I DEI FINSKE SKOGAR: Søndag klinte Epland til med ei ny topplassering. Denne gongen i Finland. (Foto: Nils Hetleflåt)
I DEI FINSKE SKOGAR: Søndag klinte Epland til med ei ny topplassering. Denne gongen i Finland. (Foto: Nils Hetleflåt)

Pernilla matchar seg internasjonalt: 2. plass i Finland

I snø og slaps i Pajulahti kom Pernilla Eugenie Epland i mål 20 sekund bak vinnaren.
Publisert 29.10.2017 kl. 17.38. Oppdatert 30.10.2017 kl. 09.49.

– Eg sprang i lag med ho som vann ei stund, men ho hadde eit ekstra gir på slutten, seier Epland, som er fornøgd med gjennomføringa av løpet.

Som einaste norske utøvar på startstreken tok tysneskvinna ein finfin 2. plass.

I det finske terrengløpet på 6,5 kilometer, brukte Epland 24 minutt og 15 sekund.

I eliteklassen for kvinner stilte seks kvinner til start.

Med det blei ho slått av finske Camilla Richardson med 20 sekund. Richardson har blant anna delteke i VM i friidrett i London tidlegare i år.

– Me reiser til Finland for å få litt internasjonal erfaring. Her får Pernilla møta konkurrentar ho ikkje kjenner til vanleg, seier Nils Hetleflåt.

Trenaren frå Stord Idrettslag Friidrett var med den spreke tysnesingen til Finland.


Vanskelege forhold

I Pajulahti utanfor Lahti, sør i Finland, blei det tøffe rundar i terrenget for Epland.

– Det er litt vinterlege forhold her borte. For eit par dagar sidan kom det snø. I dag var det to varmegrader, og det er litt sludd i lufta, fortel Hetleflåt søndag, på veg tilbake til flyplassen etter løpet.

Ein kan ikkje gjera så mykje med forholda, men han er overbevist om at Epland fekk ei god erfaring denne søndagen.

– Det var jo sjølvsagt litt annleis enn det eg er van med, seier Epland.

Vêrforholda gjorde at ho kjente det godt i beina på sisterunden.

– Eg trur det er viktig å møta forskjellige løparar frå andre land, seier Epland.

Ho trur det er ein av måtane å bli betre på, og utvikla seg som løpar.

Sjølv om ho framleis satsar på baneløp, er det veldig greitt å få utvida sesongen om hausten, med blant anna terrengløp.


Haustsesong

Hetleflåt er oppteken av å gi Epland ein god haustsesong. I NM i terrengløp for to veker sidan, sprang ho inn til ein 4. plass. Førre helg stakk ho av med sigeren i Djupadalten i Haugesund, og laurdag 11. november går turen til Danmark.

Då er det nordisk meisterskap i terrengløp som står for tur. Der får ho verkeleg prøvd seg mot tøffe motstandarar.

Etter det avsluttar ho sesongen med eit gateløp i Kopervik på Karmøy.

Men litt godt skal det bli å få ein pause frå alle konkurransane, innrømmer tysnesingen.

– Det blir mykje reising, og det krev litt å konkurrera. Etter sesongen skal det bli godt å tenkja på litt andre ting ei stund, seier Epland.


Siste saker Gå til framsida

Pernilla sette ny pers

Fredag sprang Pernilla Eugenie Epland 3000 meter på Tyrvinglekene på Nadderud. Tida 9,30,84 gav ho 4. plass, og ei forbetring av den personlege rekorden hennar med 2,5 sekund.– Løpet var greitt, det var mykje vind på Nadderud, men eg fekk meg ei «klynge» å springa i, fortel Pernilla til «Tysnes». Etter kvart gjekk det litt seint, og ho ville forbi. Då måtte ho nesten ut i bane 3...

Fire Hordfast-alternativ på anbod

Måndag lyste Statens vegvesen ut anbod for planlegging av ny bru på E39 over Bjørnafjorden. To selskap skal få jobben med å parallelt sjå på fire alternativ for ei ny flytebru. Alternativa er: 1. Flytebru i boge, berre forankra på land på begge sider. 2. Flytebru i boge forankra på begge sider, men med forankringar som kan aktiverast ved katastrofe. 3. Rettlina flytebru...