FRÅ VING: Lene Rønning Sævartveit med eit godt målforsøk i 1. omgang.
FRÅ VING: Lene Rønning Sævartveit med eit godt målforsøk i 1. omgang.

Litt for lett match mot Salhus

Kampen fredag kveld var nærast som ein spasertur i parken for tysnesdamene. Resultatet vart 30-12.
Publisert 17.02.2018 kl. 12.28. Oppdatert kl. 14.23.

Etter fleire misslukka angrep frå begge lag, scora Martine Siglevik Lunde 1-0 for heimelaget. Så viste Linn Bergesen seg frå strek, og tredje spelar med nettkjenning blei Signe Pettersen Opdal, med eit fint mål frå ving.

Bak heldt Lea Sofie Trondsen Dalland målet reint i nesten eit kvarter, medan laget hennar heldt fram med å scora. Tysnes sine 5. divisjonsdamer fekk nemleg inn heile sju mål før gjestene lukkast i angrep.

Til pause var stillinga 14-7.


Daffa av garde

Det var ein litt spesiell kamp som fann stad i Tysneshallen denne kvelden. Salhusdamene såg ikkje ut til å ta det heile spesielt alvorleg, fniste ein del og kom med utsegner som «Dei er så flinke» og «No blei eg litt redd».

Ei anna historie er det låge tempoet deira, som gjorde det vanskeleg for tysnesdamene å få til vanleg god gang i spelet sitt.

– Eg er jo ikkje svett eingong, kommenterte den eine dommaren humoristisk.

Heimelaget vart på ingen måte pressa til å prestera maks, og det vart litt for mange personlege feil og bomskot.


Dei yngste fekk vist seg

Talet på bomskot til trass, Tysnes var det suverent beste laget, og hadde heile vegen ei stor leiing. Dei unge og lovande kunne difor få skina på banen endå litt meir enn vanleg, og mange av dei bidrog med scoringar. Det var heile vegen ei god utskifting av spelarar.

– Dei glimtar til, desse 16-åringane, sa hovudtrenar Sveinung Halvorsen etter at dommarane bles av til sluttresultatet 30-12.

Men ifølgje trenaren kunne målskilnaden godt ha vore større.

– Me burde hatt meir enn 30 mål i dag, men det held sjølvsagt. I ein timeout gav eg dei beskjed om at det blei 50 sit-ups for kvart bomskot, sa Halvorsen lurt.

Han drog elles fram det treige tempoet.

– Dei dett bak på hælane, og det blir vanskeleg å halda motivasjonen oppe, kommenterte trenaren til lokalavisa.

Tysnes ligg på 3. plass på tabellen, med sju sigrar og fire tap. 10. mars møter dei Lindås, som har like mange poeng, men såvidt kjem litt dårlegare ut på målskilnad, og dermed ligg på 4. plass.


Desse var med:

Lea Sofie Trondsen Dalland, Kristin van der Meeren (5), Hannah Rød Halvorsen, Signe Pettersen Opdal (3), Maria Lillesletten Hagen (4), Linn Bergesen (4), Karoline Helland (1), Eline Teigland Bakke (2), Thea Sløgedal (7), Martine Siglevik Lunde (2), Norunn Ebbesvik (1), Julie Bakke (1), og Lene Rønning Sævartveit.


JOBBA GODT: Lea Sofie Trondsen Dalland kan ta mykje av æra for at Tysnes heldt nullen det fyrste kvarteret.
JOBBA GODT: Lea Sofie Trondsen Dalland kan ta mykje av æra for at Tysnes heldt nullen det fyrste kvarteret.
FORSVAR: Tysnesdamene i forsvar, klare for å møta det som måtte komma. F.v. Maria Lillesletten Hagen og Linn Bergesen.
FORSVAR: Tysnesdamene i forsvar, klare for å møta det som måtte komma. F.v. Maria Lillesletten Hagen og Linn Bergesen.
FIRE MÅL: Maria Lillesletten Hagen (fremst) har hatt ei fin utvikling på damelaget, og scora fire mål i kampen mot Salhus.
FIRE MÅL: Maria Lillesletten Hagen (fremst) har hatt ei fin utvikling på damelaget, og scora fire mål i kampen mot Salhus.
OVERTAK: Thea Sløgedal (midten) har snappa ballen frå dei blåkledde. Julie Bakke (t.h.) passar på.
OVERTAK: Thea Sløgedal (midten) har snappa ballen frå dei blåkledde. Julie Bakke (t.h.) passar på.

Siste saker Gå til framsida

Forventar ein kjekk konsert

– Julekonserten er ein årleg tradisjon. Onarheim Musikklag har hatt den så lenge eg har spelt med dei, for å seia det sånn, fortel Magne Storesætre.