SKOGSKAFFI: Vegard Helland serverte skogskaffi. Her er det Celine Skorpen som får rykande varme dråpar i koppen.
SKOGSKAFFI: Vegard Helland serverte skogskaffi. Her er det Celine Skorpen som får rykande varme dråpar i koppen.

Serverte skogskaffi på populær skogdag på Flatråker

Dei frammøtte kosa seg med både skogskaffi, risengrynsgraut og varme pølser då Tysnes skogeigarlag inviterte til skogdag på Flatråker laurdag. Men det aller viktigaste var skogspraten.
Publisert 11.03.2018 kl. 21.05. Oppdatert kl. 21.13.

– Det skal vera både sosialt og fagleg, kommenterer leiar i skogeigarlaget og primus motor skogdagen, Fredrik Landeråen til «Tysnes», i det han ser seg ikring og gledeleg kan konstatera at det aldri før har vore så mange på ein skogsdag på Flatråker i regi av skogeigarlaget.

Ivrige sjeler i arrangørstaben skal ha kome til at kring 150 tok turen innover på skogsbilvegen på sørvestsida av Flatråkervatnet og fram til samlingsplassen midt inne i skogen.

– Ja, det er veldig bra med folk her. Eg trur folk likar seg, og eg trur kombinasjonen av det faglege og det sosiale fengjer, seier ein nøgd skogeigarlagsleiar.

Henrik Aakre er ein av dei som har teke turen. Han skryt over opplegget, og rosar Fredrik Landeråen for engasjementet for opplegget.

På skogdagen er det både demonstrasjonar av skogsutstyr, fleire ulike stand med sal av varer og god tid for ein skogsprat med naboar og kjende.

Vegard Helland er sjef for skogskaffien, og serverer rykande varm kaffi til alle som vil ha.

– Me har teke turen for å sjå om det er noko som er interessant for oss, og så er det jo litt sosialt også, seier Celine Skorpen, i det ho får servert kaffi.

Ho bur på eit småbruk på Mevatne, med ein del tilhøyrande skog.

Bygdekvinnelaget har ansvaret for grautserveringa og dei varme pølsene. Bak disken står Kjersti Godø, Gerd Landeråen og Vibeke Søreide, og ved grillen Bjørg Espevik.

Eit populært innslag for dei aller yngste er tilbodet om riding. Anita Frotjold Anderssen har teke turen frå Reksteren med to av hestane sine; ein fjording og ein shetlandsponny. Til tider er det kø for å ri.

– Det er kjekt å visa fram hestane og gjera noko som kan få borna interesserte i riding, seier Anita.

Signe Baugstø (6) frå Uggdal har hatt ein fin dag.

– Det var kjekt å ri, seier ho, og smiler breidt.

Les meir frå skogdagen i papiravisa på torsdag.

Ole Skaten

ole@tysnesbladet.no





20 LITER GRAUT: Bygdekvinnelaget stod for grautserveringa. F.v. Kjersti Godøy, Gerd Landeråen og Vibeke Søreide.
20 LITER GRAUT: Bygdekvinnelaget stod for grautserveringa. F.v. Kjersti Godøy, Gerd Landeråen og Vibeke Søreide.
VARME PØLSER: Bjørg Espevik, også ho frå bygdekvinnelaget, hadde ansvaret for pølseserveringa.
VARME PØLSER: Bjørg Espevik, også ho frå bygdekvinnelaget, hadde ansvaret for pølseserveringa.
STAS Å FÅ RI: Signe Bergstø (6) frå Uggdal synest det var kjekt å ri. Hesteeigar Anita Frotjold Anderssen hjelper til.
STAS Å FÅ RI: Signe Bergstø (6) frå Uggdal synest det var kjekt å ri. Hesteeigar Anita Frotjold Anderssen hjelper til.
SKOGSPRAT: Henrik Aakre (t.v.) rosar leiar i skogeigarlaget, Fredrik Landeråen, for arrangementet.
SKOGSPRAT: Henrik Aakre (t.v.) rosar leiar i skogeigarlaget, Fredrik Landeråen, for arrangementet.

Siste saker Gå til framsida

Ny singel frå Symra

– Me skal sleppa ein låt som heiter «Purple Sweater». Det er den nyaste av dei låtane me har spelt inn så langt, seier Øyvind Kleppe i Symra.