SKRYT: Kundane Kjell Nilsen og Hilde Walaker synest lokala er blitt kjempeflotte hos Kompasset bar.
SKRYT: Kundane Kjell Nilsen og Hilde Walaker synest lokala er blitt kjempeflotte hos Kompasset bar.

Håpar dei lukkast med satsinga

Fredag og laurdag var det opningshelg av Uggdal sin nye pub, hos Tysnes Sjø og Fritid.
Publisert 04.02.2018 kl. 21.48. Oppdatert 06.02.2018 kl. 11.50.

– Det var veldig fint her. Me håpar dei får det til å gå rundt, seier Kjell Nilsen.

Laurdag kveld hadde han funne plass i ein skinnsofa, saman med kona Hilde Walaker.

Dei har fått kvar sin irish coffee i handa, som dei sit og nippar til, medan dei studerer lokalet rundt seg.

På opningsdagen fredag, hadde om lag 60 personar teke turen innom Kompasset bar.


Sakna tilbod

Bak bardisken står Marianne Elgsås og Jeanette Olsen. Dei er veldig godt fornøgde med opningsdagen, og tilbakemeldingane dei har fått frå kundane.

– Opninga har gått veldig fint. Det var godt med folk. Mykje godt vaksne folk hadde teke turen, seier Olsen.

Billiardbordet og dartspelet blei begge tatt i bruk av gjestane.

– Det verkar som folk har sakna eit tilbod her på Tysnes Sjø og Fritid. Mange viste stor glede over at me har opna igjen, fortel Olsen.


Kaffi og klogger

Målet er å vera ein pub, der alle er velkomne. Her blir det ingen kleskode ein treng å følgja.

– Om ein vil koma i klogger og arbeidsklede, er ein hjarteleg velkommen, seier Olsen.

I den flunkande nye baren, har dei også fått på plass kaffimaskin. Etter å ha gjennomført baristakurs, likar Olsen å eksperimentera med ulike smakar på kaffien.

– Det er viktig å kunna servera skikkeleg kaffi, seier ho og smiler.


Noko Tysnes trengte

Det er ei lun stemning i Tysnes Sjø og Fritid sitt lokale tidleg laurdag kveld.

– Dei har fyllt eit hol som manglar, seier ein av kundane i baren.

Her kjem han til å koma igjen. Det er heilt sikkert.

– Dette er noko Tysnes kanskje trengte, seier Robert Elgsås, som også sit ved bardisken.

Han bur til vanleg på Askøy, men i helgene er han ofte heime på Tysnes. Då mora Marianne skulle opna bar, var det naturleg å leggja inn nokre arbeidstimar med både oppussing og barbyggjing.

Både mor og son Elgsås gler seg over at så mange tok turen på opningsdagen.

– Eg håpar folk kjem til å nytta seg av tilbodet, seier Robert.


Bergensturistar

Nilsen og Walaker er to kundar som garantert kjem tilbake.

– Det er kjempeflott med lokale tiltak, seier ekteparet.

Dei har leilegheit nede på bryggjekanten, og har berre nokre få meter bort til den nye puben.

– Kanskje dette kan bli ein ny samlingsstad på Tysnes, undrar Walaker.

Sjølv er dei busette i Bergen, men rett som det er, tar dei seg ein tur til leilegheita i Uggdal.

Spesielt om sommaren håpar dei at den nye aktiviteten ved Tysnes Sjø og Fritid vil føra til meir aktivitet i området.

– Me har sett båtar som har kome inn her, og berre snudd, seier Nilsen.

No gjenstår det berre å sjå om tysnesingar og tilreisande kjem til å ta tilbodet i bruk, og om det er rom for ein ny utestad på Tysnes.


Store planar

Framover er planen å ha ope Kompasset bar kvar fredag og laurdag kveld.

Dei to driftige damene på Tysnes Sjø og Fritid, har mange prosjekt på gong. Baropninga er berre starten. I overetasjen skal dei etter kvart leiga ut selskapslokale.

Og allereie før sommarsesongen startar, ønskjer Olsen og Elgsås å opna for matservering.


VERTSKAP: Marianne Elgsås (t.v.) og Jeanette Olsen er strålande fornøgde med opningshelga.
VERTSKAP: Marianne Elgsås (t.v.) og Jeanette Olsen er strålande fornøgde med opningshelga.
SMAKFULL: Det er ingenting å seia på smaken på caffè mocchaen som blir servert på Kompasset bar.
SMAKFULL: Det er ingenting å seia på smaken på caffè mocchaen som blir servert på Kompasset bar.
BARISTAKURS: Jeanette Olsen har gått på baristakurs, for å kunna servera kundane god kaffi.
BARISTAKURS: Jeanette Olsen har gått på baristakurs, for å kunna servera kundane god kaffi.
GÅVER: Bedrifter og kundar hadde med blomar, gåver og eit måleri (t.h) av Johannes Kretschmer til nyopninga.
GÅVER: Bedrifter og kundar hadde med blomar, gåver og eit måleri (t.h) av Johannes Kretschmer til nyopninga.

Siste saker Gå til framsida

Einaste jenta i klassen som fullførte

Monica Rennesvik Borgen (21) frå Onarheim er av den tøffe typen. At det er nesten berre gutar som blir maskinistar, har ikkje stansa Borgen frå å følgja draumen.