Debuterte på landslaget – fekk sølv
– Torsdag kveld ringde trenaren min og sa det var kome i gang prosessar for at eg skulle få springa for landslaget. Då tenkte eg «oi, er det sant?», smiler Pernilla til lokalavisa denne veka.
Terrengløpet Cross Nationals, som også er nordisk meisterskap, gjekk av stabelen i Middelfart i Danmark på laurdag. Her fekk Pernilla, som opphaveleg var påmeld som klubbløpar, den store gleda av å ta sølv i lag med dei andre norske jentene Maria Wågan og Karoline Holsen Kyte.
Tøff løype
Med tida 30.17 blei tysnesjenta nummer elleve i løpet, og nummer ni i nordisk. Pernilla nådde målstreken eitt minutt og 38 sekund bak vinnaren Sara Christiansson frå Sverige.
Det var fint vêr då damene skulle gjennom den 7,5 kilometer lange, svingete og teknisk krevjande løypa, men underlaget var av den blaute sorten.
– For meg som helst føretrekker å springa i flatare terreng, vart dette veldig tungt. Det var mykje opp og ned, sikk-sakk og veldig gjørmete, fortel ho.
Men det mangla likevel ikkje på motivasjon hos den spreke tysnesjenta.
– Dette var jo ein lagkonkurranse, og då kjenner du sjølvsagt på at du må kjempa for dei andre og prestera.
Ho oppsummerer laurdagen slik:
– Ei kjempeoppleving!
Gateløp på Karmøy
No står det berre att eit gateløp i Kopervik fyrstkomande laurdag før Pernilla seier seg ferdig med konkurreringa for i år. Det er fyrste gong ho deltek i dette løpet.
– Eg skal springa ein distanse på ti kilometer, og me er ein stor gjeng frå klubben (Stord Friidrett, journ.mrk) som reiser. Det blir ei fin avslutning på sesongen, seier den målbevisste jenta, som sjølvsagt håpar på å setja ny pers.
– Men no byrjar eg å kjenna på at denne sesongen har vara lenge, og det skal bli godt med nokre rolege veker, vedgår ho.
For tida er ho i gang med å skriva ei bacheloroppgåve, noko som også krev sitt av energi og sjølvdisiplin. Om ikkje lenge er ho nemleg ferdig utdanna barnehagelærar – eit yrke der god kondis heilt sikkert kjem godt med!
Gjer seg ikkje med det fyrste
Snart tek altså Pernilla ein pause frå springinga, men det er likevel ikkje snakk om mange vekene før ho må byrja å leggja opp grunnforma for neste sesong.
– Eg er veldig motivert for å halda fram med dette, smiler ho.
– Kva har vore høgdepunktet for deg i år?
– Det var nok då eg tok sølv i halvmaraton-NM i Oslo i september, seier ho.
Trenar Nils Hetleflåt kjem med fylgjande kommentar når me spør han om å oppsummera sesongen:
– 2017 har vore ein stor opptur for Pernilla, med ei kurve som heilt klart har peika oppover. Og dette er berre starten!
