RAP: Med artistnamnet «Justin Case» stilte Sissel Karin Clausen  med spesiallaga tysnesrapp. (Foto: Ingunn Gjærde)
RAP: Med artistnamnet «Justin Case» stilte Sissel Karin Clausen med spesiallaga tysnesrapp. (Foto: Ingunn Gjærde)

Kammerkoret inviterte til vestlandsfest

Det var fullt hus i Grendatun laurdag kveld, då det var duka for kabaret, middag og dans.
Publisert 19.03.2017 kl. 16.10. Oppdatert 21.03.2017 kl. 12.19.

– Kabareten var kjempeflott! Dei har så flinke solistar, skrytte Ingeborg Gaugstad, etter førestillinga i Uggdal.

Tysnes Kammerkor hadde invitert med seg både ordførar og mannskor på det som skulle bli ein festkveld for Vestlandet.

Og tysnesingane kjenner si besøkstid. Salen var heilt full, då førestillinga starta. Med jamne mellomrom inviterer kammerkoret til både musikk og dans.

– Dette er det største publikumstalet me har hatt nokon gong, sa ei glad Ingunn Myklebust. Ho har hatt ansvaret for mykje av organiseringa av kabareten.


Sporty ordførar

Med velkomstdrinken i handa var det over 100 spente tysnesingar som såg at kammerkoret entra scenen i sine gule sydvestar.

Jacob Sande, Jan Eggum og Bjørn Eidsvåg sine songar var nokre av dei som stod på menyen.

Kåre Martin Kleppe var spesialinnleigd, og ordføraren stilte som solist på to songar.

Med mannskoret, song han «Bare ein mann», av Bjørn Eidsvåg. Denne vart godt teke imot av publikum, som tykte det var stas å sjå ordføraren som solist.

Seinare på kvelden venta Eggum-songen «En natt forbi», akkompagnert av kammerkoret. Fine prestasjonar frå både kor og solist.

– Dette var kjekt, sa Kleppe etter kabareten.

Han var godt nøgd med framføringa, men det blir visst ikkje noko fast opptrinn.

– Det kom nokre overraskingar undervegs. Sissel sin rap var jo morosam, sa ein smilande ordførar.


Tysnesrap

Sissel Karin Clausen bydde verkeleg på seg sjølv under kabareten. I tillegg til å vera fast kormedlem drog ho fram skodespelartalentet ved to høve. Først som Åse Fantemor, og seinare som rap-artisten «Justin Case».

– Eg trudde det skulle bli gryn av denne framføringa. Men kva fekk eg? Ei t-skjorte, sa «Justin Case», til stor latter frå publikum.

Med parykk, bling rundt halsen og capsen på snei, tok Clausen for seg både kommunesamanslåing og nyheiter.

– Jippy, joy, joy, avslutta ho, og publikum svarte med stor applaus.


Hattemakaren

Alf Terje Myklebust har snart 40 år bak seg som korsongar, og leia førestillinga med stødig hand.

Myklebust stilte med hatteskifte mellom kvar song, og mellom songane bandt han saman kabareten med fine småhistoriar.

Kvelden hadde ei fin ramme rundt seg, med mange fine vestlandssongar. Dirigent Trent Bruner og Tysnes Kammerkor kunne by på eit variert program. Fleire nummer skilde seg ut. Blant anna ein nydeleg versjon av «Vise til far», med premiere på Sigrid Moldestad sin nye versjon til blandakor.


Ny sjanse

Fekk du ikkje med deg kabareten på laurdag, har du framleis høve til å få nokre smakebitar. 23. april vert delar av kabareten framført under ein korkafé i Vonheim, og i kulturkyrkja på Onarheim 30. mai.


VESTLANDET: I ekte vestlandsstemning hadde kammerkoret funne fram sydvestane. (Foto: Ingunn Gjærde)
VESTLANDET: I ekte vestlandsstemning hadde kammerkoret funne fram sydvestane. (Foto: Ingunn Gjærde)
BERRE EIN MANN: Ordførar Kåre Martin Kleppe var ikkje vanskeleg å be, og var solist på to songar. (Foto: Ingunn Gjærde)
BERRE EIN MANN: Ordførar Kåre Martin Kleppe var ikkje vanskeleg å be, og var solist på to songar. (Foto: Ingunn Gjærde)
KOR: Tysnes kammerkor hadde ein varierte meny, denne laurdags kvelden. (Foto: Ingunn Gjærde)
KOR: Tysnes kammerkor hadde ein varierte meny, denne laurdags kvelden. (Foto: Ingunn Gjærde)
2 x INGEBORG: Publikum kom med gode tilbakemeldingar etter førestillinga. Ingeborg Gaugstad (t.v.) og Ingeborg Tysnes kunne skryta av songarane. (Foto: Ingunn Gjærde)
2 x INGEBORG: Publikum kom med gode tilbakemeldingar etter førestillinga. Ingeborg Gaugstad (t.v.) og Ingeborg Tysnes kunne skryta av songarane. (Foto: Ingunn Gjærde)

Siste saker Gå til framsida

No lyser dei opp i mørket

– Viss eg ikkje har refleks kan bilane køyra på meg, forklarar Askild (5) frå Stjerneresio barnehage til «Tysnes».

Stor siger for ungdom

Bussbilletten blir ikkje 40 kroner dyrare likevel. Malene Kristine Meidell Alsaker gledar seg på vegner av ungdom i Hordaland.