GOD TRIM: Rebekka Helgesen ser fram til å kunna ta ei treningsøkt etter å levert borna på skulen og i barnehagen. Ho trenar så hardt at det dirrar i låra på dei siste repetisjonane.
GOD TRIM: Rebekka Helgesen ser fram til å kunna ta ei treningsøkt etter å levert borna på skulen og i barnehagen. Ho trenar så hardt at det dirrar i låra på dei siste repetisjonane.

OnarTrim har opna dørene

– Dette kjem me til å bruka. Det er jo som ein draum her, seier Rebekka Helgesen.
Publisert 15.12.2017 kl. 06.00. Oppdatert kl. 12.07.

Ho og familien bur på Hagareset, berre eit steinkast unna OnarTun.

Måndag førre veke opna det nye treningssenteret OnarTrim dørene. Flunkande nytt utstyr står på rekkje og rad, og berre ventar på at folk frå Onarheim skal ta det i bruk. Tredemøller, syklar, styrkeapparat og squashbane er på plass.

– Det er kjempebra å ha fått treningssenter på denne sida av øya, kommenterer Rebekka Helgesen, som er innom for første gong.


Ventar på nøkkelbrikker

– OnarTrim skal vera for folk flest. Prisane er ikkje klare enno, men dei blir konkurransedyktige, seier Gerhard Meidell Alsaker, mannen bak OnarTun.

Ein har ikkje fått på plass låssystemet enno. Fram til den tid, vil treningssenteret vera ope når butikken er open.

– Eg trur tilbodet har vore litt etterlengta. Det er kjempepositivt og veldig gøy at det no er opna, seier Ann Helen Helland, dagleg leiar ved Joker Onarheim.


Styrkeøkt

I kroken med dei tyngste vektene har Preben Helland og Kjetil Høviskeland seg ei styrkeøkt.

– Me kan ikkje klaga på tilbodet her, seier Høviskeland.

Han er driftsteknikar hos Alsaker Fjordbruk, og er svært glad for no å kunna både trena, jobba og bu på Onarheim.

– Eg kjem til å bruka treningssenteret kvar dag, fortel Høviskeland mellom setta.


Sentralt på Onarheim

Treningssenter har vore ein del av konseptet OnarTun, sidan ein byrja planlegginga av bygget i 2008/2009.

No er dørene endeleg opna, og ut desember er det gratis trening for alle.

Treningssenteret skal ikkje ha eigne tilsette, og butikken på OnarTun får ansvar for utleige av racketar til squashbanen. Kvar måndag mellom 17 og 19 på kvelden, skal det vera ein person tilstade som kan svara på spørsmål om det nye tilbodet.

– Det er heilt topp utstyr. På apparata er det ein QR-kode, som ein kan lesa av med smarttelefon og få videoinstruksar. Eg har nettopp blitt vist det, og eg trur alle kan klara det, seier Ann Helen Helland.


Inga unnskyldning

På Tysnes har ein allereie treningssenter i Våge og i Uggdal. Konkurransen om dei treningslystne blir skjerpa når Onarheim no har fått sitt eige treningssenter.

– Treng folk eit eige treningssenter på Onarheim?

– Det vil nok vera slik på Onarheim som andre plasser, at dei som treng det mest, ikkje går på treningssenter enten det ligg på Onarheim eller i byen, svarer Alsaker.

– Kjem du til å bruka treningssenteret sjølv?

– Eg tenkte å bruka det nesten tre gonger i veka. Nesten på måndag, nesten på tysdag og nesten på torsdag. Det blir nesten tre gonger i veka, svarer Alsaker humoristisk.



STERK: Preben "Paddy P" Helland frå Onarheim testar ut styrkebenken.
STERK: Preben "Paddy P" Helland frå Onarheim testar ut styrkebenken.
SQUASHBANE: No er det berre å finna fram racketen.
SQUASHBANE: No er det berre å finna fram racketen.
STORE APPARAT: Thea Helgesen Skorpen (7) var med foreldra og kikka på det nyopna treningssenteret.
STORE APPARAT: Thea Helgesen Skorpen (7) var med foreldra og kikka på det nyopna treningssenteret.
MANUAL: Vektene ligg klare, på rekkje og rad.
MANUAL: Vektene ligg klare, på rekkje og rad.
TAR I: Kjetil Høviskeland har kort veg til treningssenteret, og planlegg å trena kvar dag på OnarTrim.
TAR I: Kjetil Høviskeland har kort veg til treningssenteret, og planlegg å trena kvar dag på OnarTrim.
TV-SKJERM: Om du synest det blir kjedeleg å springa på tredemølla, er det berre å finna seg eit kjekt fjernsynsprogram på skjermen.
TV-SKJERM: Om du synest det blir kjedeleg å springa på tredemølla, er det berre å finna seg eit kjekt fjernsynsprogram på skjermen.

Siste saker Gå til framsida