BRONSE: Ei stolt Pernilla Eugenie Epland (Stord IL), etter medaljeløpet laurdag ettermiddag. (Foto: Raymond Ebbesvik)
BRONSE: Ei stolt Pernilla Eugenie Epland (Stord IL), etter medaljeløpet laurdag ettermiddag. (Foto: Raymond Ebbesvik)

Ny rekord og NM-medalje til Pernilla

Under innandørs NM i friidrett laurdag ettermiddag, slo Pernilla Eugenie Epland til med ny personleg rekord, og ein flott 3. plass.
Publisert 03.02.2018 kl. 15.58. Oppdatert 06.02.2018 kl. 12.29.

– Det gjekk bra dette. Eg var berre nokre hundredelar frå sølvet. Viss eg hadde starta spurten litt før, hadde eg kanskje slått ho, seier Epland.

Tysneskvinna innfridde stempelet som medaljefavoritt på 3000-meter, og vel så det.

Med ei sluttid på 9.30.38, fortset Epland å imponera på friidrettsbanen. Ho persa med tre sekund, etter den førre rekorden under Nornaleikane.


Stort felt

Epland, som spring for Stord IL, låg fint plassert i feltet, heilt frå startskotet gjekk.

Eigentleg var 3000 meteren planlagt gjennomført i to heat, men då fire ikkje stilte til start, blei heata slått saman.

– 16 personar blir veldig mange på ein så liten bane, seier Epland.

I byrjinga var det litt knuffing, og den første runden gjekk litt seinare enn Stord-løparen skulle ønskja.

Tre kvinner låg lenge i tet, og det var ei lita luke ned til Epland på fjerde plass.

– Pernilla blei liggjande ti meter bak feltet på tre-fire løparar. Då er det tungt å koma opp igjen, seier trenar Nils Hetleflåt i Stord IL.


Nær sølvet

Han er veldig godt fornøgd med prestasjonen eleven leverte under 3000-meteren.

Etter 1500 meter klarte Epland å tetta luka til dei framfor.

– Eg låg litt åleine der, men eg måtte jobba meg gradvis oppover. Eg visste at ho eine går veldig hardt ut, fortel Epland.

Belen Casetta frå Australia låg lenge i leiinga, men etter å ha dratt feltet, fekk ho det tøft på slutten. Det blei Camilla Elise Øxnevad Ziesler (Sandnes IL) som stakk av med sigeren. Ziesler er ein del av treningsgruppa til Gjert Ingebrigtsen, og det var liten tvil om kven som var best, då Sandnes-løparen skrudde opp farten.

Med ein suveren sluttspurt dei siste 200 metrane, var det ingen av dei andre løparane som hadde sjanse til å halda følgje med Ziesler.

Epland var svært nær ein andreplass, men kom 3-4 meter bak sølvvinnar Maria Sagnes Wågan (Namdal løpeklubb) i mål.


Første NM inne

Målsetjinga til Pernilla Eugenie Epland var å ta medalje, og tysnesingen er godt fornøgd med eigen innsats.

– Eg er midt i ein mengdetreningsperiode no på vinteren, og det var godt med nokre konkurransar no, seier ein glad bronsevinnar.

Epland deltok laurdag i sitt første innandørs NM i friidrett, som i år blei arrangert i Sandvika i Bærum.

No skal ho tilbake til harde treningsøkter på Tysnes og Stord. Sesongen byrjar for alvor i april. Om sommaren blir det mest fokus på baneløping, men Epland skal springa både halvmaraton og 10-kilometer komande sesong.


Tatt ut til landskamp

Tysdag kom ei spanande nyheit frå Tysnes si løpedronning. Til helga er det nordisk landskamp i friidrett, mellom Sverige, Finland, Danmark/Island og Norge, i Uppsala i Sverige.

Etter det sterke resultatet under NM, er Epland teken ut for å representera Norge.

Tysnesingen får debuten for Norge på innandørslandskampen, og skal springa 3000 meter

Tidlegare har ho representert Norge under nordisk meisterskap i terrengløp.


NORGESMEISTERSKAP: 3000 meter for kvinner gjekk av stabelen laurdag ettermiddag i Sandvika. Pernilla Eugenie Epland, som spring for Stord IL, har startnummer 262, midt i bildet. (Skjermdump: Live stream innandørs NM i Friidrett, Sandvika 2018)
NORGESMEISTERSKAP: 3000 meter for kvinner gjekk av stabelen laurdag ettermiddag i Sandvika. Pernilla Eugenie Epland, som spring for Stord IL, har startnummer 262, midt i bildet. (Skjermdump: Live stream innandørs NM i Friidrett, Sandvika 2018)
PÅ PALLEN: Tysnesingen Pernilla Eugenie Epland (t.h.) mottok bronsemedaljen like etter løpet laurdag ettermiddag. Vinnar blei Camilla Elise Øxnevad Ziesler (Sandnes IL) i midten. Maria Sagnes Wågan (Namdal løpeklubb), til venstre, fekk sølvmedaljen. (Foto: Raymond Ebbesvik)
PÅ PALLEN: Tysnesingen Pernilla Eugenie Epland (t.h.) mottok bronsemedaljen like etter løpet laurdag ettermiddag. Vinnar blei Camilla Elise Øxnevad Ziesler (Sandnes IL) i midten. Maria Sagnes Wågan (Namdal løpeklubb), til venstre, fekk sølvmedaljen. (Foto: Raymond Ebbesvik)
LØP: Epland (262) i fint driv, nærast kameraet. (Foto: Raymond Ebbesvik)
LØP: Epland (262) i fint driv, nærast kameraet. (Foto: Raymond Ebbesvik)

Siste saker Gå til framsida

Inviterer til foredrag om lyssiv og knappsiv

Laurdag 26. mai er det duka for eit foredrag på skulemuseet om knappsiv og lyssiv – og korleis ein bør gå fram for å bli kvitt dei. Grendalaget i Solheimsdalen har invitert Wiktoria Kaczmarek-Derda, som har skrive doktoravhandling om lyssiv og knappsiv, til å halda foredrag om temaet.– Noko av bakgrunnen er jo mellom anna det eg har sett på mitt eige småbruk på Brekke. Beita mine...