HUSMANNSPOLKA: Judith Holm Lunde og Lorentz Lunde gjentok suksessen frå bygdafesten i Lunde i fjor.
HUSMANNSPOLKA: Judith Holm Lunde og Lorentz Lunde gjentok suksessen frå bygdafesten i Lunde i fjor.

Lensmannen dansa på omsorgssenteret

Songgruppa «Fjordablæst» underheldt på omsorgssenteret laurdag ettermiddag, og det var svært populært både blant dei som bur der og besøkjande.
Publisert 15.01.2018 kl. 19.00. Oppdatert 17.01.2018 kl. 08.16.

Songgruppa, med base i Lunde, tok sjølv initiativ til å underhalda på det nye omsorgssenteret. Dei hadde bygdafest i haust, og hadde då samla litt av det dei hadde framført sidan dei starta i 1980. Jan Belt leia den snaue timen, og han seier dei hadde lyst til dette.

– Ja, me har opp gjennom åra fått eit repertoar som me trur eldre folk kan vera interesserte i. Og det slo til!

Else Vik og mannen Sigurd bur no i omsorgsbustad ved omsorgssenteret, og dei storkosa seg.

– Eg nynna med heile tida, smiler Else.

– Dette her er veldig greitt, seier Sigurd og legg til at dei trivst svært godt i omsorgsbustaden.


Variert

Dei opna med kjenningsmelodien til «Fjordablæst», skriven av Lorentz Lunde. Der syng dei mellom anna at ingen av dei kjenner seg som meir enn 17 år. Og det virka som at også dei på omsorgssenteret kjende seg yngre under konserten. Mange smilte og nynna med.

Dei framførte melodiar av Alf Prøysen og Evert Taube, kjende melodiar for publikum. Med stråhattane sine på, song dei også fleire barbershopsongar. Jan Belt fortalde at amerikanarane som sat og venta på barberen var dei som starta å synga desse songane. Dei delte også ut teksten til allsong, og det var fleire av dei som bur der som tydelegvis kunne teksten på «Syng, syng, syng og ver glad».


Sara på Solheim

Jan Belt introduserte songen om Sara på Solheim. Han sa at bestyrarinna på denne aldersheimen Solheim, langt frå Tysnes, hadde sagt god natt til Sara på rom nummer ti. Ho sa også god natt til ein ungkar der, men han sa berre god kveld. Så sette han inn gebisset og lurte seg inn på nummer ti til Sara.

Songen var fornøyeleg, den, for dei som bur på Tysnes omsorgssenter. I det heile var det ein koseleg time, der fleire generasjonar var samla, og der underhaldningstilbodet var kjende melodiar. Etter at «Fjordablæst» var ferdig, spela to karar opp til dans på trekkspel. Då svinga både lennsmann Lorentz Lunde og andre frå songlaget seg, og alle bebuarane vart sitjande og nyta synet.


Gamlepresten

Hans H. Hansen var prest i Tysnes. No bur han på omsorgssenteret, og han var svært fornøgd med underhaldninga.

– Eg vaks opp med trekkspel, eg, så dette var triveleg.

Mariann Ebbesvik har svigerfar på heimen, og ho sat ved sida av han.

– Svigerfar likar spesielt godt trekkspel, og han klappa ivrig. Eg synest dette var eit flott tiltak, og i ein flott bygning. Dei som jobbar her viser slik varme og nærleik. All ære til dei, seier Mariann Ebbesvik medan lokalet tømmer seg for gåstolar, rullestolar og fornøgde publikumarar. Og fleire frå «Fjordablæst» gjekk saman med bebuarar på fellesrom og kosa seg med kaffi og kake.



NYNNA MED: Else og Sigurd Vik hadde kort veg frå omsorgshusværet i det nye senteret, og dei kosa seg.
NYNNA MED: Else og Sigurd Vik hadde kort veg frå omsorgshusværet i det nye senteret, og dei kosa seg.
POPULÆRE: «Fjordblæst» frå Lunde gjorde suksess med mange kjende songar på Tysnes omsorgssenter.
POPULÆRE: «Fjordblæst» frå Lunde gjorde suksess med mange kjende songar på Tysnes omsorgssenter.
BEBUARAR OG GJESTER: Underhaldning på laurdagsettermiddagen var svært populært.
BEBUARAR OG GJESTER: Underhaldning på laurdagsettermiddagen var svært populært.
DUETT: Trygve Arntsen på sax og Kolbjørn Tvedt på synth med ein roleg melodi.
DUETT: Trygve Arntsen på sax og Kolbjørn Tvedt på synth med ein roleg melodi.
DANS: Då konserten var over, slo dei til med trekkspel og dans.
DANS: Då konserten var over, slo dei til med trekkspel og dans.

Siste saker Gå til framsida

Inviterer til foredrag om lyssiv og knappsiv

Laurdag 26. mai er det duka for eit foredrag på skulemuseet om knappsiv og lyssiv – og korleis ein bør gå fram for å bli kvitt dei. Grendalaget i Solheimsdalen har invitert Wiktoria Kaczmarek-Derda, som har skrive doktoravhandling om lyssiv og knappsiv, til å halda foredrag om temaet.– Noko av bakgrunnen er jo mellom anna det eg har sett på mitt eige småbruk på Brekke. Beita mine...