INNBROT: Politiet prioriterer å etterforska hytteinnbrota på Ølve, og ser alvorleg på saka.
INNBROT: Politiet prioriterer å etterforska hytteinnbrota på Ølve, og ser alvorleg på saka.

Innbrot i seks hytter på Ølve

Politiet ynskjer tips frå publikum, om nokon har observert noko mistenkeleg i området.
Publisert 20.03.2017 kl. 11.52. Oppdatert 21.03.2017 kl. 10.04.

Ein mørk utanlandsk varebil av typen Volkswagen Caravelle, har blitt kontrollert, og er sjekka ut av saka.

I løpet av perioden måndag til fredag i førre veke, har det vore innbrot i seks hytter i eit hyttefelt på Ølve.

– Det har blitt stole alkohol, radioar, ei veggklokke, eit sett med krukker, og litt forskjellig, fortel Ove Ivarhus, politioverbetjent ved Fusa og Tysnes lensmannskontor.

Ein har ikkje full oversikt over dei stolne gjenstandane, då ikkje alle eigarane har hatt moglegheit til å sjekka kva som er borte.


Innbrot i seks av fjorten hytter

Mest sannsynleg har innbrota blitt gjennomførte på den same dagen. På grunn av at hytteeigarane ikkje har vore i hyttene i vekedagane, er det vanskeleg å seia sikkert kva dag innbrota har skjedd.

Politiet fekk fyrst melding om hendinga fredag, då hyttefolk sjølv oppdaga at uvedkommande hadde brote seg inn dørene.

– Innbrotstjuvane har vore inne i mange hytter på ein gong. Dette er ei prioritert sak hos politiet, seier Ivarhus.

Heile seks av dei fjorten hyttene i feltet, har fått innbrotstjuvar på besøk.


Ønskjer tips

Måndag fortalde Ivarhus at politiet hadde fått inn tips om ein bil som har oppført seg litt spesielt, i området.

– Fredag morgon vart det sett ein mørk, utanlandskregistrert, Volkswagen Caravelle (varebil) på Ølve, sa politioverbetjenten.

Tysdag vart den mørke Caravellen på ny observert i Ølve, og politiet rykka ut med blålys. Caravellen vart kontrollert og sjekka ut, og er ikkje lenger aktuell i saka.

Om nokon har tips, eller har sett noko anna, ber han dei om å ta kontakt med politiet, på telefon 02800.


Siste saker Gå til framsida