FLOTT LANDSKAP: Jæren er mellom anna kjend for sine mange og lange sandstrender. (Foto: Camilla Korsnes)
FLOTT LANDSKAP: Jæren er mellom anna kjend for sine mange og lange sandstrender. (Foto: Camilla Korsnes)

Arrangerer busstur til vakre Jæren

Også i år inviterer Tysnes støtteforeining til ein opplevingsrik busstur.
Publisert 06.02.2018 kl. 12.15.

28.-30. mai går turen sørover til Stavanger og Jæren, og programmet er allereie spikra.

– Me vonar mange ser fram mot ein flott og innhaldsrik tur, seier reiseleiar Harald Heie.

Det er selskapet Plussreiser som er teknisk arrangør av reisa. Bussjåfør vert som vanleg utflytta tysnesing Svein Bjarne Aase, som med sin lune veremåte bind turane og folk saman på ein god måte.


Ut mot storhavet

Fyrste dagen vert det guida rundtur i Stavanger – oljebyen framfor alle andre i landet, men også kulturbyen. Litt shopping og rusling på eiga hand er det også tid til.

– Vidare går turen til Jæren, eit landskap heilt ulikt vårt. Me skal bu på Jæren Hotel på Bryne, og her skal me bu i to netter, fortel Heie.

Neste dag går turen til Arne Garborg sin heim og til Knudaheio som Garborg bygde som sommarhus i 1898.

– Me har med guide som viser rundt og fortel historia. Her får me oppleva den fantastiske utsikta over Jæren og havet. Deretter skal me til Hå gamle prestegard, heilt ute mot storhavet.

Prestegarden er frå 1637, og er i dag eit moderne kunst- og kultursenter.


Eit godt miljø

Før reisefylgjet set kursen heim igjen, skal dei også innom Figgjo porselensfabrikk ved Ålgård.

– Her får me sett oss litt rundt, og dei som ynskjer det kan handla i butikken der, seier Heie, som gler seg til nok ein tur med Tysnes støtteforening.

På turane legg dei vinn på å ha det sosialt og kjekt, i eit trygt og godt miljø.

– Dette er noko me må leva lenge på! For dei som vil, legg me opp til hyggekveld og festkveld med litt program på hotellet, sluttar ein forhåpningsfull Heie.


Siste saker Gå til framsida

Klar visjon for nye Tysnes skule

101 millionar for eit nytt skulebygg kan verka dyrt, men Kåre Martin Kleppe (H) og Anne Merete Fjeldstad (Ap) er tydelege på at det er ei investering i framtida.