RYDDA SIST SOMMAR: I juni var niandeklassingane ved Tysnes skule med på Bergen og Omland Friluftsråd sin ryddeaksjon på Flornes. (Arkivfoto: Camilla Korsnes)
RYDDA SIST SOMMAR: I juni var niandeklassingane ved Tysnes skule med på Bergen og Omland Friluftsråd sin ryddeaksjon på Flornes. (Arkivfoto: Camilla Korsnes)

– Rydd Tysnes- strendene reine for plast

Kvalen som stranda på Sotra med magen full av plast engasjerer også på Tysnes. Laurdag og søndag blir det ryddeaksjon også her i kommunen.
Publisert 16.02.2017 kl. 09.40.

– Me oppmodar folk kringom i heile Tysnes til å delta. Målet er at dette skal verta ein ryddedugnad som engasjerer alle i lokalsamfunnet, seier ordførar Kåre Martin Kleppe.


– Rydd heile Tysnes

Eigentleg kjem initiativet frå ordføraren i Fusa. Han har invitert alle ordførarane i Bjørnefjordsområdet til å vera med på ein felles ryddeaksjon for å halda Bjørnefjorden rein.

I tillegg til Tysnes, har fusaordføraren også invitert Os og Samnanger til å delta i prosjektet.

Ordføraren i Tysnes har utvida prosjektet for Tysnes sin del.

– For vår del blir det ikkje berre ein «Rydd Bjørnefjorden»-aksjon, men ein «Rydd Tysnes»-aksjon, seier Kåre Martin Kleppe.

Aksjonen går føre seg til helga, laurdag 18. og søndag 19. februar.


Gratis å levera

Kleppe har avtalt med SIM at dei vil plassera ut to containerar på Tysnes, ein ved Jokerbutikken i Uggdal og ein ved Jokerbutikken på Årbakka.

– Ved desse containerane vil det også vera tilgjengeleg strandryddeposar, forklarar ordføraren.

SIM vil plassera containerane ut i morgon fredag, og køyra dei inn att på måndag.

– Dette er rett og slett ein ryddedugnad for å rydda i strandsona. Me oppfordrar folk om spesielt å rydda plast, garn, tauverk og gamle nøter, men treverk kan også ryddast saman.


Lokal fotokonkurranse

Ordføraren oppfordrar alle som deltek i ryddinga om også å delta i ein lokal fotokonkurranse.

– Ta eit bilete av området før og etter de ryddar. Bileta må lastast opp på facebook eller instagram med emneknaggen #plasttysnes, så kan de vinna 1.000 kroner, oppmodar ordføraren.

Han vil trekkja ut to vinnarar i konkurransen, med tusen kroner på kvar.

Alle som sender inn bilete er med i konkurransen.


– Kollektivt ansvar

Ordføraren håpar på stor oppslutnad i ryddeaksjonen.

– Dette er ope for absolutt alle, seier han, og legg til at han ser det som eit kollektivt ansvar å rydda opp i boss som kjem rekande i sjøen.


MYKJE BOSS: Utallege sekkar med plast og anna boss vart samla saman under ryddeaksjonen på Flornes i juni. No oppfordrar ordføraren til ryddeaksjon over heile Tysnes i helga som kjem. (Arkivfoto: Camilla Korsnes)
MYKJE BOSS: Utallege sekkar med plast og anna boss vart samla saman under ryddeaksjonen på Flornes i juni. No oppfordrar ordføraren til ryddeaksjon over heile Tysnes i helga som kjem. (Arkivfoto: Camilla Korsnes)

Siste saker Gå til framsida

Departementet godkjenner reguleringsplanen for Våge

– Tysnes kommune har laga ein spanande og framtidsretta plan for å utvikla Våge til ein levande fjordlandsby. Denne reguleringsplanen er viktig for å nå dette målet, seier kommunal- og moderniseringsminister Jan Tore Sanner.