HØGT OG LÅGT: 12. juli til neste år skal Bigbang rocka både på Tysnessåta og på Gjerstad. (Foto: Jonathan Vivaas Kiese)
HØGT OG LÅGT: 12. juli til neste år skal Bigbang rocka både på Tysnessåta og på Gjerstad. (Foto: Jonathan Vivaas Kiese)

Bigbang til Tysnessåta!

For kva passar vel betre på ein såtekonsert enn hiten «To The Mountains»?
Publisert 20.11.2017 kl. 19.23. Oppdatert 21.11.2017 kl. 11.05.

– Me gler oss enormt til å ta imot Bigbang 753 meter over havet, melder dagleg leiar i Tysnesfest Øystein Vaage måndag kveld.

Festivalleiinga kan også røpa at både Gåte og Adam Douglas er booka til den 12. utgåva av Tysnesfest.


Eksklusive konsertar

12. juli 2018 er det altså Øystein Greni og bandet hans som skal underhalda på toppen av Tysnes, og dei vert også å sjå på Gjerstad om kvelden. Ifølgje Tysnesfest vert dette eit av få høve til å sjå og høyra Bigbang «live» til neste år.

Bandet starta opp i 1992 med debutalbumet «Waxed», og er kanskje mest kjende for låta «Girl in Oslo». Men også «Wild Bird», «Long Distance Man» og «To the Mountains» er eksempel på klassikarar som det norske folk har trykt til brystet sitt.

– For mange er Bigbang sjølve symbolet på norsk rock, og dei leverer alltid 100 % på scenen, lovar Vaage.


Tilbake for fullt

Tysnesfest er også glade for å kunna presentera Gåte til festivalen neste år.

– Det er no 12 år sidan Gåte «gav seg», men no er dei tilbake i full vigør, fortel Vaage.

Gåte blei starta av søskenparet Sveinung og Gunnhild Sundli i 1999. Kombinasjonen av norsk folkemusikk med eksplosiv og progressiv rock gjorde at folk raskt fekk opp augo for dei. Spesielt stor suksess gjorde dei i tidsrommet 2001-2006, då dei selde meir enn 100.000 album, toppa VG-lista, og blei tildelt fleire gjeve prisar, deriblant Spelemann- og Prøysenprisen.

Syskenparet har ei solid forankring i folkemusikken, og det er difor naturleg for dei å fortsetja å byggja musikken rundt gammalt tradisjonsmateriale.


Stjernekamp-vinnar

Over ein million sjåarar sat benka framføre TV-skjermen då Adam Douglas vann finalen i Stjernekamp for nokre veker sidan.

– Då skjønar de kanskje godt kvifor me har booka han til Tysnesfest, er Vaage sin kommentar.

Eit sjeldan særpreg kjenneteiknar Douglas sin musikk og fantastiske stemmeprakt, der ein raskt får assosiasjonar til dei ekte soul- og bluesrøtene i heimlandet hans USA. Norskamerikanaren har budd i Norge i kring ti år, og han har spelt flittig på klubbar, kulturhus og festivalar. Men med suksessen i Stjernekamp, har han nådd ut til eit breiare publikum, og til neste år vert det full gass med mange konsertar og festivaljobbar.

– Han går på scenen på Gjerstad med fullt band og lovar eit knallshow med mykje «trøkk», avsluttar Vaage.


TIL GJERSTAD: Gåte er eit norsk band som speler ei blanding av folkemusikk og rock. (Foto: Ole Ekker)
TIL GJERSTAD: Gåte er eit norsk band som speler ei blanding av folkemusikk og rock. (Foto: Ole Ekker)
FULLE AVTALEBØKER: Adam Douglas vart for alvor kjent for det norske folk etter sigeren i NRK-programmet Stjernekamp i haust.  (Foto: Jens A. Storaker)
FULLE AVTALEBØKER: Adam Douglas vart for alvor kjent for det norske folk etter sigeren i NRK-programmet Stjernekamp i haust. (Foto: Jens A. Storaker)

Siste saker Gå til framsida