NORGESNYHEIT: Eirik Kalve (t.h.) presenterte bedrifta si framfor reiselivsnæringa i Sunnhordland. Ordførar Kåre Martin Kleppe (H) likte det han høyrte.
NORGESNYHEIT: Eirik Kalve (t.h.) presenterte bedrifta si framfor reiselivsnæringa i Sunnhordland. Ordførar Kåre Martin Kleppe (H) likte det han høyrte.

Eirik fekk ikkje overnatting på Tysnesfest - no lanserer han løysinga

Austevolling og gründer Eirik Kalve har sagt opp jobben. No satsar han alt på mobile overnattingar i podtell.
Publisert 09.11.2017 kl. 06.00. Oppdatert kl. 13.11.

– Det var her på Tysnes det starta. Eg skulle på Tysnesfest i 2016, fortel Kalve.

Men gutteturen blei ikkje slik han håpte. Billettar til festivalen hadde han i boks, men Kalve fekk ikkje overnatting.

– I staden blei det ein ekstra dag med svigermor på hytta, fortel Kalve til 60 personar frå reselivsnæringa i Sunnhordland.

Dei ler godt. Det er ei norgesnyheit som blir presentert på Samarbeidsrådet for Sunnhordland si reiselivssamling på Mandelhuset denne onsdag føremiddagen.


Nyheit i Norge

Ein kan like godt læra seg namnet no. Podtell. Med bedrifta PodTown ønskjer austevollingen Eirik Kalve å hjelpa arrangørar, reiseliv og bedrifter som har for liten overnattingskapasitet.

Firebarnsfaren ønskjer å styra bedrifta frå Austevoll.

Dei mobile overnattingspoddane hans kan flyttast rundt. Dei er designa for å kunna fraktast som ein stor container.

I dei mobile podane skal det vera sengeplassar, toalett, dusj, aircondition og flatskjerm.

Idéen fekk han etter at gutteturen til Tysnesfest ikkje blei noko av. På ei yatzyblokk på hytta, teikna han skissa til det som skal bli den første mobile overnattingspoden.

– Dei 20 første er bestilte, og me satsar på oppstart i juni, forklarer Kalve.

I Japan skal overnatting i pod ha vore utbreidd i 15 år. Austevollingen har sikra seg eineretten til PodTown i Norge og Skandinavia.


I produksjon

Ein dobbel pod, med plass til to personar, vil i utganspunktet ha ein pris på 999 kroner per overnatting.

Produktet er allereie i produksjon, og om nokre veker kan ein pod bli å sjå ein stad i Sunnhordland, lokkar Kalve.

– Den første kjem til Norge neste veke, seier ein spent gründer.

Allereie har han fått positive tilbakemeldingar frå bedrifter og festivalar. På treffet på Tysnes håpar han å skapa nye kontaktar i reiselivet.


For festivalar

Gründeren ønskjer at festivalar og arrangement skal kunna bestilla ein heil podtown, med fleire hundre overnattingsplassar.

– Me jobbar for å få dette til under Tysnesfest, seier festivalsjef for Tysnesfest, Sigvard Madsen.

Om alt går etter planen kan kanskje over 300 gjester på Tysnesfest bu i mobile poddar neste sommar.

– Det er gøy at det finst folk som tør å satsa på slike ting, legg festivalsjefen til.


Mandelhuset som møtestad

Samarbeidsrådet i Sunnhordland arrangerer samlingar for reiselivet i regionen éin til to gonger i året.

– Me prøver å reisa rundt i dei ulike kommunane, seier Linn Therese Vinje.

Ho er reiselivsansvarleg i Samarbeidsrådet for Sunnhordland, og kunne denne gongen ønskja velkomen til Mandelhuset på Tysnes.

Ei rekkje ulike føredrag stod på programmet, blant anna la Gro J. Gjerde fram prosjektet med å få eigen geopark i Sunnhordland. I tillegg hadde Austevoll Næringsråd workshop i merkevarebygging. Etter programmet på Mandelhuset, var det felles middag på Haaheim Gaard om kvelden.


Samarbeidsarena

– Det er viktig at deltakarane kan bli kjente med kvarandre. Det oppstår ofte gode samarbeid på desse treffa, seier Vinje.

Samarbeidsrådet ønskjer å vera med på å skapa gode møteplassar for aktørane i reiselivet.

– Det er ikkje så mange arenaar dei kan treffast på tvers av bransjanse, forklarer reiselivsansvarleg Linn Therese Vinje.

Ordførar Kåre Martin Kleppe (H) var svært fornøgd med å få besøk av så mange frå reiselivsbransjen i Sunnhordland.

– Det er gøy å invitera til Tysnes, seier Kleppe.

Han håpar at andre gjerne kan bli inspirerte av å høyra på Patrick Madsen, og satsinga som har blitt gjort på Mandelhuset.


POD: Slik ser ein pod ut, som har plass til seks personar og bad. (Illustrasjon: PodTown/Eirik Kalve)
POD: Slik ser ein pod ut, som har plass til seks personar og bad. (Illustrasjon: PodTown/Eirik Kalve)
APPLAUDERER: Bente Nesheim Johansen og Ole Johansen frå Skjersvik Gjestehus i Etne synest det er kjempekjekt å vera på samlinga. Her kan ein knyta kontaktar og få gode input frå andre.
APPLAUDERER: Bente Nesheim Johansen og Ole Johansen frå Skjersvik Gjestehus i Etne synest det er kjempekjekt å vera på samlinga. Her kan ein knyta kontaktar og få gode input frå andre.
VERT: Patrick Madsen fortalde om korleis Mandelhuset har utvikla seg frå oppstarten fram til i dag.
VERT: Patrick Madsen fortalde om korleis Mandelhuset har utvikla seg frå oppstarten fram til i dag.
MANDELHUSET: 60 personar var samla frå reiselivsnæringa i Sunnhordland.
MANDELHUSET: 60 personar var samla frå reiselivsnæringa i Sunnhordland.
GEOPARK: Samarbeidsrådet og Gro J. Gjerde ønskjer å senda inn søknad om å få statusen geopark.
GEOPARK: Samarbeidsrådet og Gro J. Gjerde ønskjer å senda inn søknad om å få statusen geopark.

Siste saker Gå til framsida

Fekk vera med besto i skianlegget

Rakel (4 1/2) og den eldre broren Markus (6 1/2) fekk ei flott skioppleving i lag med bestemor Åse Enes i skianlegget ved Løkjen laurdag.

Leiar: Ros for godt eldretilbod

I «Tysnes» denne veka kan me lesa om songgruppa Fjordablæst som underheldt på det nye omsorgssenteret førre laurdag.Tilbodet vart svært populært både blant dei som bur der og besøkjande.Det var songgruppa sjølve som tok initiativ til å underhalda på det nye omsorgssenteret. – Me hadde lyst til dette, fortel Jan Belt til avisa. Det var Belt som hadde ansvaret for...

Endeleg sjåførskule på Tysnes

Terje Grahl har drive sjåfør-skule i Bergen i mange år. No bur han på Reksteren og har starta sjåføropplæring også på Tysnes. Interessa har han merka.