MANGE GJESTER: Bermudateltet blir i år fullt av kjende andlet. Oppe f.v. Dag Jørund Lønning, Geir Helljesen. Nede f.v. oselvargjengen med Bjørn Tomren i midten, Kjell Magnus Økland til venstre og båtbyggjar Hallgeir Forstrønen Bjørnevik til høgre, og Dag Lindebjerg.
MANGE GJESTER: Bermudateltet blir i år fullt av kjende andlet. Oppe f.v. Dag Jørund Lønning, Geir Helljesen. Nede f.v. oselvargjengen med Bjørn Tomren i midten, Kjell Magnus Økland til venstre og båtbyggjar Hallgeir Forstrønen Bjørnevik til høgre, og Dag Lindebjerg.

Program i Bermudateltet dagen lang

Tysnesfest utvidar programmet i Bermudateltet i år. Det blir alt frå føredragshaldarar og konsertar til stand-up og dagen derpå-gudsteneste.
Publisert 13.05.2016 kl. 08.00.

I tillegg til det faste innslaget, God Morgon Tysnesfest, vert det i år både God Ettermiddag Tysnesfest og God Kveld Tysnesfest. Det opplyser driftsleiar for Tysnesfest, Øystein Vaage, i ei pressemelding.


Konsert, humor og føredrag

Onsdag kveld blir programmet i Bermudateltet sparka i gong med God Kveld Tysnesfest, og konsert med Truls Horvei og De Søvnløse, og Charlie Rackstead and The Sticklesbergen Ramblers. Kveldsshowet blir leia av Anders og Kåre.

Torsdag føremiddag vitjar Dag Jørund Lønning Bermudateltet, for å halda føredrag om å utvikla bygda nedanfrå. Lønning er rektor ved Høgskulen for landbruk og bygdeutvikling (HLB). Han vart kåra til årets bygdeprofil i 2015, og årets norske landbruksbloggar i 2014.

Tidleg torsdag kveld er det humorshowet Klypa som seglar inn i Bermudateltet. Dei skal ha show der også fredag kveld.


Lang karriere, lang tur

Fredag blir det to føredrag på dagtid i Bermudateltet. Fyrst ut er Geir Helljesen, som skal snakka om menneske han har møtt i løpet av sine 40 år i NRK. Helljesen er ein av dei aller mest kjende profilane i norsk fjernsyn. I 2005 vart han kåra til årets journalist, og i 2008 fekk han Gullrutens heiderspris. I 2009 vart han utnemnd til Ridder av 1. klasse av Den Kongelige Norske St. Olavs Orden.

Det neste føredraget er eit multimedieføredrag om ro-turen som Bjørn Tomren hadde sommaren 2015. Då rodde han Norge på langs i ein oselvar. Båten vart bygd våren 2015 av Hallgeir Forstrønen Bjørnevik i verkstaden hans på Bjørnen i Os. Båten vert med under forestillinga, for at folk skal få sjå korleis ein rotur på 2.000 kilometer set sitt preg på ein nybygd båt. Tomren er elles kjend som jodlaren Polka-Bjørn.

I multimedieføredraget blir det røvarhistorier frå roturen, bygginga og meir allment om oselvaren. Innimellom vert det musikalsk underhaldning ved Oselvarbanden.


Kystkultur og DJ

Laurdag føremiddag kan ein bli med fjernsynsprofil Dag Lindebjerg på ei TV-reise gjennom kysten si kulturhistorie. Lindebjerg har jobba mange år i NRK, og dei siste åra har han laga mange program om kystkultur og båtliv.

Om ettermiddagen spelar DJ Friendly avslappande musikk live i Bermudateltet, og Anders og Kåre styrer showet.

Søndag, og siste dag med Tysnesfest, er dagens gjest Reidar Brendeland frå Vestlandsfanden. Deretter blir det dagen derpå-gudsteneste med sokneprest Marit I. Espedalen, med musikk av Vidar Eldholm Olsen med band.

Det vert festivalfrukost og frukostshow med Anders og Kåre kvar morgon frå torsdag til søndag i Bermudateltet.


Siste saker Gå til framsida

Pernilla tok ny pers

Fredag sprang Pernilla Eugenie Epland 3000 meter på Tyrvinglekene på Nadderud. Tida 9,30,89 gav ho 4. plass, og ei forbetring av den personlege rekorden hennar med 2,5 sekund.– Løpet var greitt, det var mykje vind på Nadderud, men eg fekk meg ei «klynge» å springa i, fortel Pernilla til «Tysnes». Etter kvart gjekk det litt seint, og ho ville forbi. Då måtte ho nesten ut i bane 3...

Kors, vaflar og fotball-VM på Solstråleøya

– Det var ein nydeleg vêrdag, med fin temperatur. Me fekk flott skyss frå Våge i Mor Di, skøyta til Patrick Madsen.Dette seier Hans Ole Dalland, om friluftsgudstenesta på Solstråleøya søndag.Vidare kan han fortelja at nokre av deltakarane kom roande frå Lunde – og nokre kom verkeleg langvegsfrå:– Eit ektepar frå Minnesota var på Tysnesferie, og fekk oppleva den flotte...