LEDIG ROM: "Tysnes" tar inn på ei futuristisk container-overnatting.
LEDIG ROM: "Tysnes" tar inn på ei futuristisk container-overnatting.

Ei natt i Pod tre

Sveip. Pip. Klikk. Vips opnar døra seg til mitt eige private krypinn. PodTown er eit lite steg inn i framtida.
Publisert 21.12.2017 kl. 06.00. Oppdatert kl. 10.41.

Eit nøkkelkort er alt du treng, for å ta inn på Eirik Kalve sitt nye podtell.

Under Tysnesfest kan 300 personar få bu i containerlandsbyen til gründeren frå Austevoll.

«Tysnes» har fått vera ein av dei første i verda som testar ut overnattingstilbodet. Underteikna sjekka inn ei natt på rom tre i prototypen til podtellet.

Avsløringa kjem allereie no: det kan vera vel verd å revurdera eventuelle planar om å overnatta i telt under Tysnesfest.


Langt frå kummerleg

Det høyrest kanskje ikkje så luksuriøst ut, å bu i ein metallcontainer, slike som fraktar gods på lasteskip. Store, kalde klossar. Men det er noko heilt anna å setja foten inn i ein av Kalve sine containerar.

Det er noko futuristisk over heile stilen. Runde former, blåleg lys og mange knappar å trykkja på. I eit podtell (container) skal det vera 16 soveplassar. 16 individuelle avlukke som er 200 cm lange, 100 cm breie og 95 cm høge.

Som på eit vanleg hotell lukkar og opnar ein dørene med nøkkelkort til kvart av romma.

Nøkkelkortet plasserer ein i ei lomme på veggen, og slik får ein straum og lys over senga.


Klar til innflytting

Senga er sjølvsagt reidd opp. Eg klatrar opp dei tre stega til den øvste poden på høgre side, og klatrar inn.

Kummerlege forhold er det absolutt ikkje. Det er lyst og fint, og stort nok til at eg kan sitja oppreist utan å slå hovudet i taket. På heile venstre sida er det eit stort panel, små hyller, ein stor spegel, og ei mengde knappar.

Knappen som eg er mest glad for at fungerer står det «Unlock door» på. Når ein lukkar døra, låser nemleg det vesle rommet seg, og ein må trykka på «Unlock door» for å koma seg ut.

Okei, eg skal innrømma at pulsen steig ganske kraftig då eg åleine skulle testa om «Unlock door» verkeleg fungerte. Eg var litt redd for å bli låst inne i eit lite rom i ein container på kaien i Våge.

Men reserveløysinga var ikkje langt unna. I kvar pod er det eit eige vindauge ut. Eg har sjeldan blitt så glad for å sjå eit vindauge med vanleg manuelt handtak på.

Nokre nervepirrande sekund gjekk frå eg lukka døra, til eg fann den rette knappen, og høyrde det velkjende «klikket», då døra opna seg.

Skulle brannalarmen gå av, eller om straumen forsvinn, opnar alle dørene i podtellet seg automatisk, forsikrar gründeren.


Futuristisk

Det er mange fikse løysingar i podtellet. Kontrollpanelet i soverommet har for eksempel lademoglegheiter. På den nye modellen vil det bli låsbar lagringsplass i fellesarealet for tinga ein har med seg.

Fjernsynet som kan senkast ned frå taket i kvart soverom, er ein finfin detalj.

Ei overnatting på podtell skal passa for kven som helst, men det skadar ikkje å ha litt teknisk sans.

Alt er så «high tech», at eg ikkje klarte å opna søppelbøtta i fellesarealet. I alle fall ikkje då eg ville. Det lyste i nokre ulike knappar på toppen. Plutseleg opna ho seg berre eg gjekk forbi. Men loket ville absolutt ikkje opp då eg skulle kasta noko, same kor mykje eg veiva med handa over knappane.

