Deltakarane frå Stord, f.v. Alf Sundal og Oskar Hallaråker Bø. (Foto: Kværner)
Deltakarane frå Stord, f.v. Alf Sundal og Oskar Hallaråker Bø. (Foto: Kværner)

– Ambisjonen for NM er å vinna

Tysnesing Alf Sundal skal denne veka representera Kværner i sveisekonkurransen i Yrkes-NM.
Publisert 17.10.2016 kl. 09.20. Oppdatert kl. 09.24.

23-årige Alf Sundal er regjerande nordisk meister, og kom i fjor på tiandeplass i sveisekonkurransen under fjorårets Yrkes-VM i Brasil.

– Ambisjonen for NM er å vinna. I tillegg ynskjer eg å vera eit godt eksempel i dårlege tider og visa kva norsk industri står for, seier Sundal, i eit intervju som vart publisert på Kværner sitt intranett.

Tysnesingen skal ha brukt friperiodar og helger den siste tida til å finpussa formen.

Sundal er ein av fire Kværner-tilsette som skal vera med på meisterskapen. To av dei tre andre Kværner-sveisarane kjem frå Verdal-verftet, medan den siste kjem frå Stord-verftet, i likskap med Sundal. Frå Verdal kjem Jon Arne Hjelmstadbakk og Robert Nessemo Sandnes, medan Oskar Hallaråker Bø er den andre deltakaren frå Stord.

– Det langsiktige målet er at også Oskar skal markera seg i nasjonale og internasjonale konkurransar, slik Alf har gjort. Det trur eg han har potensiale til, seier trenar og sveise-ekspert Leif Ottar Heimro i opplæringsavdelinga på Stord.

Det er han som vel ut og trener dei frå Stord som skal vera med på NM.

I intervjuet fortel han at dei i jakta på dei rette kandidatane ser på sveiseteknisk nivå, men også personlegdom for kven som passar i konkurransesamanheng.

– Potensiale, innsats og personlegdom er veldig viktig, seier Heimro.

– Konkurransar i sveising er viktig for sveisefaget, både med omsyn til motivasjon blant både deltakarar og kollegaer, i rekrutteringssamanheng, og ikkje minst er det eit kvalitetsstempel for verksemdene som deltek med sine lærlingar eller unge fagarbeidarar, seier Tove Strand Trana, kommunikasjonssjef og opplæringsleiar ved Kværner i Verdal.

Sveisemeisterskapen er ein del av Yrkes-NM, der bortimot 250 deltakarar konkurrerer i 25 ulike yrkesfag. Meisterskapen går av stabelen i Vestlandshallen i Åsane 17.-20. oktober. Arrangør er World Skills Norway, med Hordaland fylkeskommune, Bergen kommune, Yrkeslabyrinten (opplæringskontora i Hordaland), LO og NHO som samarbeidspartnarar.


Siste saker Gå til framsida

Casper vann påskekonkurransen

Casper Christensen (10) var ein av deltakarane i påskekonkurransen vår, der me utfordra lesarane våre til å illustrera påska.

Påskestemning i fargar

Me oppmoda både store og små til å hiva seg med i konkurransen vår, og her har de verkeleg vore kreative, alle saman! Blant bidraga har me trekt ein vinnar, som får eit stort påskeegg fylt med søte overraskingar. Vinnaren blei Casper Christensen (10). Ha ei riktig god påske.