TRE KONSERTAR: Tysnes Musikklag skal spela to konsertar når dei tek turen til Wales i palmehelga. Det blir også ein tredje konsert i Manchester. (Arkivfoto)
TRE KONSERTAR: Tysnes Musikklag skal spela to konsertar når dei tek turen til Wales i palmehelga. Det blir også ein tredje konsert i Manchester. (Arkivfoto)

Musikklaget tek syngjande ordførar med på Wales-tur

Han skal ha offisielle oppgåver i møte med ordførarkollegaen i Caernarfon, og så skal Kåre Martin Kleppe i aksjon som solist.
Publisert 19.03.2017 kl. 09.00.

Karrieren som korpsmedlem blei heller kortvarig for dagens Tysnes-ordførar.

– Det var eit innfall me fekk, saman med ein kamerat melde eg meg på som aspirant i skulekorpset, på trombone. Eg gjekk vel i femte eller sjette klasse den gongen. For min del blei det med eitt år i korpset, så tok andre interesser over, seier Kåre Martin Kleppe.


Stort reisefølgje

Han er med i reisefølgjet på 33 frå Tysnes Musikklag som tek turen til Wales palmehelga. Der skal dei spela to konsertar, pluss ein tredje i Manchester, men Kåre Martin har ikkje leita fram trombonen til turen.

– Nei, spelinga får andre ta seg av. Men går øvinga med korpset her heime bra, skal eg syngja «You Raise Me Up» der borte. Dette er ein tur eg verkeleg ser fram til, seier ordføraren.

Det er nytt for Tysnes Musikklag å reisa på utferd til Wales, sjølv om det i mange år har vore tett kontakt med musikklaget her og spelande krefter på andre sida av Nordsjøen.


Første for musikklaget

– Eg har vore der fleire gongar, men dette er fyrste gongen musikklaget er med, seier dirigent Yngve Nikolaisen.

Nick Hughes og Paul Hughes er bindeledd mellom miljøa på Tysnes og i Caernarfon. Byen med det berømte slottet der blant andre Prins Charles blei krona. Musikantane frå Tysnes skal i aksjon på dette slottet søndag 9. april. Ei storhending ventar ikkje langt fram i tid.

– Kva visste du om den walisiske byen de skal besøkja då du blei invitert med på turen?

Spørsmålet går til Tysnes-ordføraren.


Prins Charles

– Ingen ting, så eg måtte googla for å finna ut meir, svarer Kåre Martin.

Me følgjer sporet, og googlar oss fram til at Caernarfon er ein liten by i det nordvestlege Wales. Dette er administrasjonsbyen for grevskapet Gwynedd, og byen er mest kjent for Caernarfon slott som blei reist av kong Edward I av England etter erobringa av Wales i 1277 og seinare har blitt sett på som symbol på England sin dominans av Wales. Prins Charles blei innsett som fyrste av Wales 1. juli 1969, det skjedde ved slottet i byen med vel 9.600 innbyggjarar, alt i følgje Wikipedia. I desse historiske omgjevnadane er det gjengen frå Gudeøya skal i aksjon, både som musikantar, på offisiell vitjing med ordførarmøte, og som turistar.


Gåver til vertskapet

– Mi rolle på turen er å vera med og representera Tysnes. Reknar med eg tek med meg ein vimpel og ei bok om Tysnes som gåver til vertskapet. Det blir venteleg biletboka som viser kor fint her er, det blir vel litt drygt for dei å læra seg norsk om eg skulle velja ei anna bok. Musikklaget vårt gjer det imponerande bra i landsmålestokk, ut frå prestasjonane i Brass-NM nyleg ligg me som nummer 27 her til lands. Flott levert ut frå storleiken på kommunen vår, men Tysnes Musikklag presterer godt i ulike samanhengar. Eg ser fram til den type kulturutveksling me no skal leggja ut på, til venskapskorpset i Caernarfon. Det er musikklaget sine tankar å invitera dei til Tysnes ved høve, seier den syngjande ordføraren.

Tysnes Musikklag skal på scenen laurdag kveld, der dei skal spela i andre halvdel av ein konsert som startar klokka 19.00 i Caernarfon Chapel. Dagen etter går turen til Caernarfon Castle, og konsert der frå klokka 14.30. Turneen blir avslutta med konsert i Manchester, anten måndag eller tysdag. Dei har å gle seg til, reisefølgjet frå Tysnes.


GLER SEG: Ordførar Kåre Martin Kleppe var ikkje vond å be då Tysnes Musikklag spurde om han kunne tenkja seg å bli med til Wales. – Mi rolle er å representera Tysnes, fortel Kleppe, som dessutan skal syngja «You Raise Me Up». (Arkivfoto)
GLER SEG: Ordførar Kåre Martin Kleppe var ikkje vond å be då Tysnes Musikklag spurde om han kunne tenkja seg å bli med til Wales. – Mi rolle er å representera Tysnes, fortel Kleppe, som dessutan skal syngja «You Raise Me Up». (Arkivfoto)
KJENT SLOTT: Caernafon slott blei reist av kong Edvard I av England, og blir difor sett på som eit symbol på England sin dominans over Wales.
KJENT SLOTT: Caernafon slott blei reist av kong Edvard I av England, og blir difor sett på som eit symbol på England sin dominans over Wales.

Siste saker Gå til framsida

Muren i Elsåker-vågen får stå

Eit framlegg om at delar av muren i Elsåkervågen må rivast, fall mot to røyster. I staden gjekk politikarane inn for utviding av vegskulder og betre forbikøyringsplass.