Legendarisk Mods-konsert

Taket løfta seg nesten under Mods sin store generalprøve på Mandelhuset.
Publisert 04.06.2017 kl. 14.37. Oppdatert kl. 16.43.

Éin liten heimelaga plakat, 220 eksklusive billettar til sals i eit flytenaust, Mandelhuset som arena og eit rimeleg kjent band frå Rogaland. Det var ingrediensane til ein ellevill konsertkveld i Våge på Tysnes.

– Det er ei ufatteleg stor glede for oss å få stå her i kveld, sa Morten Abel frå scenen.

Publikum var med frå første song, og det var tydeleg at dette sette tysnesingane pris på. Mods, med Abel i spissen, kunne by på nokre av dei meste kjende klassikarane.

Dei starta konserten med «Gje meg litt mer», og fortsette med blant anna «Bli med oss» og «Reisen». Men då «Bare i nått» og «Revansj» blei spelt, løfta taket seg nesten i det nye lokalet til Mandelhuset.


Allsong

Publikum var velvillig med på allsong, og for dei som har følgd Mods sidan storheitstida på 80-talet, sat framleis teksten til både vers og refreng.

Etter ein times tid takka gruppa for seg, men etter å ha blitt heia tilbake på scenen for meir, kom dei største slagarane.

– Du er mislykka, du, runga det frå lokalet.

Etter «Meg må du hilsa på» kom Mods-songen over alle Mods-songar, «Tore Tang».

– Syng, oppfordra Abel, og tysnespublikummet tok i av full hals.

Mods avslutta settet med «Me to går alltid aleina», som sette eit fint punktum for kvelden.

– Dette var jo heilt fantastisk. Enormt, sa ein i publikum til sidemannen på veg ut.


Oppkøyring

Gitarist Tor Øyvind Syvertsen var godt fornøgd med konserten på Mandelhuset.

– Kjempegøy! Dette trengte me, sa han etter konserten.

– Me får feedback frå publikum og ein får kjenna på adrenalinet under ein konsert. I tillegg finn me ting som me må terpa på før stadionkonsertane, forklarte Syvertsen.

Det er på Vestlandet, og gjerne opp mot Bergen at Mods har hatt det beste publikummet, meiner Syvertsen. Han hugsar tilbake til ein liknande hemmeleg konsert Mods hadde i eit ungdomshus på Hatlestrand før comebacket i 2012.

Sjølv om vokalist Morten Abel hadde litt utfordringar med stemma laurdag kveld, la det på ingen måte nokon dempar på konsertopplevinga på Tysnes.


Innvia lokalet

Det var ein øvingskonsert, og litt justeringar blei det undervegs. Men det var akkurat det dei skulle denne kvelden. Gjera dei siste førebuingane til konsertane på Viking stadion.

Bandet fekk stå for innviinga av det nye lokalet til Mandelhuset, som eigna seg godt til konsertar.

– Lokalet er litt lite, men det er kjekt å spela så intimt. For ein plass, skrytte Mods-gitarist Syvertsen.

Kvifor valet fall på akkurat Mandelhuset, kunne manager Arne Svare i Stageway gi svar på. Han har god kontakt med Sigvard Madsen og gjengen, og her kunne dei få alt på ein plass, både mat, overnatting og øvingslokale. Han har berre lovord å seia om arrangøren, som ordnar med det meste rundt konserten.

– Me køyrde forbi tidlegare, og såg at dei heldt på og utvida. Tysnes er litt vekke i frå byen, og for oss er Mandelhuset eigentleg ein perfekt stad, sa Svare.

– Å få lov til arrangera ein slik konsert set me stor pris på, sa ein audmjuk Sigvard Madsen.


Neste stopp Viking stadion

For Mods går turen no vidare sørover, til to konsertar på Viking stadion. Dei 23.000 billettane som vart lagt ut til den første konserten vart raskt rivne bort, og bandet skal no halda ein ekstrakonsert i tillegg.

Til dobbelkonserten på Viking stadion har Mods invitert med seg ei heil rekkje med artistar. Stavangerkameratane, Bjørn Eidsvåg, Lothepus, Kjartan Salvesen og Hans Petter Hansen er nokre av dei.

– Eg trur først og fremst at det blir ein skarre-r-festival når det gjeld allsong, sa Bjørn Eidsvåg spøkefullt til NRK under artistlanseringa i mars.

Med ein slik generalprøve Mods leverte på Tysnes, er det all grunn til å tru at Stavangerpublikummet vil sjå eit Mods i storform på stadion 16. og 17. juni.


TETT PÅ: Publikum fekk nærkontakt med Morten Abel og stjernene frå Mods.
TETT PÅ: Publikum fekk nærkontakt med Morten Abel og stjernene frå Mods.
MODS: På Viking stadion blir kanskje ikkje takhøgda ei utfordring for Tor Øyvind Syvertsen, Morten Abel og dei andre Mods-medlemmane.
MODS: På Viking stadion blir kanskje ikkje takhøgda ei utfordring for Tor Øyvind Syvertsen, Morten Abel og dei andre Mods-medlemmane.
PUBLIKUM: Mange er nok misunnelege på dei heldige publikummarane som fekk med seg øvingskonserten til Mods.
PUBLIKUM: Mange er nok misunnelege på dei heldige publikummarane som fekk med seg øvingskonserten til Mods.
FULLT HUS: Mods stod for den store innviinga av Mandelhuset sitt nye lokale.
FULLT HUS: Mods stod for den store innviinga av Mandelhuset sitt nye lokale.
TOMMEL OPP: Morten Abel skrytte over Tysnes-publikummet.
TOMMEL OPP: Morten Abel skrytte over Tysnes-publikummet.
ELLEVILLE TYSNESINGAR: Mods vart godt mottekne av Tysnes-publikummet.
ELLEVILLE TYSNESINGAR: Mods vart godt mottekne av Tysnes-publikummet.

Siste saker Gå til framsida

Fotominne frå Langeland

Staden er Langeland og året 1970. Hesten og den gamle slåmaskinen heldt på denne tida framleis stand i jordbruket, fortel Harry Solberg, som har sendt oss dette kjekke bildet. Det er Jens Langeland som held i taumane, og borna på høykjerra er syskena Solberg frå Odda. Har du eit bilete frå farne tider som fortener å koma på trykk? Send det til redaksjonen@tysnesbladet.no, og hugs...