KJEM TILBAKE: Kari Bremnes samla eit stort publikum i Kjevikjo i 2013. (Foto: Camilla Korsnes)
KJEM TILBAKE: Kari Bremnes samla eit stort publikum i Kjevikjo i 2013. (Foto: Camilla Korsnes)

Kari Bremnes skal halda konsert på Solstråleøyo

Den nordnorske songfuglen kjem tilbake til Tysnesfest i 2018, etter suksesskonserten for fire og eit halvt år sidan.
Publisert 13.12.2017 kl. 11.27. Oppdatert 14.12.2017 kl. 13.58.

– Bremnes gav oss ein fantastisk konsert i 2013, og det er per i dag den konserten me har arrangert i Kjevikjo som har hatt høgast publikumstal, skriv Tysnesfest i ei pressemelding.

Neste år skal ho spela på Solstråleøya.

– Me vil ha same opplegg som me hadde der med Vamp i sommar, med hurtigbåt som går tur-retur, skriv festivalen, og minnar om at Vamp-konserten vart utseld.

– Ver tidleg ute med bestilling, oppfordrar festivalen.


Populær artist

Kari Bremnes turnerer både i inn- og utland, og berre i haust har ho hatt heile 35 konsertar, der 95 % av alle tilgjengelege billettar vart selde.

– I september slapp ho si fyrste plate på meir enn fem år, og den har allereie selt 5000 fysiske cd-ar, noko som i 2017 er eit ganske fantastisk tal, skriv Tysnesfest.

Bremnes platedebuterte i 1980 saman med broren Ola. For det fyrste soloalbumet sitt «Mitt ville hjerte» fekk ho Spellemannsprisen. Dessutan har alle Bremnes sine norskspråklege soloalbum sidan «Spor» frå 1991 nådd Topp 15 på VG-lista. «Ly», som ho gav ut i 2009 og som Bremnes sjølv har skrive teksten til, nådde toppen av VG-lista, skriv Store Norske Leksikon. Bremnes har halde ei rekkje konsertar i fleire europeiske land, og har gitt ut ein del av songane sine i engelsk versjon på albuma «Norwegian Mood» (2000) og «You’d Have To Be Here» (2003).


Fekk avslag

Tysnesfest skriv at dei gjennom hausten har fått mange førespurnadar frå folk, som lurte på om dei kan ha konsert i Kjevikjo i 2018.

– Planen har vore å ha konsert der neste år, men Bergen og Omland Friluftsråd har avslått søknaden om dette grunna slitasje på underlaget, skriv festivalen.

– Då avslaget kom fann me ut at me ville arrangera konserten på Solstråleøya slik me gjorde i 2017, skriv Tysnesfest.

Desse artistane er lansert frå før av: Bigbang, Adam Douglas og Gåte.


Siste saker Gå til framsida

Viste fram trafikkfarleg skuleveg

Tysnes kommune viste fram smal skuleveg på snøslapsføre under synfaring med vegvesenet og fylkeskommunen. Turen gjekk både forbi Kløvbrekko og langs Onarheimselva.