HAND I HAND: På Stoke City sitt stadion fekk Hans Martin gå hand i hand med Premier League-spelaren Mauritz Bauer. (Foto privat)
HAND I HAND: På Stoke City sitt stadion fekk Hans Martin gå hand i hand med Premier League-spelaren Mauritz Bauer. (Foto privat)

Fekk storstila fotball-oppleving i England

Fotballfan Hans Martin Hansen (10) fekk eit ugløymeleg fotballmøte i England. På Stoke City sitt stadion fekk han vera maskot for fotballstjerna Mauritz Bauer.
Publisert 24.02.2018 kl. 18.00.

Det er fotball «for alle penga» for den unge fotballspelaren frå Vågsmarka som til dagleg går i fjerde klasse på Uggdal skule. Den største opplevinga i livet så langt er utan tvil møtet med Premier League-stjerna Mauritz Bauer. Hans Martin fekk ikkje berre møta det store idolet, han fekk også vera maskoten til Mauritz og gå hand i hand i lag med den austerriske landslagsspelaren inn på Stoke sin bane Bet365 Stadium framfor 28.000 tilskodarar, i kampen Stoke-Watford.

Alle dei elleve spelarane har kvar sin maskot som går hand i hand ut på banen før kampen tek til.


På Olympic stadion

Å få vera maskot hos dei store fotballklubbane i England er populært. Så populært at det er svært vanskeleg å koma gjennom nålauga. Pappa Gunnar Hansen stadfestar at det er vanskeleg å få ein plass. Då Gunnar kontakta Stoke, hadde dei berrre ein ledig maskotplass att for resten av 2018-sesongen.

Far og son kjenner berre ei handfull personar som har fått ei slik oppleving.

Då det positive svaret kom, var det berre å planleggja fotballtur til England. Det var tre skikkeleg fotballinteresserte karar som la i veg: Hans Martin, pappa Gunnar og onkel Nils Eivind.

No kan dei tre sjå tilbake på fire store dagar med fotballopplevingar. Reisefølgjet fekk fyrst med seg West Ham-Crystal Palace på Olympic stadion i London med 60.000 tilskodarar om tysdagen. Stoke-kampen gjekk onsdagen. Torsdagen var dei på fotballmuseum i Manchester. Fredag var det heimreisedag.

– Ja, dette var gøy, strålar ungguten.


Storstila opplegg

Skal ein vera maskot for ein stor engelsk fotballklubb, må ein følgja eit storstila opplegg. Ein kan ikkje koma slengjande ti minutt før kampstart.

– Me måtte møta tre timar før kampen tok til, fortel den unge entusiasten Hans Martin.

Der vart dei inviterte inn i eit eige rom, maskotane sitt rom. Her var det garderobeplass der kvar maskot hadde fått sin eigen namngitte plass. Etter velkomsten fekk dei vera med på maskot-lunsj.

Dei fekk og omvising i heimegarderoben til spelarane, der draktene til fotballstjernene hang på rekkje og rad.

– Det var stort å få omvising i garderoben deira, seier Hans Martin, og smiler over heile ansiktet.

Endå større var opplevinga for maskotane då dei fekk vera med og ta imot spelarane då dei kom til stadion og garderoben to timar før kampstart.

I minutta som følgde var det mange unge autografjegerar som fekk som sikra seg namnetrekka til dei populære spelarane.


Høgdepunktet

Innlagt i programmet var også ein lunsjpause. Det var før stjernene kom. Ei treningsøkt på 20 minutt fekk dei og vera med på. For ein ung kar frå Norge kunne nok engelsken vera ei utfordring. Då var det til god hjelp at ein av juniortrenarane hadde vore på norgesbesøk og kunne litt norsk.

På delar av stadionvitjinga fekk foreldra til maskotane vera med. Men då dei skulle ta imot spelarane, måtte foreldra venta utanfor stadionporten.

Foreldra fekk heller ikkje vera med under treningsøkta til maskotane ute på stadionmatta. Men både maskotar og foreldre fekk testa managerstolen og innbytarbenken.

Det store høgdepunktet var likevel då maskotane kom gåande inn på banen hand i hand med dei store fotballstjernene.

Fyrst kom dommaren inn på banen, deretter kom spelarane og maskotane.

Inne på banen helsa dei på alle motspelarane.

Då det faste programmet var unnagjort, og kampen skulle blåsast i gang, drog maskotane seg tilbake. Under kampen sat dei på tribunen heilt nede ved grasmatta.


Ein gong i livet

Hans Martin og pappa er klare på at maskotopplevinga er ei «ein-gong-i-livet»-oppleving.

I fotball-familien Hansen har det rett nok skjedd før; tre nevøar av Gunnar har fått vore maskotar på Stoke.

– Det blir nok berre denne gongen, seier pappa, og fotballguten nikkar samtykkjande.

Men fotballturar til England kan det verta fleire av. For tiåringen var turen til England den tredje i rekkja. Sju kampar i dei øverste divisjonane i England har Hans Martin fått med seg.

På fjernsynet eller Ipad’en heime i stova eller på guterommet er det ofte fotball.

– Engelsk fotball er heilt topp, seier Hans Martin, og gliser.

Men han sit ikkje berre i ro og ser på. Han har spelt fotball i Njardar sidan han var fem år. No trenar han på Reiso tre-fire dagar i veka, med pappa som ein av trenarane. Og så blir det litt fotball i friminutta på skulen også.

– Å spela framme og få scora mål er gøy, seier han, men han får også prøva seg på andre plassar på banen.


GARDEROBE-OPPLEVING: Her er Hans Martin fotografert framfor drakta til stjernespelaren Shaqiri. (Foto privat)
GARDEROBE-OPPLEVING: Her er Hans Martin fotografert framfor drakta til stjernespelaren Shaqiri. (Foto privat)
HELSAR: Hans Martin fremst, Mauritz Bauer etterpå. Her helsar dei på spelarane til Watford. (Foto privat)
HELSAR: Hans Martin fremst, Mauritz Bauer etterpå. Her helsar dei på spelarane til Watford. (Foto privat)
FOTBALL-OPPLEVING: Fotballfan Hans Martin Hansen (10) fekk ei «ein gong i livet-oppleving» fortel om at uforgløymeleg fotballmøte i England.
FOTBALL-OPPLEVING: Fotballfan Hans Martin Hansen (10) fekk ei «ein gong i livet-oppleving» fortel om at uforgløymeleg fotballmøte i England.
INN PÅ BANEN: Maskotane og spelarane på veg inn på banen - framfor 28.000 tilskodarar. (Foto privat)
INN PÅ BANEN: Maskotane og spelarane på veg inn på banen - framfor 28.000 tilskodarar. (Foto privat)
MANAGERSTOLEN: Stas å få testa managerstolen. (Foto privat)
MANAGERSTOLEN: Stas å få testa managerstolen. (Foto privat)

Siste saker Gå til framsida

Uver stoppa både Hodnanes-ferja og Våge-ferja

Ferjesambandet Hodnanes-Jektevik-Nordhuglo var innstilt på grunn av verforholda fredag kveld, frå i 21-tida til 21.40. Norled melde om innstilt rute klokka 20.53. Klokka 21.35 melde selskapet at ferja kjem i gang att klokka 21.40.Klokka 21.05 melde FosenNamsos Sjø at MF «Selbjørnsfjord» har kansellert avgangane klokka 21.05 frå Halhjem og 22.15 frå Våge på grunn av verforholda.