UNDERHELDT MED JULEMUSIKK: Solist Lucas hadde kanskje med seg eit mindre kor i bedehuset i Lunde enn under framføringa av julemusikalen «det lyser en stjerne» i Uggdal kyrkje før jul, men songen fylte likevel lokalet. I koret frå venstre står Jimmy, Aurora, Maylinn, Marie og Bertine.
UNDERHELDT MED JULEMUSIKK: Solist Lucas hadde kanskje med seg eit mindre kor i bedehuset i Lunde enn under framføringa av julemusikalen «det lyser en stjerne» i Uggdal kyrkje før jul, men songen fylte likevel lokalet. I koret frå venstre står Jimmy, Aurora, Maylinn, Marie og Bertine.

Song, juletregong og nissebesøk

Den tradisjonsrike julefesten i Lunde trekte fullt bedehus i romjula.
Publisert 02.01.2018 kl. 11.31. Oppdatert kl. 12.08.

Både liten og stor møtte torsdag i romjula opp for å få med seg Lunde Bedehuslag sin årvisse julefest. Eit stort juletre pynta med lys og julekuler pryda lokalet, og frå talarstolen ynskte konferansier Lorentz Lunde alle dei frammøtte velkomne.

– I fjor var mange sjuke, og vêret var dårleg. I år har me visst vore mykje heldigare, smilte han til forsamlinga. Han annonserte så kveldens fyrste underhaldningsinnslag, som var framføring av juleevangeliet, av Anna Olea Fjeldet Sunde.


Smakebit frå julemusikal

For dei som ikkje fekk med seg juleframsyninga til Uggdal skule før jul, fekk dei under julefesten ein smakebit på kva førestillinga hadde romma. Solist Lucas Flatråker Tønnessen, saman med eit kor på fem, framførte tre av songane frå julespelet. «Ut på tur», «Ikkje gråt» og til slutt «Det lyser en stjerne» var plukka ut, der sistnemnte og var namnet på spelet. Songen hadde under den opphavelege oppstillinga i Uggdal ein annan solist, men og her troppa Lucas villig opp, og tok rolla med glans.

– Me har gått frå å vera 112 born i Uggdal, til seks i kveld, introduserte Helga Kristine Haaland, som hadde regien for borna. Før basaren hadde dei friska opp songstemmene og songtekstane. For framføringa hausta dei seks songfuglane stor applaus.


Høgtid for gleda

Kvelden baud på allsong av tradisjonsrike julesongar, før ein ny gjest inntok talarstolen. Opphaveleg frå Reksteren, men no busett på Stord, vitja Svein Bjarne Aase bedehuset, og heldt andakt.

– Jula er gleda si store høgtid, tala han.

Aase er ikkje ny i bedehusa på Tysnes. I Lunde var han før med å arrangera «Yngres» for ungdommane på øya.

– Det er kjekt å vera attende her i kveld. Eg har mange gode minne herfrå, smilte han etter andakta.


Hyggjeleg matøkt

Etter å ha sunge for maten, lokka lukta av den kjende og kjære kakaoen, som alltid fyller Lunde bedehus under julefesten, liten og stor ned i matsalen. Her vart det i tillegg til kakao servert bollar og julebrød med ost, og peparkaker. Etter ein matbit og gode samtalar rundt borda, var det klart for nok eit tradisjonsrikt og sjølvsagt innslag for kvelden, nemleg juletregong. Rundt treet måtte det lagast to ringar for at alle skulle få vera med, og Synnøve Hodneland spela opp på pianoet.


Motebevisst nisse

Etter ei stund kom kveldens siste, men for dei mange unge, eit svært gledeleg besøk. Inn dørene kom ingen ringare enn nissen, og med seg hadde han som kjent sekken fylt med godt. Ungane flokka seg ivrig rundt den plutselege hovudpersonen, som for høvet i tillegg til den vanlege nissedrakta, hadde teke på seg mørke solbriller. Og like plutseleg som han kom, var nissen vekke, og att sat ungane nøgde, og koste seg med godteposane.




JULEEVANGELIET: Anna Olea Fjeldet Sunde framførte juleevangeliet.
JULEEVANGELIET: Anna Olea Fjeldet Sunde framførte juleevangeliet.
YNSKTE VELKOMMEN: Konferansier Lorentz Lunde var glad for å sjå dei mange som hadde møtt opp til julefesten.
YNSKTE VELKOMMEN: Konferansier Lorentz Lunde var glad for å sjå dei mange som hadde møtt opp til julefesten.
ANDAKT OG SONG: Svein Bjarne Aase tala om jula som gleda si store høgtid.
ANDAKT OG SONG: Svein Bjarne Aase tala om jula som gleda si store høgtid.
KOSTE SEG MED NISSE-GODT: Systrene Tomine og Sanna var godt nøgd med at nissen kom på besøk med godteposar.
KOSTE SEG MED NISSE-GODT: Systrene Tomine og Sanna var godt nøgd med at nissen kom på besøk med godteposar.
DELTE UT GODTEPOSAR: Borna flokka seg rundt nissen då han kom med sekken fylt med godt. På biletet er det Aurora sin tur å få godtepose.
DELTE UT GODTEPOSAR: Borna flokka seg rundt nissen då han kom med sekken fylt med godt. På biletet er det Aurora sin tur å få godtepose.
MOTERIKTIG NISSE: I tillegg til den raude og kvite drakta, hadde nissen pynta seg med solbriller då han vitja julefesten i Lunde.
MOTERIKTIG NISSE: I tillegg til den raude og kvite drakta, hadde nissen pynta seg med solbriller då han vitja julefesten i Lunde.
GJEKK RUNDT JULETREET: Ingen julefest utan juletregong! Liten og stor deltok då Synnøve Hodneland spela opp med «Så går vi rundt om en enebærbusk», og andre klassikarar.
GJEKK RUNDT JULETREET: Ingen julefest utan juletregong! Liten og stor deltok då Synnøve Hodneland spela opp med «Så går vi rundt om en enebærbusk», og andre klassikarar.

Siste saker Gå til framsida

Ådnastegen lokkar to- og firbeinte til fjells

Stølen på Ådnastegen har vore brukt i lange tider. Enno ligg der åtte små sel og to noko større hytter. Juniane Vevatne Lunde (32) gjekk dit ofte som liten, og no fører ho og mannen Matthias Tønnessen tradisjonen vidare med borna sine.