HØG SEGLFØRING: Seglskuta «Statsraad Lehmkuhl» kjem til neste års Tysnesfest, og vil ha Våge som heimehamn fire festivaldagar i juli. (Arkivfoto frå då den majestetiske skuta vitja Våge i 2015)
HØG SEGLFØRING: Seglskuta «Statsraad Lehmkuhl» kjem til neste års Tysnesfest, og vil ha Våge som heimehamn fire festivaldagar i juli. (Arkivfoto frå då den majestetiske skuta vitja Våge i 2015)

Statsraaden cruisar inn til Tysnesfest

– Dette har me gledd oss til lenge, seier Øystein Vaage, og tenkjer på dei fire dagane i juli der seglskuta «Statsraad Lehmkuhl» skal ha Våge som heimehamn.
Publisert 19.12.2017 kl. 16.58.

Den daglege leiaren i Tysnesfest trekkjer med jamne mellomrom opp nye artistnamn or hatten. No kan han presentera ein annan attraksjon, som vil ruva i landskapet.

Det vil bli kvite segl å sjå på fjorden, det vil bli høge master som ruvar over dei mange gjestebåtane i hamna festivaldagane i juli 2018.

– Me har prøvd på det i mange år, å få «Statsraad Lehmkuhl» hit under Tysnesfest. Då er det kjekt at me endeleg har lukkast, seier Vaage.


Festivalsekken

For dei som vil, kan ein nyta turen frå Bergen til Våge om bord i Statsraaden.

– 12. juli kan du pakka festivalsekken før du midt i hjarta av Bergen stig om bord i majestetiske «Statsraad Lehmkuhl». Seglskuta som vart bygd i 1914 vil ta deg trygt og godt gjennom ein nydeleg skjergard heilt til Tysnes, der ho legg til kai midt i Våge sentrum. Frå der er det gangavstand til Gjerstad arena, og dei store konsertane der, minner ein entusiastisk Øystein Vaage om.

For dei som vil nyta turane til og frå Bergen, utan tanke på bilkøar og ferjeventing, blir det retur frå Våge til Vågen søndag 15. juli.


Hengekøye

Vil du bu om bord festivaldagane, er det sjanse for det. Så sant du er 25 år eller eldre. Det er plass til 70 for overnatting, der ein må finna seg til rette i hengekøye i fellesrom/banjer på det som er omtalt som verdas vakraste skute.

– Det vert servert nydeleg frukostbuffet kvar dag, og det er særs gode dusj- og wc-fasilitetar om bord, reklamerer Vaage.

Det stoppar ikkje her. Fredag 13. juli vil dei som vil – og er tidleg nok ute til å sikra seg plass – kunna vera med på musikalsk dagstur.

– Ja, fredagen vil Statsraaden leggja frå kai og ta gjestene med på fjorden. Det blir underhaldning om bord, og eit flott høve til å vera cruisturist på denne flotte skuta ein dag, seier den daglege leiaren i Tysnesfest.


Festivalcruise

Vil du vera med på eit skikkeleg festivalcruise, kan du følgja «Statsraad Lehmkuhl» til og frå Trænafestivalen ytterst på Helgelandskysten.

– Skuta kjem hit frå den festivalen, via Bergen, så her kan ein få staseleg transport frå festival til festival, forklarer Vaage.

Laurdagen vil Statsraaden liggja til kai, men også denne dagen vil det skje saker og ting om bord.


Båtsmykke

– Programmet er ikkje heilt klart for den dagen, men underhaldning og aktivitetar av ulikt slag vil det bli. Det skal verkeleg bli kjekt å få dette smykket av ein båt til festivalen vår, seier Øystein Vaage. Det maritime preget har vore med Tysnesfest i alle år, til sommaren vil det bi svært så tydeleg med den ruvande Statsraaden i Våge hamn. Som einaste losjiskip.

Stordabu og shantymann Haakon Steinar Vatle er direktør i Stiftelsen «Statsraad Lehmkuhl». Han har vore i aksjon på ulike vis under Tysnesfest tidlegare, og ein skal ikkje sjå vekk frå at det kan bli ein og annan ramsalt shanty å høyra under neste års festival.


Siste saker Gå til framsida

Kven hadde flest turar til Såto i fjor?

Her kjem ei oversikt over kven som hadde ti eller fleire turar til Tysnes sin høgaste fjelltopp i 2017: Åsta Hansen – 163Nils Eivind Hansen – 71Marita Nygård – 60Frank Hustad – 55Kjetil Skjolde – 37Morten Tysnes – 16Alex Lunde – 15Marco – 13Rasmus Holm Lunde – 11Morten Haaland – 10Sigvard Madsen – 10Ruben S.

Øvst på pallen to dagar på rad

Tysnesjenta Hedda Singelstad Kåsa har dei siste åra utmerka seg som ein god skiskyttar, og både laurdag og søndag vart ho best i J16-klassen under Gla’Laks Cup på Sjusete i Kvam.