REISER I HELGA: Edelmira tek seg ofte ein tur til veninna ho kallar familien sin i Bergen.
REISER I HELGA: Edelmira tek seg ofte ein tur til veninna ho kallar familien sin i Bergen.

Fann eigen familie utan ektefelle og born

Edelmira frå Den dominikanske Republikk har fått så gode veninner i Noreg, at ho kallar dei for familien sin.
Publisert 27.01.2018 kl. 06.00.

– Tysnes er veldig ulikt Santiago, men eg likar å bu her. I Noreg er det mindre kriminalitet, seier Edelmira Nødland.

Ho sit med beina oppi den grå sofaen i kjellarleilegheita i Vågsåsen. På ein kommode bak ho står fleire bilete av ho sjølv i ulike aldrar, og bilete av tanteborn, som bur på andre sida av jorda.

Ti år har gått sidan ho kom til øya gjennom eksmannen, som ho har vore skilt frå halvparten av tida i Noreg.

– Eg har mange venar her. Samstundes er det mykje kjekt å gjera. Eg likar til dømes så gå tur i fjellet og trena, forklarar Edelmira, som denne dagen har vitjing frå veninna Ella Kari Henanger, som hjelper ho med å gjera seg forstått på norsk under intervjuet med Bladet Tysnes.

– Men det er litt kaldt her, innrømmer ho, og smiler.


Jobba som seljar

Frå heimlandet har ho erfaring frå ulike butikkjobbar, og var i sju år tilsett som kleseljar. I ein periode kombinerte ho jobb og økonomistudiar, men fullførte aldri dei påbyrja studiane, fordi det blei for travelt.

– Eg var på arbeid om dagen, og skulle studera om kvelden. Det fungerte ikkje, fortel ho.

På Tysnes har ho fast stilling som reinhaldar på tannlegekontoret i Våge, og vikariat som reinhaldar på skulen på Gjerstad og rådhuset i Uggdal. Ofte får ho også spørsmål frå privatpersonar om å vaska.

– Eg likar å jobba. Eg synest det er kjekt. På den måten får eg treffa folk heile tida, fortel ho.

– Ho er godt likt, og nokre gongar får ho så mange førespurnadar at det blir for mykje å gjera, stadfestar venninna Ella Kari.

For ei stund sidan byrja Edelmira også med øvingskøyring for å ta serfikatet for personbil.

– Det treng eg når eg har vaskejobbar på ulike stadar. Det er tungvindt å gå på jobb eller vera avhengig av å bli køyrt, fortel ho.


Saknar familien

– Er du frå Sør-Amerika?

– Nei, Amerika, presiserer Edelmira.

Veggane i leilegheita er dekortert med fleire naturbilete i duse fargar. Eit lite bilete som førestiller eit kart over heimlandet, skil seg ut med sterk blå- og grønfarge.

Santiago de los Caballeros, den nest største byen i Den dominikanske republikk i Latin-Amerika, er heimbyen. Der vaks Edelmira opp på 1970- og 1980-talet i ein syskenflokk på ti. Tre systre og tre brør bur framleis i heimlandet. To systre har flytta til USA, og ei syster bur i Frankrike.

– Det har vore kjekt å veksa opp med så mange sysken. Eg saknar dei veldig, seier ho tydeleg rørt.

Ho fortel at ho var svært bekymra då orkanen Irma herja i Karibien og USA i slutten av august og september i fjor. Orkanen er den sterkaste som nokonsinne er registrert, varte i 37 timar, og kravde minst 134 menneskeliv, ifølgje TV2.

– Eg var så bekymra at eg ikkje fekk sova, men heldigvis gjekk det bra med familien min, seier Edelmira.

– Eg prøver å vitja dei ein gong i året, men det blir dyrt å dra dit oftare, seier ho.


Jul i byen

Sjølv om den biologiske familien bur andre sida av jorda, har ho mange nære venar på Tysnes og i Bergen. På Tysnes har ho mellom anna fleire filipinske veninner. Tre av veninnene i byen er frå same stad som Edelmira, og ho vitjar dei nesten kvar helg. Ei av dei er så nær at dei feira jul saman, og ser på kvarandre som familie.

– Ja, det er familien min, forklarar Edelmira.

– Eg kjenner ein del frå Den dominikanske republikk som bur i Bergen. Det byrja med at eg trefte ei av dei på ferja til Tysnes, og me byrja og snakka, og fann ut at me begge er frå Den dominikanske republikk, forklarar ho.

Ho fortel at dei ofte et god mat saman, og kosar seg.

– Eg har mange venar, så eg er ikkje åleine, seier Edelmira.


Drøymer om fast jobb

– Eg plar ofte å tur gå oppover der, seier Edelmira, og peiker mot ein av oppoverbakkane i Vågsåsen.

Ute har snøen lagt seg for nokre dagar, og Edelmira har kledd seg i ein svart, lang boblejakke for å beskytta seg mot kulda.

I heimbyen Santiago de los Caballeros er temperaturen over 20 gradar, men på Tysnes er det truleg fleire månadar til ein kan pakka vekk ullgenseren.

Til helga skal Edelmira som ho plar til familien i Bergen. Men heime er og blir på Tysnes, og no drøymer ho om fast tilsetjing som reinhaldar på Tysnes skule og på rådhuset i Uggdal.

På den måten kan ho kanskje få ein annan draum oppfylt:

Nemleg å få råd til å hjelpa familien, slik at dei kan koma på vitjing til Noreg.


Siste saker Gå til framsida

Skal arrangera opplæringsjakt på Tysnes

Tysnes Jakt- og Fiskelag skal til helga arrangera opplæringsjakt.– Me er så heldige at me har fått tak i opplæringsterreng her på øya, og me er også så heldige at me skal arrangera opplæringsjakt i regi av Norges Jeger- og Fiskerforbund, fortel leiar i Tysnes Jakt- og Fiskelag, Bjarte Erstad.Fredag kveld er sett av til informasjon. Sjølve jakta vil føregå laurdag og søndag. Det...

Håpar på E39-vedtak før jul

Kor Langenuen skal kryssast av den nye ferjefrie E39, kan bli avgjort før jul. Det fortel prosjektleiar for E39 Stord-Tysnes-Os, Signe Eikenes, til «Tysnes».Dei to alternativa som det står mellom er sørleg kryssing ved Hodnanes-Jektevik (biletet) og eit midtre alternativ ved Raunholm-Neshamn. Kommunestyret i Tysnes har gått inn for kryssing i sør. Det har også nabokommunane.– Me...