TYSNESING: Ingelin Røssland er opphaveleg frå Tysnes og har mellom anna jobba som journalist  i Bladet Tysnes. (Foto: Joar E.M. Klette)
TYSNESING: Ingelin Røssland er opphaveleg frå Tysnes og har mellom anna jobba som journalist i Bladet Tysnes. (Foto: Joar E.M. Klette)

Gjev ut skrekkroman om du som ser på at andre mobbar

– Det er lett å snu seg vekk. Det kan nok mange av oss kjenna seg att i, meiner Ingelin Røssland.
Publisert 05.11.2017 kl. 10.00. Oppdatert kl. 10.33.

Tysnesingen gav ut ungdomsboka Hevner på Mangschou Forlag sist veke.

– I Hevner er det Ella som snur ryggen til, når ho ser kjærasten mobbar andre. På den måten set ho historia i gong. Ein hevnar der ute vil ta dei som mobbar, og dei som ser på, seier Røssland, som opphavleg er utdanna journalist og mellom anna har jobba i Bladet Tysnes.


Lettlest bok

Handlinga i boka er lagt rundt Halloween.

– Det er ein skrekksjanger, som vil seia at hovudpersonen må gjera ein dødsynd, og på den måten inviterer monsteret inn. I dette tilfellet er det Ella, som får sjå kva som skjer når ho let vera å gjera noko med mobbinga, forklarar Røssland.

Boka er ein del av Skum-ringserien, som er lettleste spenningsbøker for ungdom.

– Den er spesielt for dei som synest det er vanskeleg å lesa, forklarar forfattaren.


Hadde ikkje lyst

– Korleis kom du på å skriva boka?

– Det var forlaget som spurde meg. Eg hadde eigentleg ikkje lyst, så det var litt som å skriva ein stil eg ikkje hadde lyst å skriva. Men slik er det av og til, og det kan jo bli bra likevel. I bokmeldinga i Bergens Tidende fekk eg til dømes fem av seks hjarte.

Boka er ifølgje forfattaren lett og tydeleg. Den er lett å analysera, og er tilpassa til bruk i skulen.

– Hevner har mykje action og spaning, og eit tydeleg tema. Sitatet «Du må ikke tåle så inderleg vel, den urett som ikke rammer deg selv!» frå det kjende diktet Du må ikke sove av Arnulf Øverland, er mellom anna sitert i boka.

– Korleis var det å skriva om mobbing?

– Eg har alltid vore oppteken av gråsoner. Det handlar om dei små tinga me gjer. Det er utruleg lett å gjera feil, og snu seg vekk. Eg har gjort det sjølv. Det skammar eg meg over, og derfor skriv eg om det. Det er dei færraste av oss som er englar heile tida.

– Det er spanande å skriva om den som står i utkanten og ser på, fortel ho.


Inspirert av Tysnes

Røssland debuterte med ungdomsromanen Viss du vil i 1998, sidan er det blitt 15 bøker til. For si fjerde bok, Handgranateple (2006), blei Røssland tildelt både Sunnmørsprisen og UPrisen. I 2007 mottok Røssland Sigmund Skard-stipendet og Guro Sandsdalens litteraturpris, og i 2011 blei ho tildelt Falturiltuprisen.

Som inspirasjon til skrivinga brukar ho ofte Tysnes.

– Eg skriv nesten alltid om eit tysneslandskap, sjølv om ikkje bur der lenger. Den eine vaksenromanen eg skriv på no, handlar heilt spesifikt om Tysnes, forklarar ho.


Bur i Sverige

Ho vonar boka kjem ut neste år, same år som markeringa av at det er hundre år sidan Tysnes-forfattar Johannes Heggland blei fødd. Litt for å hylla arbeidet hans, sidan han var mykje inspirert av Tysnes si historie når han skreiv.

– Det er ein historisk roman frå Tysnes. Det er på mange måtar noko eg har hatt lyst å skriva lenge. Eg får god hjelp av Knut Rage, som kanskje er den på Tysnes som veit mest om kva eg skriv om. Han er konsulenthjelp når det gjeld den historiske biten, seier ho.

Røssland bur på Lidingö utanfor Stockholm, og er heime på Tysnes ein til to gongar i året.

– Det eg gjer mest er å skriva bøker, men eg likar å gå tur og jogga. Dessutan er eg redaktør for nettsida til fagorganisasjonen norske barne- og ungdomsforfattarar. Det er kjekt å halda på med, seier ho.


Siste saker Gå til framsida

Forventar ein kjekk konsert

– Julekonserten er ein årleg tradisjon. Onarheim Musikklag har hatt den så lenge eg har spelt med dei, for å seia det sånn, fortel Magne Storesætre.