RASK OPP: Marita Nygård debuterte i Stoltzekleiven Opp i helga, og fullførte med tida 11:12. Med det vart ho fjerde beste i si klasse, og niande raskaste kvinne samanlagt.
RASK OPP: Marita Nygård debuterte i Stoltzekleiven Opp i helga, og fullførte med tida 11:12. Med det vart ho fjerde beste i si klasse, og niande raskaste kvinne samanlagt.

Gode resultat frå tysnesingar i Stoltzekleiven Opp

Marita Nygård imponerte stort i sin Stoltzekleiv-debut, og vart fjerde beste i sin klasse.
Publisert 02.10.2016 kl. 15.00.

25-åringen frå Tysnes var ein av fleire tysnesingar som deltok i det tradisjonsrike motbakkeløpet i Bergen i helga. Nygård har dei siste seks månadene trent med Opptur Motbakkeklubb i Os, noko ho seier har vore viktig for den gode plasseringa ho fekk i Stoltzekleiven Opp.


Tett i teten

Kring 5.000 personar, i alle moglege klassar, stilte til start dei to dagane motbakkeløpet gjekk over. 537 personar fullførte i klassen som Marita Nygård konkurrerte i – kvinner 18-34 – og Nygård vart fjerde beste i klassen, med tida 11:12; knappe 22 sekund bak klassevinnaren.

– Eg er veldig nøgd sjølv, konstaterer den spreke dama blidt.

– Kva tenkte du, på veg opp?

– Nei, kva tenkjer ein då? At ein må koma seg opp, og det raskast mogleg. Det gjer kjempevondt, for ein får jo mjølkesyre, men ein må berre kjempa seg gjennom det, seier ho.


Viktig med ein god balanse

Det å kjempa seg gjennom til dømes motbakkeløpet Stoltzekleiven Opp er ikkje noko ein skal ta lett på.

– Har du trent på mental styrke før dette løpet?

– Nei, men eg har trent mykje og variert heile tida. Det blir mykje mengdetrening, og eg trenar mellom anna intervall, styrke og sykling, og eg fokuserer på styrkeøvingar retta mot kjernemuskulatur. Då plar eg vera med på gruppetimer ved Tysnes treningssenter, og vil gje skryt til Hilde Marie Sæverud-Mehammer og dei andre instruktørane der, seier ho, og held fram:

– Ikkje minst likar eg veldig godt det eg held på med, og berre det er motivasjon til å koma seg opp.

Gjennom treninga med Opptur Motbakkeklubb har ho dessutan funne ein god balanse mellom trening og kvile, og jobb og kvardag. Og det å trena i grupper og bli «pusha» har vore viktig for å koma i endå betre form, seier Nygård.


Klar til dyst i 2017

Før ho var med på motbakkeløpet, hadde Marita Nygård berre testa løypa éin gong; helga før.

– Kva blei tida då?

– 13 minutt. Men då tok eg det med ro, svarar ho.

– Blir det ny Stoltzekleiven Opp på deg til neste år?

– Ja, no er eg klar, slår ho fast.


Mange gjengangarar

Andre tysnesingar som fullførte løpet, og som lokalavisa har greidd å finna, er Børge Pedersen, som var med for åttande gong og sette ny personleg bestetid med 13:10; sonen Sjurd Sandvik Pedersen, som var med for femte gong og også sprang inn til ny bestetid med tida 11:49; og dottera Kristi Pedersen, som var med for fyrste gong og fullførte på 13:39.

Rasmus Holm Lunde, Vilhelms Staskevics og Ole Christian Kjerrgård var alle med for tredje gong, og fullførte på høvesvis 13:45, 19:46 og 22:43.

Det er Varegg IL som arrangerer Stoltzekleiven Opp, som i år gjekk av stabelen for 37. gong. Løpet har blitt arrangert kvart år sidan 1979.

Mellom start og mål er det kring 800 trappetrinn, og ein høgdeskilnad på 315,5 meter. Løypa er kring 900 meter lang, og har ein gjennomsnittleg stigningsgrad på 35,8 prosent.


Siste saker Gå til framsida