BFF: Ingen tvil om at Kristi Sandvik Pedersen og Alexa Ford er «best friends forever». (Foto: Camilla Korsnes)
BFF: Ingen tvil om at Kristi Sandvik Pedersen og Alexa Ford er «best friends forever». (Foto: Camilla Korsnes)

Vener for livet

Med første augekast skulle ein nesten tru at dei er søstre, men Kristi Sandvik Pedersen (20) og Alexa Ford (20) kjem frå kvar si side av jordkloden.
Publisert 03.02.2018 kl. 06.00.

– Eg håpte eg skulle møta vener for livet då eg reiste på utveksling, og det gjorde eg, seier Kristi med eitt breitt smil.

Å reisa til Australia på utveksling, skulle bli ei oppleving tysnesingen seint kjem til å gløyma.

Alexa Ford heiter ho. Australiaren som inviterte den nye norske utvekslingseleven i bursdagsselskapet sitt i 2015.

Sidan den dagen har det vore dei to. Kristi og Alexa. Og at den eine no bur i Australia og den andre i Norge, har ikkje stansa veninnene frå å halda kontakt.


Viser fram Tysnes

– Me har møttest fem gonger dei siste tre åra, seier Kristi.

Videosamtalar éin gong i månaden, og chatting dagleg, gjer at dei to framleis har god kontakt.

No er Kristi storfornøgd med å ha den australske veninna på besøk på Tysnes.

I to veker har dei farta rundt på Tysnes og i fylket.

– Me har vore på ski, på gåturar, besøkt Bergen, ete på Mandelhuset og hatt spadag på Solstrand. Eg må visa ho Norge, fortel Kristi.

Alexa er på sitt andre tysnesbesøk. I 2016 fekk ho med seg på både Tysnesfest og ein tur til Preikestolen.


Uvanleg med oppoverski

Denne gongen har Alexa, som kjem frå storbyen Perth, fått oppleva Tysnes i eit litt kaldare klima.

I storm og skikkeleg vestlandsvêr, gjekk dei tur til Blåbærhaugen.

Langt finare vêr var det då dei var på langrennstur på Voss.

– Du hata meg litt på veg opp, seier Kristi med eit lurt smil til veninna.

Jo, Alexa vedgår det.

– Men det er rart å gå på ski oppover fjellet, svarar ho raskt.

Den smilande australiaren hadde betre dreis på nedoverkøyringa.


Kontakt kvar dag

Alexa nyttar ferien sin til å besøka Norge og Tysnes.

Etter eitt år som student på universitetet, jobba ho i Disneyworld i USA i eitt år.

På veg heim til Australia igjen, tok ho turen innom Tysnes.

Sjølv om dei bur på forskjellige kontinent, passar veninnene på å ha god kontakt. Tidlegare har dei møttest i både London, Hellas og Florida.

Kristi studerer no juss, ved Universitetet i Bergen. Ho er utruleg glad for at ho valde eit år som utvekslingsstudent på vidaregåande.


Nesten familie

Dei to veninnene har knytt eit sterkt band, og er vande med å få spørsmål om dei er søstre.

– Men det kjennest som me er familie, seier Alexa, og ser bort på Kristi.

Ho smiler og nikkar. Alexa sitt norgesbesøk nærmar seg slutten, men dei har allereie byrja å planleggja det neste møtet. Det er ikkje usansynleg at den unge australiaren frå Perth blir å sjå på Tysnes igjen.

Welcome back, Alexa!


LANGRENN: Australske Alexa Ford (t.v.) var ikkje vand med å gå på ski oppover fjellet. Kristi Sandvik Pedersen viste fram korleis nordmenn går på ski. (Foto: Privat)
LANGRENN: Australske Alexa Ford (t.v.) var ikkje vand med å gå på ski oppover fjellet. Kristi Sandvik Pedersen viste fram korleis nordmenn går på ski. (Foto: Privat)
KOS: Middag på Mandelhuset høyrte med under norgesbesøket til Alexa. (Foto: Privat)
KOS: Middag på Mandelhuset høyrte med under norgesbesøket til Alexa. (Foto: Privat)
MARSHMALLOWS: Alexa fekk vera med på tur i skogen, der dei to grilla marshmallows. (Foto: Privat)
MARSHMALLOWS: Alexa fekk vera med på tur i skogen, der dei to grilla marshmallows. (Foto: Privat)

Siste saker Gå til framsida

Skal arrangera opplæringsjakt på Tysnes

Tysnes Jakt- og Fiskelag skal til helga arrangera opplæringsjakt.– Me er så heldige at me har fått tak i opplæringsterreng her på øya, og me er også så heldige at me skal arrangera opplæringsjakt i regi av Norges Jeger- og Fiskerforbund, fortel leiar i Tysnes Jakt- og Fiskelag, Bjarte Erstad.Fredag kveld er sett av til informasjon. Sjølve jakta vil føregå laurdag og søndag. Det...

Håpar på E39-vedtak før jul

Kor Langenuen skal kryssast av den nye ferjefrie E39, kan bli avgjort før jul. Det fortel prosjektleiar for E39 Stord-Tysnes-Os, Signe Eikenes, til «Tysnes».Dei to alternativa som det står mellom er sørleg kryssing ved Hodnanes-Jektevik (biletet) og eit midtre alternativ ved Raunholm-Neshamn. Kommunestyret i Tysnes har gått inn for kryssing i sør. Det har også nabokommunane.– Me...