Badevettregel nr. 1: Lær å svømme

Det er viktig for alle born å oppleve tryggleik i vatn og å lære seg å symje. Det å ha eit basseng med godt og jamleg badetilbod, kan vere livsviktig vasstrening. Jo meir opplæring eit barn har, desto større er sjansen til å ha det moro i vatnet og dei blir tryggare og flinkare. Dei blir rett og slett i stand til å redde seg sjølv i vatnet.

Tal frå Norsk folkehjelp viser at i dei ti siste åra, har 40 born, alle under 14 år, drukna i Norge, nokon av dei kunne ikkje symje. I dag er berre halvparten av alle tiåringane i landet symjedyktige. Norge ligg langt bak andre nordiske land, som Sverige og Island.

Dersom Hardangerbadet skulle blitt ein realitet, blei det klart i eit vedtak frå heradsstyret i 2015 at bassenget i Ålvik skulle leggast ned. No ser det ut til at dette blir til verkelegheit. Det vil seie at om ikkje lenge blir det byggestart for Hardangerbadet.

Me, innbyggjarane i Ålvik, vil kjempe for å behalde bassenget i bygda vår for store og små.

Det å kunne gje borna tilbod om badetidene slik dei får i dag, er den einaste kunnskapen me kan gje dei som dei kan døy av ikkje å ha. Det er viktig å tenke på.

Bassenget i Ålvik er ope 26 veker kvart skuleår. I dag har alle innbyggjarar i Ålvik, frå 1 til 100 år, tilbod om symjeopplæring og bading 1–3 gonger kvar veke. Borna i bygda er symjedyktige langt ned i småskulen, dei er godt vane med vatn og å meistre bassenget.

Det er både dags- og kveldstilbod for bading i Ålvik. Ålvik idrettslag har tilsyn med kveldsbadinga for alle aldrar. På grunn av dette, har eit barn i Ålvik nær 50 timars symjeopplæring i året. Dette vil verte kraftig redusert i praksis for born som bur i Ålvik når Hardangerbadet vert ein realitet. Då er det fare for at realiteten for born i Ålvik blir eit badetilbod som er ein fjerdedel av det dei har i dag. Med andre ord, bading annakvar veke og inkje kveldstilbod i Ålvik.

Å behalde Ålvik symjebasseng ope framover, er ei enkel sak, fordi i den store samanhengen er driftsmidlane som trengst ikkje store. Det kjem til å bli veldig kostbart å ha personell og elevar på buss tur/retur Ålvik–Øystese når Hardangerbadet står ferdig. I tillegg mister barna verdifull undervisingstid medan dei sit på bussen.

Symjeundervisning er eit livsviktig fag som står i fare for å verte veldig redusert om vedtaket frå 2015 trer igjennom. Å bu langs Hardangerfjorden kan koste livet om ein ikkje kan symje. Derfor krev me at heradsstyret tar opp att saka og løyver midlar til Ålvik symjebasseng, slik at me som vaksne og foreldre kan vere trygge på barna våre i vatnet.

Erla Hjördís Gunnarsdóttir – FAU-leiar Ålvik skule