KREVANDE JOBB: Anleggsleiar Johannes Soldal Måge i NCC er avhengig av spesialbilar for å få ordna vegen mellom Onarheim og Uggdal.
KREVANDE JOBB: Anleggsleiar Johannes Soldal Måge i NCC er avhengig av spesialbilar for å få ordna vegen mellom Onarheim og Uggdal.

Dårleg informasjon om vegstenginga mellom Onarheim og Uggdal

Måndag morgon starta arbeidet med å retta opp vegen etter utrasinga på Kløv. Fleire vart overraska og klagar på dårleg varsling.
Publisert 11.09.2017 kl. 11.42.

Vegen mellom Uggdal og Onarheim kjem til å bli stengd på dagtid fram til onsdag 20. september. Det har i lengre tid stått skilt om køyreforbod for lengre bilar, og før helga sette vegvesenet opp eit skilt i tillegg om stenging for alle bilar på dagtid. Lena Vermedal, som dagleg nyttar vegen til arbeid på Onarheim, meiner det er informert altfor dårleg om stenginga.

– Dette kom overraskande måndag morgon, og det er ikkje annonsert i lokalavisa. Det førte til at fleire måtte snu og køyra om Hodnanes for å koma til Onarheim. Me er jo glade for at arbeidet blir gjort, men dei burde ha informert betre om kor tid dei skulle stenga.

Byggjeleiar Vidar Tveiterås i Statens Vegvesen vedgår at informasjonen burde vore betre.

– Ja, i ettertid ser eg at me burde hatt annonse i lokalavisa Tysnes. Men me har informert Tide når det gjeld skuleskyss og dei som har ansvar for brann og redning i kommunen. Og dei nye, ekstra skilta om stenginga sette me opp i god tid før helga, seier byggjeleiaren.


700.000 kroner

Det er 45 meter av vegen som no skal få nytt betongrekkverk. Vidar Tveiterås seier det kjem til å kosta opp mot 700.000 kroner. Det er NCC som utfører arbeidet, same selskapet som har kontrakt på vedlikehaldet til vanleg. Johannes Soldal Måge er anleggsleiar for NCC.

– No først tek me bort asfalt i ein halv meters breidde ytst mot kanten. Så skal me støypa fast jernmatter frå utsida av vegkanten og nedover. Til det kjem betongsprøytebil frå Leikanger. Deretter borer me inn omlag 20 jernstag frå ytterkanten, under vegbana, og inn i fjellet på andre sida av vegbana. Neste veke kjem spesialbil frå Kristiansand som støyper rekkverket i profilbetong.


Ope kveld og natt

Den første veka er vegen stengd frå klokka 08.00 om morgonen til 18.30 på kvelden. Ved arbeidsstaden blir det berre tre meters køyrebreidde når vegen er open for trafikk, mot tre og ein halv meter til vanleg. Den siste veka er vegen stengd til klokka 20.00 måndagen og tysdagen. Byggjeleiaren utelukkar ikkje at arbeidet og stenginga kan ta lengre tid.

– Dette er eit svært spesielt arbeid, så det kan koma til å ta lengre tid, men me håper jo å vera ferdige til onsdag 20. september. Me planlegg også å gjera litt ekstra rekkverkarbeid lenger mot Onarheim når me først er i gang i området, seier Vidar Tveiterås.


STARTA MÅNDAG: Det første dei gjer er å fjerna ein halvmeter av asfalten ytterst mot skråninga.
STARTA MÅNDAG: Det første dei gjer er å fjerna ein halvmeter av asfalten ytterst mot skråninga.
UVITANDE: Medan me var på arbeidsstaden kom ein bilist og ville forbi. Han hadde ikkje fått med seg at det var stengt. Gravemaskinen vart køyrd til sides, og bilisten slapp forbi.
UVITANDE: Medan me var på arbeidsstaden kom ein bilist og ville forbi. Han hadde ikkje fått med seg at det var stengt. Gravemaskinen vart køyrd til sides, og bilisten slapp forbi.
BRATT OG FARLEG: Det gamle betongrekkverket rasa ned skråninga og blir liggjande der.
BRATT OG FARLEG: Det gamle betongrekkverket rasa ned skråninga og blir liggjande der.

Siste saker Gå til framsida

– Me leitar etter det skjulte potensialet i elevane

– We are the world, we are the children!Ungdommane syng av full hals frå scenen i musikkavdelinga ved Tysnes skule. Med blikket mot dei og ein gitar på kneet, står lærar Arne Kleppe og syng med. Tre veker er att til det tradisjonsrike juleshowet i Vonheim, og ideane som har mognast i haust byrjar å bli testa ut. – Me har ein del program og mange idear, men me er ikkje heilt...

No lyser dei opp i mørket

– Viss eg ikkje har refleks kan bilane køyra på meg, forklarar Askild (5) frå Stjerneresio barnehage til «Tysnes».