I GODT SELSKAP: Marita Fagerbakk Lunde (t.v.) og Maren Jensen Nes, her saman med isbjørnmaskoten, var svært godt fornøgde med handballturen.
I GODT SELSKAP: Marita Fagerbakk Lunde (t.v.) og Maren Jensen Nes, her saman med isbjørnmaskoten, var svært godt fornøgde med handballturen.

Stort å møta handballheltane

50 handballjenter og -gutar frå Tysnes vart inspirerte av å oppleva kvinnelandslaget i Sotra Arena.
Publisert 27.11.2017 kl. 18.00. Oppdatert 28.11.2017 kl. 09.52.

Ivrige handballspelarar frå Tysnes var laurdag mellom dei nær 4.000 tilskodarane i Sotra Arena. Dei betalte 375 kroner kvar for både reisa og to landskampar.

Først ut var landslaga frå Sør-Korea og Russland. Men det som lokka tysnesingane til Sotra denne dagen, var først og framst å oppleva dei norske handballjentene. Camilla Herrem, Nora Mørk, Katrine Lunde, Heidi Løke – jenter dei kan namna på, men før laurdag berre hadde sett på TV.

– Det er kjempekjekt å vera her i hallen, og eg gler meg til dei norske skal spela. Eg trur nok at me vil læra meir handball i dag, seier Anni Elise T. Dalland, der ho sit saman med lagvenninner og mange andre tysnesingar. Laget hennar, jenter 14, har tidlegare på dagen spela kamp i Bøneshallen mot Bønes.

– Den kampen vann me med eitt mål meir enn dei, så det var jo ein god start på handballdagen, seier lagvenninnene Malene Skår Hagen, Sarah Folgerø og Petra Sløgedal. Også jenter 11 og jenter 15 er med på turen til Sotra Arena. Gutane på 12-årslaget er her også, i tillegg til damelaget.


Handballdansen

Når det er time-out og stans i spelet, oppmodar speakaren publikum til å reisa seg og bli med på handballdansen. På storskjermane kan dei då sjå korleis dansen skal utførast, og dei aller fleste reiser seg, klappar i hendene og svingar med armane i takt med den friske musikken. I det heile er det stor stemning i Sotra Arena, eit anlegg som handballandslagsspelarane sjølve likar svært godt. Wenche Fagerbakk er oppmann – eller oppkvinne, som ho seier, i Tysnes. Ho sit også på tribunen.

– Dette er veldig kjekt. Og både på ferja, i bussen og her i Sotra Arena er det så bra at spelarane kjem saman på tvers av laga dei spelar på.

I april, helga etter påske, kjem herrelandslaget til Sotra for å spela Gjensidige-cup mot Frankrike, Sverige og Island. Då blir det ny sjanse for lokale handballspelarar til å oppleva topphandball.


Norge

Dei unge tysnesingane ser at Russland vinn mot Sør-Korea, men det er når dei norske jentene kjem ut på banen at dei verkeleg konsentrerer seg om det som skjer på banen. Ungarn tek leiinga, og etter kort tid ligg Norge fire mål under. Sviktar heltane i dag? Nei, dei skjerpar seg og tek innpå og vinn til slutt. Stor stemning i hallen, og svært mange av dei unge handballspelarane søkjer mot reklameplakatane rundt banen for å sikra seg autografar og helst ein «sjølvi» med ei av dei norske handballspelarane. Tysnesingane må rett i bussen for å nå ferja, men Anni Elise T. Dalland er svært godt fornøgd likevel.

– Eg synest alle dei norske var flinke, eg.

– Lærte du noko av å sjå dei i levande live?

– Ja, dei hadde masse fart i spelet når dei var i angrep. Dei er så raske. Det må me og prøva å få til, så me bør jo trena meir på det, seier ho som sjølv spelar midtback på jenter 14-laget.


Suksess

Møbelringen Cup vart suksess for Norge, som søndag spela uavgjort mot Russland, men vann turneringa på betre målskilnad.

Helga Pettersen er ein av trenarane til jenter 14-laget. Ho sit heilt øvst på tribunen og smiler saman med Birgit Jensen Nes, som også trenar jentene.

– Dette er ei stor oppleving for oss alle. Det er absolutt verd pengane. Eg trur faktisk at jentene og gutane lærer ein del av å sjå landslaget i levande live, seier Helga.

– Ja, sjølv seier dei at de må øva meir på større tempo i angrep.

– Det kan dei nok ha rett i, så me får prøva på det. Då dei vann sjølve tidlegare i dag, spela dei svært bra i forsvar, men kan nok bli betre med større fart i angrepet.

– I april kjem herelandslaget til Sotra Arena for å spela landskampar. Er det akuelt med ny tur då?

– Det blir det vel opp til styret å ta stilling til, men eg er ikkje i tvil om at det vil vera stor interesse for også å oppleva herrelaget, seier ei oppglødd Helga Pettersen.


INSPIRERTE: 12-åringane Tobias Dalen (f.v.), Jonas Hagen Lunde og Brede Kleppe Røssland tok seg tid til å snu seg bort frå kampen nokon sekund.
INSPIRERTE: 12-åringane Tobias Dalen (f.v.), Jonas Hagen Lunde og Brede Kleppe Røssland tok seg tid til å snu seg bort frå kampen nokon sekund.
HANDBALLDANSEN: Medan handballstjernene hadde time-out, dansa publikum handballdansen. F.v. Malene Skår Hagen, Sarah Folgerø, Anni Elise T. Dalland og Petra Sløgedal.
HANDBALLDANSEN: Medan handballstjernene hadde time-out, dansa publikum handballdansen. F.v. Malene Skår Hagen, Sarah Folgerø, Anni Elise T. Dalland og Petra Sløgedal.
STOR STEMNING: Her er dei fleste av tysnesingane samla på tribunen då Norge spela mot Ungarn.
STOR STEMNING: Her er dei fleste av tysnesingane samla på tribunen då Norge spela mot Ungarn.
TRENARANE: Omlag midt i biletet sit Helga Pettersen, t.v. og Birgit Jensen Nes på bakerste benk.
TRENARANE: Omlag midt i biletet sit Helga Pettersen, t.v. og Birgit Jensen Nes på bakerste benk.

Siste saker Gå til framsida

Markerer TV-aksjonen med fredagskafé

Tysnes skule gjentek suksessen frå i fjor og markerer også i år TV-aksjonen med fredagskafé fredag føremiddag. I fjor var det tett i tett med folk og trangt om plassen i den gamle gymsalen på skulen. I år vert arrangementet flytta til Tysneshallen. – Der blir det kafé og underhaldning for alle som ynskjer å koma, melder inspektør Synnøve Vines til avisa.

Skal arrangera opplæringsjakt på Tysnes

Tysnes Jakt- og Fiskelag skal til helga arrangera opplæringsjakt.– Me er så heldige at me har fått tak i opplæringsterreng her på øya, og me er også så heldige at me skal arrangera opplæringsjakt i regi av Norges Jeger- og Fiskerforbund, fortel leiar i Tysnes Jakt- og Fiskelag, Bjarte Erstad.Fredag kveld er sett av til informasjon. Sjølve jakta vil føregå laurdag og søndag. Det...