TAKKAR: Pernilla Epland takkar Lars Enes frå Tysnes Kraftlag for sponsormidlane.
TAKKAR: Pernilla Epland takkar Lars Enes frå Tysnes Kraftlag for sponsormidlane.

Pernilla Epland får 25.000 kroner av kraftlaget

– Pengane skal brukast til reiser når eg skal konkurrera, seier løpar Pernilla Epland (27).
Publisert 20.12.2017 kl. 06.00.

Midlane frå Tysnes Kraftlag får ho gjennom ein sponsoravtale for 2017 og 2018.

10.000 kroner får ho i år og 15.000 kroner skal delast ut neste år.

– Eg har kome på eit nivå som gjer at eg må reisa litt for å få motstand. Opphald og reiser kostar, så dette kjem godt med, sa ho då Lars Enes hadde fortalt om sponsoravtalen.


– Betre enn venta

Ho får også pengar gjennom Stord Friidrett, som er klubben hennar, men kostnadar for reisene som er sett opp neste år, blir meir enn midlane ho får der.

– Eg synest det er kjekt at kraftlaget har tru på meg. Faktisk har det gått betre enn venta denne sesongen, fortel Pernilla, som går siste året på barnehagelærar på Høgskulen på Vestlandet, avdeling Stord.

Enes forklarar at kraftlaget har tradisjon for å sponsa unge lokale talent.

– Me sponsa til dømes Anna Dorthea Espevik i tre år. Det som er spesielt med Pernilla var at ho hoppa over ungdomsklassa i løping, seier han.


Byrja med halvmaraton

Pernilla spelte lenge handball, og byrja fyrst å interessera seg for løping i 2011.

– Eg melde meg på halvmaraton i Oslo for å ha eit mål med treninga. Der gjorde eg det relativt bra, og synest det var kjekt, så melde meg på ein til to sånne løp i året, seier ho.

Våren 2016 var ho med på Bergen City Maraton, og sprang inn på 1 time og 22 minuttar i ei tøff løype, som var langt betre enn kva ho hadde sett for seg.

– Etter det blei eg plukka opp av Stord Friidrett som lurte på om eg ville vera med på Tour de Stord, og blei etterpå invitert på fellestreninga, seier Epland.

– Det ville eg, og har ikkje angra på, seier ho.


Fekk bronse

Deretter fekk Epland prøva seg på NM-kravet, som ho klarte med 11 sekundar.

– Eg var med på terreng-NM i Strandebarm, der eg fekk bronse. Det var ein kjekk erfaring, seier ho.

Neste mål er 3000 meter i innandørs-NM i februar.

– Eg blei bitt av basillen etter fyrste konkurranse, seier Epland.


Siste saker Gå til framsida

Ny badestrand i Lunde

For ikkje lenge sidan, dukka det opp ei ny badestrand i Lunde. Stranda blei sett i stand av ein lokal velgjerar, som helst ikkje vil nemnast i avisa.

Vart servert vaflar og gode ord

Karine Høviskeland Eide og borna Even Elias (5) og Nathaniel (3) Eide var blant dei som tok seg ein «Pit-stop» under Tysnesfest.