"PLOMMER": Steikjane god plomme. (Teikning: Kolbjørn Tvedt)
"PLOMMER": Steikjane god plomme. (Teikning: Kolbjørn Tvedt)

DIKT: Forboden frukt

Publisert 11.11.2017 kl. 16.00. Oppdatert kl. 17.41.

Eg såg henne fyrst på skuleveg

ho hang over gjerdet og blenkte mot meg

eg tenkte med ein gong at deg vil eg ha

men å stela, eg visste det var ikkje bra


Så eg slo det i frå meg ei lita stund

men kvelden kom snart og månen var rund

og medan dagslys gjer viljen så steil og hard

vart eg i måneskin så underleg mjuk og rar


Så der stod eg, og der hang du

og enno var det ikkje for seint å snu

men du drog og lokka og gav ikkje fred

og brått var det hendt, eg hadde plukka deg ned


Eg løfta deg opp til munnen min

og fekk kjenna ditt vakre og mjuke skinn

og smaken av deg var himmelsk og søt

eg stod der og nytte ditt saftige kjøt


Men kor lenge var adam i paradis

og kvelden berre ein haustmild bris

ikkje lenge, for no vart det storm

og den var ikkje liten, nei heilt enorm


For han som eigde plommene

stod bakom ei nov på vakt

og byksa no fram ilter og harm

klar til plommetjuvjakt


Eg spytta plomma i graset

og sprang så fort det bar

og persa nok sekstimeteren

for aldri har eg vore så snar


Men bak meg høyrde eg hatske ord

for han visste godt kven eg var

eg skulle få svi han skulle varsla

både mi mor og min far


Det var vel bakom hopeløa

at eg fekk pusten att

eg stod der og svetta og kavde

og frykta ei søvnlaus natt


Eg smaug meg stillt opp på rommet

då eg endeleg var komen meg heim

og kraup langt inn under dyna

så ingen fekk høyra at eg grein


Dagane etter var eg stille

og gløtta av og til bort på mi mor

men ho stod der og smilte som alltid

og det gjorde til og med storebror


Eg gjekk i spenning i lange tider

med eit vont sting i hjarta mitt

og hadde vel lært ei lekse

om skilnad på mitt og ditt


Men det kom aldri noko varsling

og minnene bleikna litt bort

og eg tok fatt igjen på livet

og tenkte at gjort er gjort


Og om han har prega meg denne kvelden

har nok sjela mi no fått ro

men når sant skal seiast, og det skal det

var den plomma steikjande god


Siste saker Gå til framsida

No lyser dei opp i mørket

– Viss eg ikkje har refleks kan bilane køyra på meg, forklarar Askild (5) frå Stjerneresio barnehage til «Tysnes».

Stor siger for ungdom

Bussbilletten blir ikkje 40 kroner dyrare likevel. Malene Kristine Meidell Alsaker gledar seg på vegner av ungdom i Hordaland.