FRISKT: - Ein kjenner verkeleg at ein lever, seier Roald Nesse vel oppe av vatnet.
FRISKT: - Ein kjenner verkeleg at ein lever, seier Roald Nesse vel oppe av vatnet.

Hiv seg uti heile året

Roald Nesse har nett runda 60 år, men ifølgje øvrebøbuen er inga årstid for kald for eit lite søndagsbad.
Publisert 18.03.2017 kl. 06.00. Oppdatert kl. 09.06.

Det er eit varmt smil som møter oss på tunet på Øvrebø, på den idylliske sørspissen av Neshamn.

Me er på besøk hos Roald Nesse. Han som bur ved den rutete og fargerike siloen oppe i skogen der. Ja, ved sida av vikingskipet, veit du. I Nesse-familien manglar det ikkje på verken kreativitet eller skaparlyst, det er heilt sikkert.

Roald Nesse har vore med på mykje rart opp gjennom åra. Den tidlegare revy- og songkor-mannen påstår at han har blitt rolegare i det siste. At meir av tida går med til familie og barnebarn.

– Slik skal det vera når ein rundar 60, forklarer han den noko yngre utsendingen frå «Tysnes».

– Livet er ein syklus, men revytida gløymer eg aldri, fortel han.

Men han har ikkje tenkt å trekkja seg tilbake heilt med det første. Til sommaren drar han i gong ein ny Surhaa Blues-festival. Planen er at det skal koma både lokale artistar, og tilreisande musikantar frå Bergen. I tillegg vert det ein barnefestival og framsyning av teater, som dottera Karianne held kontroll med.

Tysnesingen har nett runda 60 år, og i 41 av desse har han vore gift med Else Karin. To born og seks barneborn har det blitt, og han stortrivst med at alle held til på Tysnes. Dottera Karianne og familien er berre eit steinkast unna, og for dei små er det lettvint å stikka innom besteforeldra på veg heim frå skulen.


Spreking

No gler han seg til det vårast, og at tida på ny er komen for å finna fram framkomstmiddelet på to hjul. Bestefaren til seks har sine måtar å halda seg frisk og ungdomsleg på. Nesse er eit kjent syn på vegen, for dei som ferdast mellom Neshamn og Gjerstad i morgontimane.

– Det er heilt fantastisk med den sykkelturen til og frå jobb, fortel Nesse.

Helst likar han å ha god tid. Frå sykkelsetet kan han nyta både naturen, kor stilt det er, og han får tid til å sitja der og filosofera litt. Den rimeleg smale vegen blir ein vand med, forklarer han.

– Men av og til må ein sjå kva ein er god for også, flirer han.

Litt spanande er det å prøva å slå rekorden på 36 minutt på dei 15 kilometrane.

Nesse er ikkje berre ein sprek morgonfugl. Dei siste to åra har han teke sats og hoppa i sjøen, gjennom heile året. Denne dagen er det både vind og litt regn i lufta når Nesse drar fram badekåpa, badebuksa og slippersane for å ta seg eit forfriskande sjøbad.

Det er nesten så ein kvar kunne bli overtyda om at bading heile året er ein god idé, når ein høyrer kor engasjert Nesse pratar om hobbyen. Legen er visst ikkje like begeistra for badesprella til sekstiåringen, men det verkar ikkje som han har tenkt å gi seg med badinga med det første.


Ikkje pensjonsalder endå

Nesse er elverksmontør, og ein av dei som rykker ut i storm og uvêr slik at eg og du skal få straumen tilbake.

– Eg veit litt om kva krefter som ei i sving når linjene kortsluttar, seier ein noko meir alvorstynga Nesse.

Heldigvis er dei ikkje ute for skumle opplevingar ofte, og Nesse forsikrar om at jobben har blitt tryggare med åra. Jobben som elverksmontør trivst han godt i. Eit yrke han har hatt sidan 1981. No ser han fram til at pensjonsalderen nærmar seg. Klyving i kraftstolpar kan ta på for både hofte og kne.

Men fram til då ventar mange fleire hopp i sjøen, og kanskje klarer han å slå sykkelrekorden til jobb på 36 minutt også. Han skal i alle fall prøva!


Siste saker Gå til framsida

No lyser dei opp i mørket

– Viss eg ikkje har refleks kan bilane køyra på meg, forklarar Askild (5) frå Stjerneresio barnehage til «Tysnes».

Stor siger for ungdom

Bussbilletten blir ikkje 40 kroner dyrare likevel. Malene Kristine Meidell Alsaker gledar seg på vegner av ungdom i Hordaland.