På podtella som kjem til Tysnesfest blir nokre med enkle, og nokre med doble overnattingsrom. Dusj og toalett vil koma i eigne containerar rett utanfor.


Framtida

Alt i alt var det ei komfortabel natt i soverom tre i podtellet.

Det hadde ikkje skada om madrassa hadde vore nokre centimeter tjukkare, men unnderteikna fekk sine timar med skjønnheitssøvn likevel. Gründer Eirik Kalve lovar at madrassene i dei nye podtella blir tjukkare enn i prototypen.

Containeren skal vera lydisolert, men det var heldigvis rimeleg stille i Våge denne desembernatta.

Overnatting i podtellet under Tysnesfest kan bli ei fin oppleving, i alle fall om ein ser på alternativet.

Kven vil vel liggja i eit kaldt og vått telt på bakken, når ein kan ha komfort i ei lita futuristisk pod? Med eit lite tastetrykk kan lufta regulerast eller lyset dimmast. Luksus.


Treng ikkje meir

Konseptet har alle grunnar til å lukkast. I Asia, der idéen er henta frå, har dei skjønt det for lengst. Ein treng ikkje meir enn ein liten kube med ei seng i.

Kva skal me eigentleg med all den plassen på eit vanleg soverom?

Med folkeauken Tysnes har på sommaren er det berre naturleg å tenkja at ikkje alle kan ha 20 kvadratmeter store soverom.

PS! Til dei aller mest klaustrofobiske: Dette overnattingstilbodet er kanskje ikkje for deg. Prøv heller eit rom på Haaheim Gaard, eller eit anna overnattingstilbod med god plass til å spankulera rundt senga.

Men for dei fleste andre vil ei natt i podtellet vera ei strålande festivalovernatting.


STRAUM: Sett inn kortet for å få straum. Her er det berre å følgja bruksanvisninga.
STRAUM: Sett inn kortet for å få straum. Her er det berre å følgja bruksanvisninga.
LATE DAGAR: Med nedsenkbart fjernsyn i taket, kan ein kosa seg med underhaldning. I prototypen var det mest kinesiske videospel å finna, men tilbodet blir sikkert utvida.
LATE DAGAR: Med nedsenkbart fjernsyn i taket, kan ein kosa seg med underhaldning. I prototypen var det mest kinesiske videospel å finna, men tilbodet blir sikkert utvida.
DAGENS VIKTIGASTE: Å finna denne knappen, "Unlock door", gjer at ein unngår å bli låst inne i det litle soverommet.
DAGENS VIKTIGASTE: Å finna denne knappen, "Unlock door", gjer at ein unngår å bli låst inne i det litle soverommet.
KAN LUKKAST: Døra til poden ein søv i kan lukkast og låsast.
KAN LUKKAST: Døra til poden ein søv i kan lukkast og låsast.
NØKKELKORT: Det er akkurat som på eit hotell. For å opna døra til pod tre, må ein bruka nøkkelkort.
NØKKELKORT: Det er akkurat som på eit hotell. For å opna døra til pod tre, må ein bruka nøkkelkort.
NYTT: Har du nokon gong tenkt på å overnatta i ein container? Ikkje det, nei? Til sommaren har du sjansen under Tysnesfest. Gründer Eirik Kalve (t.h.)
NYTT: Har du nokon gong tenkt på å overnatta i ein container? Ikkje det, nei? Til sommaren har du sjansen under Tysnesfest. Gründer Eirik Kalve (t.h.)

Siste saker Gå til framsida

Debatt: El-bilar og betaling på innanriksferjer

Til å byrja med, var el-bilar fritekne for betaling på riks- og fylkesvegferjer. Ein løyste då berre billett for føraren av bilen. Dette vart det ei endring på i 2016/2017.Då vart det vedteke at el-bilar skulle betala for seg på lik linje med andre bilistar. Men dei skulle berre betala 50 prosent av vanleg biltakst. Og då var føraren inkludert i prisen. Men dei som brukte...