Hanne berga livet til bestevenen Karl

To veker på baderomsgolvet, mjølkeerstatning og mykje varm omsorg gjorde at Hanne og Karl no kan gå tur med kvarandre. Og han blir ikkje pinnekjøt i år.
Publisert 25.12.2017 kl. 06.00. Oppdatert kl. 17.26.

Hanne Bruntveit (26) elskar dyr, og har levd tett innpå ulike slag dyr heilt sidan ho som seksåring flytta frå Danmarksplass i Bergen til Bruntveit på Reksteren.

Då ho var liten, hadde bestefaren stutar som ho var mykje saman med. Den atten år gamle hesten «Kvikne Prins» har ho no hatt i ti år. Den er «barnebarn» til den vidgjetne travhesten «Atom Vinter», men eignar seg best som ridehest, meiner Hanne.

Ho har også to hundar, men sauer er ho ekstra glad i. Kvar dag, og ofte fleire gonger dagleg, er ho oppe på nabogarden og steller sauene der.

– Eg stortrivst saman med sauene. Men det er jo spesielt ein då som er favoritten min. Karl har eg fått eit veldig nært forhold til, og det verkar som at det er gjensidig. Hanne står og klør venen Karl i ulla, noko han tydelegvis likar. Samtidig gir ho høy til hesten, som prøver å hindra at Karl skal stikka av med maten.


Avvist av mora

Karl vart fødd 23. april i år. Sauemora fekk eitt verlam til. Karl var minst og svært liten, og mora ville ikkje ha noko med han å gjera.

– Eg fekk så vondt av han og tok han med meg heim. Baderomsgolvet var varmt, så han fekk vera der. Eg skaffa mjølkeerstatning for sau, og den tok han til seg. Eg kalla han Karl, for eg likar kongelege namn. Hesten heiter jo «Kvikne Prins», og veren dei har oppe på garden, kallar eg «Fredrik».


Kumjølk

Men Karl vart magesjuk av sauemjølkerstatninga.

– Då gjekk eg over på kumjølk, og han fekk i seg to liter med kumjølk. Etter det mata eg han med ei blanding av h-mjølk, egg, tran og sukker. Då kom han seg, og etter to veker på baderommet kunne han få koma ut derifrå. Me laga hus til han på terrassen.


Trivst med tobeinte

– Etter ei stund gjekk eg opp til dei andre sauene med «Karl». Han er jo trass alt sau, denne gode gamle norske spælsaukameraten min, ler Hanne.

– Men han hadde tydelegvis problem med å forstå kvifor han skulle gå saman med dei andre sauene. No har me kastrert han, slik at han gå saman med sauene og heller sleppa til «Fredrik» når det er tid for paring.


Hestelinje

Hanne har i mange år vore «hestejente». Ho reiste til Nedstrand og gjekk på Tveit vidaregåande skule.

– Der har dei hestelinje, og eg tok med meg min «Kvikne Prins». Det var svært fint å kunna ha min eigen hest å øva med, seier Hanne medan ho tek den firbeinte venen sin under haka. Då viser «Kvikne Prins» alle tennene sine og smiler.

– Ja, han gjer det når eg løfter haka hans, så me har lært oss nokre triks saman, seier matmor, og gir prinsen litt kraftfor medan Karl vimsar rundt beina hennar. Karl løftar på eine foten, noko som gjer at Hanne må ned i kraftforposen sin igjen.

– Ja, Karl har visst lært av hesten å løfta eine beinet når han vil ha noko godt.


Draum om småbruk

Hanne bur no heime med foreldra. Ho har ein stall der, men dei bur ikkje på gard.

– Eg drøymer om å få meg eit småbruk. Men eg har verken jobb eller pengar, så han er ikkje så realistisk den draumen no. Eg likar så godt å godsnakka med dyra, skjemma dei bort med litt brød gjerne. Det gir meg så mykje å vera saman med dei. Men bonde kunne eg nok ikkje vore, for eg orkar ikkje tanken på at dei skal slaktast. Og ja, eg tippar kvar veke og lever i håpet.


Fotgjengarane

Oppe ved bustadhuset gøyr det to hundar. Hanne går opp og finn fram to hundeband. Karl trippar etter ho opp til huset. Hanne kjem ned att med hunden «Nemi» i det eine bandet og i det andre...nei, ikkje den andre hunden, men Karl, som går så fint i det andre hundebandet.

– Ja, Karl likar veldig godt å gå på tur. Han går så fint ved sida av meg langs vegen. Og når eg også har med «Nemi», er dei gode vener som gjerne går fint på kvar si side av meg. «Nemi» går jo ut i vegkanten når han skal gjera frå seg, medan Karl berre legg bæsjen att i vegen. Elles er det lite skilnad på å gå tur med hund og sau. Får Karl eit nei, så kjem han til meg. Betre ven skal du leita lenge etter, seier ho som berga Karl, og meiner han skal få overleva mange juler.


FIN TRIO: Karl, Hanne og Nemi trivst godt i kvarandre sitt selskap. (Video og redigering: Ingunn Gjærde/Alle foto: Camilla Korsnes)
FIN TRIO: Karl, Hanne og Nemi trivst godt i kvarandre sitt selskap. (Video og redigering: Ingunn Gjærde/Alle foto: Camilla Korsnes)
IDYLL: Hanne kan ikkje tenkja seg ein kvardag utan dyr. Her er Karl på hogget og lurer til seg litt av hesten sin mat.
IDYLL: Hanne kan ikkje tenkja seg ein kvardag utan dyr. Her er Karl på hogget og lurer til seg litt av hesten sin mat.
KURIOSITET: Det er vanleg å gå på tur langs bilvegen med hund, men sau? Karl kan vera litt sta til tider, men gjekk fint som berre det då «Tysnes» fekk vera med på tur.
KURIOSITET: Det er vanleg å gå på tur langs bilvegen med hund, men sau? Karl kan vera litt sta til tider, men gjekk fint som berre det då «Tysnes» fekk vera med på tur.
MATVRAK: Det løner seg å vera søt, og ofte vankar det litt kraftfor på Karl.
MATVRAK: Det løner seg å vera søt, og ofte vankar det litt kraftfor på Karl.
MÅ STÅ FINT I RO: Hanne må halda god kontroll på dei firbeinte når bussen køyrer forbi.
MÅ STÅ FINT I RO: Hanne må halda god kontroll på dei firbeinte når bussen køyrer forbi.
SMILER: Kvikne Prins har lært seg eit og anna triks sidan han kom i Hanne sin eigarskap.
SMILER: Kvikne Prins har lært seg eit og anna triks sidan han kom i Hanne sin eigarskap.
KRØLLER: Ulla til Karl blir fuktig i all snøen.
KRØLLER: Ulla til Karl blir fuktig i all snøen.
NYFIKEN: Hesten sjekkar om fotografen har noko mat å by på.
NYFIKEN: Hesten sjekkar om fotografen har noko mat å by på.

Siste saker Gå til framsida