REKORD-FRAMMØTE: Nesten 150 personar hadde funne vegen til det historiske årsmøtet i Tysnes Kraftlag måndag kveld.
REKORD-FRAMMØTE: Nesten 150 personar hadde funne vegen til det historiske årsmøtet i Tysnes Kraftlag måndag kveld.

Rekord-frammøte og overveldande fleirtal for BKK-sal

Tysnes Kraftlag blir selt til BKK. 182 røysta for og 11 røysta mot på årsmøtet i Grendatun måndag kveld.
– Tusen takk for tilliten. Dette vart eit utruleg bra resultat, utbraut styreleiar i Tysnes Kraftlag SA, Audun Magnussen, etter at resultat var endeleg klart.
Publisert 12.03.2018 kl. 21.51.

På eit historisk møte i Tysnes Kraftlag si snart 71-årige soge, er det no slutt på Tysnes Kraftlag som kraftlag for Tysnessamfunnet. Det historiske vedtaket med det overveldande fleirtalet inneber at BKK blir netteigar på Tysnes frå 1. juli 2018. Tysnes Kraftlag skal vera straumleverandør og netteigar fram til 30. juni.

– Eg har aldri opplevt så mange frammøtte på eit årsmøte som i kveld, kunngjorde styreleiar Audun Magnussen då møtet kom i gang litt etter klokka 17 måndag ettermiddag.

Knappe 150 personar hadde funne vegen til Grendatun, så mange at det ikkje var plass til alle på seta i kinosalen, og det måtte setjast ut ekstrastolar for at det skulle vera sitjeplass til alle. Ein del av dei frammøtte stilte med fullmakter. Dermed vart det 193 teljande røyster.

Kring tre og ein halv time etter møtestart var stemmesetlane opptalde, og styreleiaren kunne nøgd konstatera solid fleirtal for styret sitt framlegg om sal til BKK.

Styreleiaren hadde før røystinga stilt ultimatum om at han ville trekkja seg som styreleiar dersom det ikkje vart 4/5-dels fleirtal for BKK-salet. Med 182 røyster av 193 vart det langt over 80 prosent av røystene.

Under debatten i Grendatun var det lite skepsis til BKK-salet, kritikken som kom fram gjekk meir på vedtektene for eit nytt Tysnes Kraftlag AS som blir det nye selskapet som skal stå som eigar av aksjeposten i BKK som Tysnes får som motyting for SKL-aksjane, linjenettet og andre aktiva som inngår i salet.

Les meir om årsmøtet og synspunkta i debatten i papiravisa på torsdag.

Ole Skaten

ole@tysnesbladet.no


Siste saker Gå til framsida

Forventar ein kjekk konsert

– Julekonserten er ein årleg tradisjon. Onarheim Musikklag har hatt den så lenge eg har spelt med dei, for å seia det sånn, fortel Magne Storesætre.