Neste år kjem dei til Vossajazz og kulturkyrkja

I helga imponerte HP Gundersen og amerikanske musikarar i kunstløa på Nesse. I påskehelga kjem dei att – til Vossajazz og kulturkyrkja.
Publisert 12.10.2017 kl. 13.00.

Over 40 personar hadde benka seg i underhuset i den fargerike løa på Nesse gard laurdag ettermiddag for å få med seg konserten med H.P. Gundersen og band. Blant tilhøyrarane i den tidlegare møkakjellaren var også den nyvalde leiaren i kulturkyrkja på Onarheim, Helge Olav Instøy.


Fantastisk

– Sjeldan har eg vore på konsert der eg ikkje har mislikt nokon av låtane. Dette var rett og slett ei fantastisk oppleving, fortel ein entusiastisk kulturkyrkjeleiar og nabo til kunstløa på Nesse.

Så imponert var han, at han allereie i pausen under konserten gjorde avtale med bandet om å koma tilbake til Tysnes.

– Resten av publikumet på Tysnes må også få sjansen til å oppleva desse musikarane. For dette var rett og slett ei flott oppleving, seier Instøy.

Det var ikkje berre dei countryprega låtane som imponerte Instøy. Men også stemma til den kvinnelege vokalisten, den passelege høgda på musikken og ramma rundt.

– Eg var nok ikkje åleine med denne oppfatninga, for det var ikkje eit knyst frå publikum under den to timar lange konserten, seier Instøy.

Fyrst spelte dei i kring ein time, så var det pause, og så spelte dei ein times tid til.


Ei overrasking

I ein annonse i «Tysnes» sist veke inviterte Nesse Gard alle interesserte til å koma på konserten. Roald Nesse hadde avtalt med Hans Petter Gundersen og hans faste norske band, også kalla H.P. Gundersen, at dei skulle opptre i løa denne laurdagen.

– Då laurdagen kom, var det ikkje det faste bandet som dukka opp, men HP og to amerikanske musikarar som har turnert med HP i tre veker i Oslo og Bergen med ulike konsertar. Maesa Pullman og venen hennar Jason Hiller frå Los Angeles har gitt ut ei rekkje plater og CD-ar og turnert verda rundt, fortel ein oppglødd og overraska Roald Nesse.

Sjølv hadde Nesse høyrt Maesa eit par gonger tidlegare, i Bergen.

– Eg visste at ho hadde ei fantastisk stemme, seier han.


Amerikana

Nesse karakteriserer stemninga i løa som himmelsk.

– Ja, det var utruleg flott, ikkje berre stemninga, men og musikken som blir kalla autentisk etnisk amerikana, forklarar arrangør Roald, og legg til at det var heilt spesielt for musikarane også, å koma til ein liten plass på Tysnes og spela i ei løe, tett på publikum.

Dei fleste som hadde teke turen til Nesse var vener og nære bygdefolk, og ikkje minst familiemedlemer.

For etter at den offisielle konserten var over, heldt markeringa fram med ei meir «hemmeleg» feiring, av Else Karin Nesse sin 60-års dag.


IMPONERTE: H.P. Gundersen og dei to amerikanske musikarane Maesa Pullman og Jason Hiller. (Foto: Robyn Lee)
IMPONERTE: H.P. Gundersen og dei to amerikanske musikarane Maesa Pullman og Jason Hiller. (Foto: Robyn Lee)
FULL KONSENTRASJON: Hans Petter Gundersen i løa på Nesse, der han har opptredd fleire gonger tidlegare, og der han også har vanka som ferieturist i «alle år». (Foto: Robyn Lee)
FULL KONSENTRASJON: Hans Petter Gundersen i løa på Nesse, der han har opptredd fleire gonger tidlegare, og der han også har vanka som ferieturist i «alle år». (Foto: Robyn Lee)

Siste saker Gå til framsida

Vann skulepris frå Leger uten grenser

Ingeborg Eide, Malin Nerhus og Madelene Hauge frå Hatlestrand oppvekstsenter blei fylkesvinnarar ved å synleggjera den gløymde krisa om at titusenar av kvinner døyr av utrygg abort.

Lesarbrev: Til søknad om oppdrettsanlegg ved Toneset, Vernøy

I bladet Tysnes den 30.11.17 skreiv Ingunn Gjærde ei sak om tareproduksjon i RexStar sine lokale på Reksteren. Her opplyser Harald Sveier frå Lerøy Vest AS at Lerøy ønskjer å starta med taredyrking i sjø i Tysnes. Blant lokalbefolkninga blei det i sommar protestar mot planane på Toneset på Reksteren, sjølv om kommunen var positiv. Søknaden er framleis under behandling. Vidare opplyser Sveier...

Får 15.000 til oppsetjing av Hegglandshusa

Olav og Hilde Mary Laukhamar får 15.000 kroner i kommunal støtte til oppsetjing av dei gamle Hegglandshusa på Laukhamar. Det vedtok formannskapet samrøystes tysdag.Olav og Hilde Mary Laukhamar har i tillegg søkt Hordaland fylkeskommune om 100.000 kroner i tilskot til verna kulturminne. Nytt i år er at slike søknader til fylkeskommunen skal prioriterast av kommunen. Dette er den einaste...