plukka pors til historisk øl

Lysefjorden Mikrobryggeri sitt krydderøl, Slaget på Vågen, kom nyleg til finalen i Årets Øl og Det Norske Måltid. No treng dei mange kilo pors, skal dei kunna produsera meir av det ettertrakta ølet.
Publisert 19.09.2015 kl. 11.00.

I helga var fleire av eldsjelene bak mikrobryggeriet med på kåringa av Årets Øl i Oslo, der krydderølet deira, Slaget på Vågen, var blant dei fem finalistane som gjekk vidare av 56 påmelde øl.

– Berre det å koma til finalen var kjempekjekt, fortel Camilla Brekke Dalland, som saman med broren Joachim Dalland er eitt av tre søskenpar som driv mikrobryggeriet.


Pors-plukking på dugnad

Slaget på Vågen vart laga på oppfordring frå ein historikar, for å markera 350-årsjubileet for hendinga.

– Slaget på Vågen er inspirert av ølsortane på den tida. Det er eit krydderøl med litt røykesmak, så det er ganske tidsautentisk, fortel dagleg leiar, Rune Birkeland.

Ein av dei viktigaste ingrediensane er blada frå planten pors. Denne veks på myrete område, og gjev frå seg ein kraftig aroma.

Før dei byrja bryggja ølet, plukka dei nokre kilo blad på eiga hand. Men no er dei snart tomme for ølet, som skal koma på Vinmonopolet i oktober. Då må det større mengder porsblad til.

– Me treng kring 500 gram pors til eitt brygg, som er på kring 500 liter, forklarar styreleiar Gunnar Nøttveit.

– Og me treng minst ti kilo med pors, legg Rune Birkeland til.

Det tek tid å sanka, og tid held dei på å gå tomme for.

– Plantane spirte ikkje før i slutten av juni, og rett etterpå var eg her og plukka litt. No har dei allereie byrja bli gule, seier Joachim Dalland, i det han trakkar rundt på myra på Ulven på Os.

Tidspresset var ein av grunnane til at dei inviterte alle interesserte til å bli med på pors-plukking måndag denne veka. Ein del friviljuge møtte opp, deriblant ordførar i Os, Terje Søviknes (Frp), som tok seg eit avbrekk frå politikk på sjølvaste valdagen for å støtta det lokale bryggjeriet.


Kombinerer mat og øl

På kåringa av Årets Øl måtte Slaget på Vågen sjå seg slått av Ringnes Polaris Røykbokk. Men Brekke Dalland tek det ikkje så tungt.

– Me har framleis høve til å vinna Det Norske Måltid i januar, noko som er meir prestisjefylt og nærmare det me står for. Me legg stor vekt på kombinasjonen øl og mat i arbeidet vårt, forklarar ho.

Det kunne ein sjølv få oppleva på Tysnes i april, då Lysefjorden Mikrobryggeri supplerte ølet som vart brukt i matlaginga under Chefs Dinner-arrangementet på Haaheim. Koplinga mellom mikrobryggeriet og Haaheim er solid, både gjennom dei to husøla som LMB har laga for Haaheim, og det gode samhaldet mellom partane.

– Det var litt av grunnen til at eg ville få i gong eit samarbeid med Torstein (Hatlevik, red.anm.); det å kombinera mat og drikke er viktig for han og, seier Brekke Dalland.


Gjekk tom for husøl

På sidelinja under pors-plukkinga stod Torstein Hatlevik.

– Eg skal ikkje plukka i dag, for eg har ikkje med meg støvlar. Men eg skal stå her og heia, smiler han, og speler litt på luren sin for plukkarane.

Han fortel at han er veldig nøgd med både samarbeidet med Lysefjorden Mikrobryggeri, og husøla dei har laga for han.

– Det er veldig kjekt å ha eit slikt tett samarbeid. Dei er veldig flinke og hyggjelege, og husøla har gått veldig godt. Dei er så populære at me er tomme no. Dei forsvann fortare enn me hadde trudd, så eg ventar på å få meir no, seier han.

Litt venting må han nok belaga seg på, for bryggjeriet har mykje å hengja fingrane i for tida.

– No må me fyrst og fremst bryggja Slaget på Vågen, slik at me får det på plass på polet, og så kan me produsera meir husøl for Torstein, seier Brekke Dalland.


Enorm suksess på kort tid

Det er knapt eit år sidan Lysefjorden Mikrobryggeri lanserte det første ølet sitt i butikkane. Utanom suksessen med Slaget på Vågen, har mikrobryggeriet laga festivaløl for Tysnesfest, BØLL-øl (festivaløl for Bergen Ølfestival), to husøl for Haaheim Gaard, og var dessutan det bestseljande bryggeriet under Bergen Ølfestival for to veker sidan, med nesten 6.000 selde bongar.

– Det er viktig for oss å fremja interesse for godt øl. På ølfestivalen var det mange som spurde om å få det ljosaste ølet me hadde. Me greidde å overtyda dei om å smaka på litt rød ipa i staden for, og det var ingen som kom tilbake og ville ha eit ljost øl i staden for, smiler Brekke Dalland.


Pors

Pors er ein liten busk som vert 0,5-1 meter høg.

Veks ofte på kystnær myr, og kan dekkja store område.

Vanlig nordatlantisk art som veks langs kysten av Norge nord til Helgeland, i Sør-Sverige og til Nord-Spania.

Har blitt nytta som medisin og krydder i fleire tusen år.

Gjev frå seg ei kraftig, men god lukt, og har blitt nytta som insektsmiddel og luftreinsar.

PLUKKEDUGNAD: Kring ti personar var med og plukka pors til ølbrygging på Ulven denne veka.
PLUKKEDUGNAD: Kring ti personar var med og plukka pors til ølbrygging på Ulven denne veka.
VELKLEDD GJEST: Ordførar i Os, Terje Søviknes (t.h.), tok ein pause frå politikken på valdagen og troppa opp i dress for å plukka pors. Elles på biletet (f.v.): Rune Birkeland, Gunnar Nagell Dahl, Svein Erik Dalland og Torstein Hatlevik.
VELKLEDD GJEST: Ordførar i Os, Terje Søviknes (t.h.), tok ein pause frå politikken på valdagen og troppa opp i dress for å plukka pors. Elles på biletet (f.v.): Rune Birkeland, Gunnar Nagell Dahl, Svein Erik Dalland og Torstein Hatlevik.

Siste saker Gå til framsida

Ådnastegen lokkar to- og firbeinte til fjells

Stølen på Ådnastegen har vore brukt i lange tider. Enno ligg der åtte små sel og to noko større hytter. Juniane Vevatne Lunde (32) gjekk dit ofte som liten, og no fører ho og mannen Matthias Tønnessen tradisjonen vidare med borna sine.