HORDALENDINGAR: Dei beste skiskyttarane frå Hordaland var samla under Hovedlandsrennet i Brumunddal i helga. Tysnesing Hedda Singelstad Kåsa står framme, nummer to frå venstre. (Foto: Lars Heine Kåsa)
HORDALENDINGAR: Dei beste skiskyttarane frå Hordaland var samla under Hovedlandsrennet i Brumunddal i helga. Tysnesing Hedda Singelstad Kåsa står framme, nummer to frå venstre. (Foto: Lars Heine Kåsa)

Hedda teken ut til nasjonalt skirenn, trass massevelt i helga

Dei gode prestasjonane denne sesongen har gitt Hedda Singelstad Kåsa ein plass på startstreken under Young Star-rennet i Holmenkollen.
Publisert 06.03.2018 kl. 18.17. Oppdatert 07.03.2018 kl. 08.42.

Ho er teken ut som den einaste skiskyttaren frå Hordaland til Young Star.

I samband med World Cup-rennet i Holmenkollen 17. mars, arrangerer Norges Skiskytterforbund eit eige renn for dei beste 15-16-åringane i Norge. Flotte resultat frå blant anna Kvalfoss-sprinten, sikra tysnesjenta tur til Holmenkollen.

Men det gjekk ikkje heilt på skinner under Hovedlandsrennet i helga.


Kaldt og tøffe løyper

– Eg fekk det ikkje heilt til å stemma i løypa, fortel Kåsa, vel heime på Tysnes.

Ho fekk verkeleg prøvd seg under dei tre renna på Hovedlandsrennet.

– Eg var på veg til å bli sjuk, og då fungerte ikkje kroppen heilt som eg ville, seier skiskyttaren frå Hålandsdal Idrettslag.

Sjølv om ikkje toppfarta var heilt på plass i sporet, gjekk det betre på standplass. Under normaldistansen på seks kilometer, trefte ho blink på åtte av ti skot. Av 47 startande hamna ho på ein 31. plass.

Under sprinten laurdag, var forma litt betre, og Kåsa fekk ein 24. plass.


Massevelt

Verre var det under stafetten søndag. Der representerte ho Hordaland i jenteklassen, og skulle gå førsteetappe.

– Det var ein litt trøblete start. Eg datt i den første bakken. Det var ein massevelt, fortel Kåsa.

Trass den uheldige starten klarte tysnesjenta å henta seg inn igjen. Etter første skyting låg ho på ein fjerdeplass.

Ut på andrerunden blei det likevel tøft .

– Det var veldig kaldt, og eg kjente ikkje fingrane mine inn til andre skyting.

Med tre ekstraskot unngjekk ho akkurat strafferundar. Hordaland endte til slutt på ein 12. plass.


Kan ikkje gå knirkefritt

Hedda Singelstad Kåsa har stått på pallen fleire gonger denne sesongen, og ho deppar ikkje over litt dårlege resultat i Brumunddal.

– No må eg bli heilt frisk, og koma meg i god form til dei neste renna, seier Kåsa.

Ho fortel om ei fantastisk helg på Hovedlandsrennet, og om kor god erfaring det er å vera med på slike store arrangement.

– Eg hadde kanskje forhåpningar om litt betre resultat, men slik går det av og til. Eg har hatt ein kjempesesong så langt. Det kan ikkje gå knirkefritt heile tida, seier den reflekterte 10. klassingen.


RENN: Det gjekk ikkje like fort i sporet under Hovedlandsrennet, som Hedda Singelstad Kåsa er van med. No må sjukdommen ut av kroppen, før Young Star-rennet i Holmenkollen. (Foto: Lars Heine Kåsa)
RENN: Det gjekk ikkje like fort i sporet under Hovedlandsrennet, som Hedda Singelstad Kåsa er van med. No må sjukdommen ut av kroppen, før Young Star-rennet i Holmenkollen. (Foto: Lars Heine Kåsa)

Siste saker Gå til framsida

Debatt: Avisa skal fram

Det er viktig at regjeringa legg til rette for distribusjonsløysingar som er føreseielege på ein slik måte at det er råd for avisene å tilpassa utgjevingane sine. Regjeringa vil no kutta ned på postomberingsdagar til 2,5 dag i snitt kvar veke. Framlegget er at eine veka er det postlevering måndag, onsdag og fredag, og andre veka er tysdag og torsdag. Det gjer at avislevering ikkje er...