KJEM TILBAKE: Oslo Ess var på Tysnesfest - og på Tysnessåto - i 2014. Til sommaren opptrer dei på ny på Tysnesfest. (Arkivfoto: Randi Kleppe)
KJEM TILBAKE: Oslo Ess var på Tysnesfest - og på Tysnessåto - i 2014. Til sommaren opptrer dei på ny på Tysnesfest. (Arkivfoto: Randi Kleppe)

Oslo-Ess tilbake til Tysnesfest

Folk strøymde til Tysnessåto då Oslo Ess spelte på den fyrste såtekonserten i 2014. No kjem bandet tilbake, i lag med OnklP & De Fjerne Slektningene.
Publisert 11.02.2018 kl. 06.00. Oppdatert kl. 22.42.

– Det blir ein hitparade av dei sjeldne når både OnklP & De Fjerne Slektningene og Oslo Ess kjem til Tysnesfest, lovar dagleg leiar i Tysnesfest, Øystein Vaage.

Tidlegare har begge banda vore på Tysnesfest, men kvar for seg. Denne gongen skal dei stå saman på scenen, og dei skal avslutta den fyrste konsertkvelden på Tysnesfest 2018, på Gjerstad.

– Det blir eit av årets mest forrykande musikalske samarbeid, spesiallaga for Tysnesfest, lovar Vaage.


Likte seg på Såto

Konserten med Oslo Ess på Såto i 2014 skulle eigentleg vara i ein halvtime. Det vart i staden 45 minutt.

– Eg føler for å spela meir, sa vokalist Åsmund Lande, med slektsrøter frå Tysnes, før bandet heldt fram såtekonserten med fleire låtar til, til applaus frå publikum.

Åsmund Lande og bandet hans likte seg veldig godt på Såto.

– «Jeg kunne tenkt meg å bare bli her, jeg. Dette er det aller, aller koseligste jeg har opplevd noensinne. Så ærlig skal jeg være», la han til, til jubel frå publikum.

Til sommaren kan Oslo Ess-entusiastar på ny få høyra bandet på Tysnes.


Spelte for 5.000

Populære OnklP & De Fjerne Slektningene fekk æra av å spela for fem tusen på Gjerstad då dei var her i 2015. Då stod dei på scenen laurdagskvelden – i lag med andre artistar som Carola, Matoma, Briskeby og Ralph Myerz & The Jack Herren Band.

Sist OnklP var på Tysnes, avslutta bandet konsert med monsterhiten «Styggen på ryggen», som på den tida gjekk som ein farsott landet over.

«Styggen på ryggen» er i dag åleine strøyma nesten 20 millionar gonger på Spotify.


Vann Alarmprisen

Pål Tøien, som er det eigentlege namnet hans, slo gjennom i 2005, saman med Jaa9, då dei vann Alarmprisen. I 2012 medvirka OnklP på Oslo Ess-låten «Fritt fram».

I 2013 starta han, saman med nokre av medlemmene i Oslo Ess, rap/rockgruppa OnklP & De fjerne slektningene. «Styggen på ryggen» vart alt då årets låt, og gruppa årets liveartist på P3 Gull i 2014.

Rockebandet Oslo Ess vart skipa i 2010. Bandet er mellom anna kjent for låtane «Alt jeg trenger» og «Bislett stadion». Sistnemnde avslutta dei såtekonserten med i 2014.


Mange store

Til no er fylgjande artistar lansert til Tysnesfest 2018:

Alan Walker, Susanne Sundfør, Miss Tati, Adam Douglas, Gåte, OnklP & De Fjerne Slektningene, Bigbang, Oslo Ess, Kari Bremnes, Amanda Delara, Dagny, Gardsbruk, The Vossa Rebels.


KJEM OGSÅ ATT: OnklP & De Fjerne Slektningene har også vore på Tysnesfest tidlegare. Til sommaren står dei på scenen på Gjerstad torsdag kveld. (Pressefoto: Jørn Veberg)
KJEM OGSÅ ATT: OnklP & De Fjerne Slektningene har også vore på Tysnesfest tidlegare. Til sommaren står dei på scenen på Gjerstad torsdag kveld. (Pressefoto: Jørn Veberg)

Siste saker Gå til framsida

Øvde på livredning

Torsdag sist veke møtte 19 engasjerte hålandsnesingar opp i grendahuset for å bli oppdaterte på førstehjelp.