SKJÆRTORSDAGSTUR OVER BJØRNEFJORDEN: Monica Lekven, sambuaren Joachim Dalland og kameraten Stein Inge Hauge frå Os nytta torsdagskvelden på båttur til Mandelhuset.
SKJÆRTORSDAGSTUR OVER BJØRNEFJORDEN: Monica Lekven, sambuaren Joachim Dalland og kameraten Stein Inge Hauge frå Os nytta torsdagskvelden på båttur til Mandelhuset.

Påskekos på Mandelhuset

I påsken lokka Mandelhuset fastbuande og ferierande med påskequiz og livemusikk.
Publisert 18.04.2017 kl. 15.02.

– Eg var ikkje på jobb sjølv, men høyrde at det var fullt hus under påskequizen onsdag. Mykje folk var det og under konserten sist laurdag, kunne ei smilande Solveig Lie Tønnessen melda bak bardisken skjærtorsdag.

For trass i at Mandelhuset i år ikkje kunne servera påskemat grunna oppussing, kunne dei freista med trubadur, quiz og pianobar gjennom heile påsken. Denne kvelden var det Jim Jacobsen som skulle stå for underhaldninga.


Opna ferien med båttur

Då den utsende journalisten vitja Mandelhuset tidleg torsdag kveld, var det framleis stille og roleg ved utestaden. Været hadde endeleg betra seg, og Joachim Dalland, sambuaren Monica Lekven og kameraten Stein Inge Hauge nytta sjansen til å nyta kvelden ute på bryggja. Joachim er opphaveleg frå Tysnes, men bur no saman med Monica på Os. Stein Inge er frå Sogn, men er og busett på Os. Saman hadde dei teke turen over fjorden i båt for å feira at påskeferien var i gang.

– Me hadde ein nydeleg tur på veg hit, smiler Joachim.


Påsketradisjonar

Høgtider vert feira ulikt av alle, og mange har eigne tradisjonar. Påsken er ikkje noko unnatak.

– I påsken høyrer det til god mat og drikke i godt selskap, meiner Joachim.

Monica legg til at det og skal vera påskepynt og godteri.

– Trass i at me ikkje har born, må me likevel ha påskeegg, ler ho.


Familietid i ferien

Trioen fortel at dei ikkje kjem til å få med seg trubadur Jim Jacobsen seinare same kveld.

– Me visste faktisk ikkje at han skulle spela i kveld, og må nok attende til Os før den tid, forklarar Joachim.

Men han fortel at dei skal koma attende dagen etter, og vera resten av ferien hos familien i Dallandsbrekka. For Stein Inge står dugnadsarbeid på familiehytta på agendaen på feriedagane.

– Saman med syskena mine har eg kjøpt ei hytte i Sogn, så litt arbeid med den vert det nok i ferien, smiler han.


Avslutta med allsong

Seinare same kveld spela trubaduren Jim Jacobsen til glede for dei frammøtte. Den rutinerte entertaineren, som og har vitja Mandelhuset ved tidlegare høve, visste korleis han skulle få med seg samtlege på den eine songen etter den andre. Alle som ville, kunne koma med song-ynskje.

– Springsteen, vert det ropt frå det eine bordet.

Og det tek ikkje mange sekundane før Jacobsen svara med «Pay me my money down», og allsongen var på ny eit faktum.


Siste saker Gå til framsida

Leiar: Gratulerer med nytt og flott omsorgssenter!

Onsdag 22. november 2017 vil for alltid stå som ein stor merkedag i Tysnes. Etter fleire år med anleggsarbeid var det endeleg klart for snorklypp og for opningsfest for den største investeringa nokosinne i Tysnes kommune i soge: Eit heilt nytt og flott omsorgssenter.Det er berre å stilla seg i køen av gratulantar. Det er ikkje anna enn kjempeflott at politikarane i Tysnes etter lange og...

– Me leitar etter det skjulte potensialet i elevane

– We are the world, we are the children!Ungdommane syng av full hals frå scenen i musikkavdelinga ved Tysnes skule. Med blikket mot dei og ein gitar på kneet, står lærar Arne Kleppe og syng med. Tre veker er att til det tradisjonsrike juleshowet i Vonheim, og ideane som har mognast i haust byrjar å bli testa ut. – Me har ein del program og mange idear, men me er ikkje heilt...