GOLF ER EIN SPORT FOR ALLE: Det meiner Kristin Berntsen Simonsen, som under idrettsdagen gav dei frammøtte ein introduksjon til sporten.
GOLF ER EIN SPORT FOR ALLE: Det meiner Kristin Berntsen Simonsen, som under idrettsdagen gav dei frammøtte ein introduksjon til sporten.

Svinga golfkølla på idrettsdag

Måndag fekk fastbuande og hytteferierande i alle aldrar opp pulsen då det var skipa til idrettsdag ved idretts- og kulturbygget på Reksteren.
Publisert 14.07.2017 kl. 13.00.

– Eg synest oppmøtet i dag er svært bra, eg er nesten litt overgitt!

Arvid Berntsen i Reksteren IL er nett kome ut på fotballbana, der både liten og stor varmar opp med ein venleg fotballkamp. Han fortel at idrettsdagen er for alle som ynskjer å koma.

– Dette er eit arrangement for både store og små, smiler han, før han sjølv må varma opp til friidrettsaktivitetane, som er det neste på agendaen.


Møter nye vener

Lengdehopp, 60-meter og kulestøyt. På grusbana på Reksteren stod det ikkje på innsatsen, og samlege fekk ein god moglegheit å få opp pulsen i ferietida.

– 4.28 meter trur eg det vart. Det er ikkje noko rekord, for eg har hoppa omlag 4.50 på skulen tidlegare.

Morten Berntsen er nett komen ut av lengdegropa. På sida ventar er slektningane Jesper og Tobias og Anneli Berntsen. Dei fortel at dei alle plar delta på idrettsdagen.

– Det er kjekt og sosialt. Nokre av dei som er her kjenner me frå før, men me vert og kjent med nye, fortel dei.


Finn roen på Tysnes

I år var idrettsdagen ekstra særeigen. På besøk var nemleg den kjende golfspelaren Kristin Berntsen Simonsen, som villig lærte frå seg tips og triks til dei frammøtte. Til vanleg bur ho i USA, der ho studerer og speler golf ved California State University. Ho er og med i Team Norway, så kvardagen er travel. Dei neste vekene skal ho delta i fleire turneringar. Fyrst i England, der ho skal delta i «British Open», og deretter til Sveits med landslaget, der ho skal delta i EM. Likevel vart det tid til eit par etterlengta feriedagar på Reksteren.

– Skulle ynskja det vart meir tid til å vera på Reksteren. Her får eg ro i sjela, nikkar ho.


Golfkøllene med på ferie

Trass i at ho er på ferie, er golfkøllene med. På idrettsdagen fekk dei frammøtte ein demonstrasjon, og dei som ynskte fekk og prøva å slå eit slag med golf-kølle.

– Er det nokon som veit kva denne kølla heiter?

Ho held opp ei av dei mange køllene frå bagen sin. Etter litt kjem tilskodarane fram til at det er ein «driver».

Den erfarne golfaren syner fram sko, hanske, køller og bag.

– Eg ynskjer å syna at golf er ein sport for alle. Kanskje nokre frå idrettsdagen får opp augo for sporten, det hadde vore moro.


Avslutta med konkurranse

Ein av dei som følgde interessert med under introduksjonen var Terje Bårdsen, og når det blei spurt om ein friviljug til demonstrasjon, var han snar å melda seg.

– Eg har nesten aldri teke i ei golfkølle før, så dette var kjekt. Eg har lært mykje nytt i dag, fortel han.

Om det vert meir golf for mannen frå Karmøy er uvisst. Dottera Hege derimot, er sikker på at sporten ikkje er noko for ho.

– Det var kjekt å vera med og sjå her i dag, men eg har ikkje tolmod til å verta golf-spelar trur eg, ler ho.

Idrettsdagen vart avslutta med konkurranse, for å sjå kva deltakarane hadde fått med seg. Det vart sett opp ei stang i enden av fotballbanen, og målet var å slå golfballen nærast stanga. Og demonstrasjonen synte å vera til god hjelp for Terje Bårdsen, som stakk av med sigeren.


Bollar og brukthandel

Utan mat og drikke, duger helten ikkje vert det sagt, og det var tilfellet og under idrettsdagen på Reksteren. Derfor var det servering under heile arrangementet. Bak disken stod Irene Mikkelsen og Inger Alice Isaksen, smilande blide, og klar til å servera både bollar og brus. Damene kunne og fortelja at dei saman med Berit Berntsen hadde laga i stand brukthandel i rommet ved sida.

– Den skal me ha open onsdagar og laurdagar i sommar, og inntektene vil gå til huset her, forklarte dei.

Begge er opphaveleg frå Bergen, men no busett på Tysnes.

– Du kan seia at me har emigrert til Tysnes, ler Mikkelsen, medan ho serverte nysteikte bollar og kaffi over disken.



JAMN KAMP: Sofie Heggestad og Malin Paulsen i jamn kamp på 60-meteren. Begge fekk dei premie for å ha delteke på idrettsdagen tre gonger.
JAMN KAMP: Sofie Heggestad og Malin Paulsen i jamn kamp på 60-meteren. Begge fekk dei premie for å ha delteke på idrettsdagen tre gonger.
I SVEVET: Morten Berntsen hoppa over fire meter i lengdegropa, men det vart ingen rekord, fortel han.
I SVEVET: Morten Berntsen hoppa over fire meter i lengdegropa, men det vart ingen rekord, fortel han.
KASTA KULE: Ein av aktivitetane på idrettsdagen var kulekast. Her er Arvid Berntsen i aksjon.
KASTA KULE: Ein av aktivitetane på idrettsdagen var kulekast. Her er Arvid Berntsen i aksjon.
FAMILIEDUELL:  Terje Bårdsen og dottera Hege var blant mange som prøvde seg på 60-meteren.
FAMILIEDUELL: Terje Bårdsen og dottera Hege var blant mange som prøvde seg på 60-meteren.
FEKK PRØVA GOLF: Her får Tobias Berntsen opplering av den erfarne golfspelaren Kristin Berntsen Simonsen om korleis å holda og svinga golfkølla på riktig måte.
FEKK PRØVA GOLF: Her får Tobias Berntsen opplering av den erfarne golfspelaren Kristin Berntsen Simonsen om korleis å holda og svinga golfkølla på riktig måte.
EIN TO TRE HOPP: Amanda Gjøvåg Heggestad i svevet.
EIN TO TRE HOPP: Amanda Gjøvåg Heggestad i svevet.
GAV ALT: Thomas Frøkedal Kjerrgård sende kula langt avgårde.
GAV ALT: Thomas Frøkedal Kjerrgård sende kula langt avgårde.

Siste saker Gå til framsida

No lyser dei opp i mørket

– Viss eg ikkje har refleks kan bilane køyra på meg, forklarar Askild (5) frå Stjerneresio barnehage til «Tysnes».

Stor siger for ungdom

Bussbilletten blir ikkje 40 kroner dyrare likevel. Malene Kristine Meidell Alsaker gledar seg på vegner av ungdom i Hordaland.