VIDEO: Toget i Våge
– Det har vore kjekkaste å gå i tog, sa ei smilande Victoria Epland (6).
Etter ein regnfull 16. mai, kunne mange gleda seg over at sola stakk fram på sjølvaste nasjonaldagen.
Fellesfeiringa i Våga starta med eit flott tog med song og musikk, frå Våge kai og opp til Tysnes kyrkje. Der var det Signe Pettersen Opdal og Julie Bakke som stod for kransnedlegging.
Flott underhaldning
Etterpå marsjerte toget vidare til Tysneshallen, der det venta både underhaldning og leiker.
Barnehagane song med flott engasjement til ein fullsett Tysneshall. Skulane fortsette med både dans og song.
Samkøyrde unge tysnesingar imponerte med gamaldans-opptrinn. I tillegg var det bra trøkk under framføringa av «Vestlandet», songen frå Melodi Grand Prix-junior, i eit stort kor.
Heidra tysnesingen
Lars Auran heldt dagens 17. mai-tale i Våge. Han nytta taletida til å heidra den gode tysnesingen.
– Fysisk har eg vore borte frå Tysnes, men ikkje i hjarta, sa Auran i ein personleg og varm tale.
Som heimflytta tysnesing trekte han fram dugnadsånda, nærmiljøet, og at ein viser omsorg til kvarandre.
– Tysnes er så mykje meir enn flott natur, sa Auran.
