SKAL KLIPPA: Svenn Arve Lande skal klippa samandrag av det som skjer under OL, laga reportasjar og musikkinnslag med bilete og opplevingar. (Foto: Camilla Korsnes)
SKAL KLIPPA: Svenn Arve Lande skal klippa samandrag av det som skjer under OL, laga reportasjar og musikkinnslag med bilete og opplevingar. (Foto: Camilla Korsnes)

Dei skal dekkja OL i Sør-Korea

Tysnesingen Svenn Arve Lande skal redigera tv-klipp, medan Arve Fuglum som har hytte på øya skal kommentera skøyteløp.
Publisert 01.01.2018 kl. 16.00.

– Det kjekkaste er å laga dei små samandraga som gjev gåsehud, seier tysnesingen Svenn Arve Lande.

Han skal vera ein av tre faste redigerarar for Discovery Norge under vinter-OL i PyeongChang, som går av stabelen i februar. Han skal klippa samandrag av det som skjer, laga reportasjar og musikkinnslag med bilete og opplevingar.

– Eg kjem til å jobba i International Broadcast Center (IBC) saman med folk frå heile verda. Dit blir signala frå OL-hendingane samla og distribuert vidare. Eg reknar med at ein del journalistar kjem til hallen for å klippa innslag, seier Lande.


Likar best utfor

Sportsgreinene i vinter-OL er alpint, skiskyting, langrenn, curling, ishockey, kombinert, hopp og skøyter, i tillegg til underkategoriar av desse. Lande har utfor som sin klare favoritt.

– Eg likar både best å sjå og jobba med utfor. Det er eigentleg fascinerande at dei klarar å halda seg på beina. Bileta av utfor-utøvarane er dynamiske, dei blir ofte kule og actionfulle, seier han.

Til vanleg jobbar Lande som systemteknikar offshore for DeepOcean AS. Oppdraget i Sør-Korea har han fått på bakgrunn av at han har jobba 12 år i TV2, og litt for TV Norge.

– Nokre av dei tidlegare kollegaene mine jobbar i Discovery Norge, som har kjøpt opp rettane til å dekkja OL. Dei ringde til meg og spurde om eg hadde høve til å vera med, seier han.

Lande jobbar offshore, og har høve til å ta fri frå jobben i DeepOcean.

– Å dekkja OL er kjekt og annleis enn det eg held på med til vanleg. Offshore jobbar eg teknisk, men eg likar både å jobba teknisk og å vera kreativ, seier han, som er utdanna medieingeniør frå den tidlegare høgskulen som er blitt til Universitetet i Stavanger.


Flytta heim

Lande har mykje erfaring frå å reisa og dekkja eventar, frå då ha jobba som fotograf. Han har dekt Tour de France seks gongar. Han dekte mellom anna vinter-OL i Vancouver i 2010, klippa bilete frå OL i Sotsji i 2014, og dekte fotball-VM i Sør-Afrika i 2010.

– Det mest spanande var å dekkja Rally Dakar, som starta i Lisboa i Portugal og vart avslutta Dakar i Senegal. Me måtte overnatta i telt i ørkenen, minnest han.

– Det blei og ein del utenriksturar for nyheitsavdelinga. Eg var mellom anna i Afghanistan der eg følgde tidlegare utviklingsminister Erik Solheim (SV) og tidlegare forsvarsminister Anne-Grete Strøm-Erichsen (Ap). Nokre år tidlegare dekte eg tsunamien i Thailand.

– Kva er grunnen til at du slutta i mediebransjen?

– Det er fleire grunnar. Eg budde i Oslo då eg jobba for TV2, men både Elise (Kristiansen red.merk) som eg er trulova med, og eg er frå Vestlandet, så me lengta heim. I tillegg hadde eg lyst å prøva noko nytt.

Han tvilar på at han får sett mykje av PyeongChang når han skal dekkja OL.

– Eg trur både hallen og løypene ligg utanfor byen. Det blir lange vakter på 12 timar, så eg trur ikkje det blir tid til sightseeing.


Hytte på Tysnes

Arve Fuglum, som har hytte på Tysnes, skal kommentera skøyteløpa i OL saman med Mikael Flygind Larsen.

– Mormora mi, Cicilie Fauske er fødd og oppvaksen på Malkenes. Mor mi budde der under krigen, og eg har vore der meir eller mindre kvar einaste sommar sidan eg blei fødd. Eg har mange slektningar i området, til dømes fetrar og tremenningar, seier han på telefon til «Tysnes».

Fuglum har studert norsk ved Norges teknisk-naturvitenskaplige universitet (NTNU) i Trondheim, og har gått på medielinja ved Høgskulen i Volda. Han har jobba i NRK i nesten 20 år og seinere TV2, men er no frilansjournalist og har eige firma, etter han tok sluttpakke i sistnemde kanal.

Han har kommentert skøyteløp på radio, og har eit nært forhold til sporten gjennom oppveksten i Drammen.

– I NRK kommenterte eg allslags sport, men var stort sett fotballkommentator. Eg har kommentert mykje anna, men mest skøyteløp, i tillegg til fotball. Elles har eg til dømes kommentert handball, curling og langrenn. Eg kommenterte segling for eitt år sidan for TV2.

– Likar du best å kommentera skøyteløp?

– Det er ein jobb, men det er alltid gøy å kommentera noko ein kan ein del om. Eg kunne sikkert kommentert noko anna, men skøyter kan eg, og då blir det morosamare sidan du slepp å byrja på null. Det er det same med fotball.


VETERAN: Arve Fuglum, som har hytte på Tysnes, har kommentert sport på TV og radio i mange år. (Foto: Anita Arntzen for TVNorge)
VETERAN: Arve Fuglum, som har hytte på Tysnes, har kommentert sport på TV og radio i mange år. (Foto: Anita Arntzen for TVNorge)
UTANRIKS: Svenn Arve Lande reiste mykje utanriks som fotograf i TV 2. Her dekkjer han Rally Dakar. (Foto: Svenn Arve Lande)
UTANRIKS: Svenn Arve Lande reiste mykje utanriks som fotograf i TV 2. Her dekkjer han Rally Dakar. (Foto: Svenn Arve Lande)

Siste saker Gå til framsida

Forventar ein kjekk konsert

– Julekonserten er ein årleg tradisjon. Onarheim Musikklag har hatt den så lenge eg har spelt med dei, for å seia det sånn, fortel Magne Storesætre.