FULL FART: Turen var på omlag ein time, og på den tida fekk ein sett mykje. Her er båten framme ved Marstein fyr. Fremst sit Reidar Fyllingen (t.v) og Hugne Furdal (t.h). Bak sit Brede Rusvold, Christine Larsen, Joachim Holmedal (sjåfør) og Kristoffer Hollås.
FULL FART: Turen var på omlag ein time, og på den tida fekk ein sett mykje. Her er båten framme ved Marstein fyr. Fremst sit Reidar Fyllingen (t.v) og Hugne Furdal (t.h). Bak sit Brede Rusvold, Christine Larsen, Joachim Holmedal (sjåfør) og Kristoffer Hollås.

Adrenalinfylt tur i fjorden

Bergen Searib sytte for fart og moro under Tysnesfest.
Publisert 17.07.2017 kl. 12.25.

– Eg forventar at det vert fartsfylt!

Hugne Furdal sit og ventar spent på å få vera med i den fyrste RIB-båtturen under Tysnesfest. Det er fyrste gongen Hugne skal på ein slik type båttur, og han gler seg til fart og spaning på sjøen. Mor Jorun Karin Furdal ser meir skeptisk ut.

– Eg er glad for at eg slepp vera med, ler ho.


Kledd for tur

Saman er dei på bubilferie, og har parkert bilen i Våge for å få med seg Tysnesfest.

– Me har kjøpt festivalpass, så me lyt prøva å få med oss mest mogleg av festivalen, smiler ho mot sonen, som nikkar einig før han går og kler seg for turen.

Etter å ha fått på seg flytedrakt, flytevest og briller, var han klar til ein tur i ein av dei to ribbåtane firmaet hadde med på festivalen. Ein båt med heile 700 hestekrefter.


Heilt til Marstein fyr

– Båtane her kan opphaveleg køyra i 70 knop, men me køyrer ikkje i meir enn omlag 50, fortel Joachim Holmedal frå Bergen Searib.

Kollega Kristoffer Hollås legg til at tryggleiken er eit av dei to hovudfokusa til den nyetablerte bedrifta, som vart starta opp i fjor.

– Det andre er sjølvsagt kundeopplevinga. Me ynskjer å gje kundane våre noko dei snakkar om i ettertid.

Og for å oppnå dette, var ruta for køyreturen nøye planlagt. Målet var Marstein fyr, som ligg i Austevoll kommune. På vegen vart det køyrd mellom holmar og trange skjær.

– Tanken er at dei som er med skal få oppleva alle elementa ved tur i ribbåt, både havrafting med hopp på bylgjer, og køyra mellom holmar og skjær, fortel Holmedal.


Kjend på strekninga

Og Hugne kunne etter turen skriva under på at opplevinga stod til forventningane.

– Det var svært kjekt! Det eg likte aller best var humpane då båten køyrde over bylgjene, sa han med eit breidt glis etter å ha kome i land att.

Ein annan som var godt nøgt med turen, var Reidar Fyllingen.

– Eg er godt kjend i området etter å ha jobba ombord på MS Eidfjord i 1971. Då gjekk båten i rute mellom Austevoll og Fitjar, to gonger i veka. Men dette var ei anna oppleving, det var litt heftigare, smilte han på land etter turen.


KLAR FOR TUR: Ein spent Hugne Furdal gler seg til å køyra i ribbåt for fyrste gong. - Eg forventar at det vert fartsfylt, smilte han før turen.
KLAR FOR TUR: Ein spent Hugne Furdal gler seg til å køyra i ribbåt for fyrste gong. - Eg forventar at det vert fartsfylt, smilte han før turen.
FLOTT DAG PÅ SJØEN: Vêret synte seg frå si beste side under den fyrste ribturen torsdag ettermiddag. Bergen Searib hadde fleire turar dagleg under festivalen.
FLOTT DAG PÅ SJØEN: Vêret synte seg frå si beste side under den fyrste ribturen torsdag ettermiddag. Bergen Searib hadde fleire turar dagleg under festivalen.

Siste saker Gå til framsida