PÅ GJERSTADSTØLEN: Gjerstad Nærradio himself, Tore Økland, i sitt rette element på Stølsmarsjen på 333 Gjerstadstølen.
PÅ GJERSTADSTØLEN: Gjerstad Nærradio himself, Tore Økland, i sitt rette element på Stølsmarsjen på 333 Gjerstadstølen.

Underheldt turgåarar med pikante formuleringar på Gjerstadstølen

I strålande fin påskesol stod Tore Økland som Gjerstad Nærradio fram på det sjølvlaga podiet. Dei frammøtte på Gjerstadstølen fekk servert den eine pikante formuleringa etter den andre.
Publisert 01.04.2018 kl. 23.58. Oppdatert 02.04.2018 kl. 13.29.

– Dette var utruleg kjekt, seier Randi Helen og Arild Kvamme som har sessa på fyrste benk i amfiet til Tore på 333 Gjerstadstølen.


Heilt topp med sjø og fjell

Ekteparet har hytte i Gjersvik og ferierer på Tysnes så ofte dei kan, både i helgar og feriar. På Gjerstadstølen har dei aldri vore tidlegare.

– Me har gått mange gonger både til Ramnanuten og til Tysnessåto. Me har og hatt mange fine turar på ski til Såto, fortel dei.

Dei er veldig glade i Tysnes. Her kan dei nyta både fjord og fjell.

– Tidlegare i veka var me på sjøen og fekk to fine torskar. Me ville ikkje bytta ut Tysnes med Geilo, seier dei i kor.

Arild fortel engasjert om den årlege fotballcupen, som han alltid gler seg til. Han spelar fast på Kristoffer United.


– God underhaldning

Det er fyrste gongen dei er på Stølsmarsjen. Tore Økland og Gjerstad Nærradio har dei heller ikkje høyrt før.

– Dette var heilt topp. I dag hadde me ein veldig flott tur på ski frå Solheimsdalen til Gjerstadstølen. Og så fekk me god underhaldning her, smiler dei.

– Gjerstad Nærradio er radiostasjonen som vågar å tala Våge imot, innleia Økland før han heldt fram med det eine verset etter det andre.

Dei frammøtte fekk høyra om lensmannskontoret på Tysnes som no skal styrast frå Norheimsund, om Bergens Tidende som ifølgje radiomann Økland i fleire år hadde vist lite vilje til å vitja Tysnes og om fylkesmannen som truleg hadde teke ferie då Tore Økland søkte om løyve til å byggja stølsbua si på Gjerstadstølen for ti år sidan. For å nemna nokre få av poenga han var innom.


– Innertiar

– Gjerstad Nærradio vågar å tala dei store i samfunnet imot, poengerte Tore.

Otto Andreassen er på påskeferie i Gjersvik, der mor hans kjem frå. På Gjerstadstølen har han teke plass ved sida av Bernhard Gjerstad på ein av dei fremste benkene.

– Det var utruleg bra tekstar han framførte. Han traff innertiar på alt han sa, kommenterer Otto.

Han høyrde om Stølsmarsjen då han var til Tysnessåto dagen før. Då bestemte han seg for å ta turen.

– Eg har slektsrøter på Tysnes og stortrivst her. Me har hatt ei veldig flott påskehelg, legg han smilande til.


– I storform i dag

Torill Drange frå Tysnesbygda er også på stølsmarsjen for fyrste gong.

– Ramma rundt er heilt fantatisk. Det han har fått til her er kjempeflott, kommenterer ho.

– Han er ein kreativ og flink person, legg ho til.

Brørne Jan og Karsten Økland er også nøgde med broder Tore.

– Ja, han var i storform i dag, seier dei samstemte.

– Av og til kan det gå litt fort i svignae, men så lenge han har orden på papira sine, går det bra, legg dei smilande til.

Dei vel 30 frammøtte på den fyrste førestellinga fekk med seg ein sprudlande Tore Økland, med mykje humor og mange gode poeng.


ROS: Ferieturistane frå Gjersvik, Randi Helen og Arild Kvamme, var godt nøgde med ute-underhaldninga på Gjerstadstølen i strålande fint påskever.
ROS: Ferieturistane frå Gjersvik, Randi Helen og Arild Kvamme, var godt nøgde med ute-underhaldninga på Gjerstadstølen i strålande fint påskever.
INNERTIAR: - Utruleg bra tekstar, seier Otto Andreassen (til høgre), på fremste benk saman med Bernhard Gjerstad.
INNERTIAR: - Utruleg bra tekstar, seier Otto Andreassen (til høgre), på fremste benk saman med Bernhard Gjerstad.
KOSTE SEG: Folk koste seg med humoren til Gjerstad Nærradio.
KOSTE SEG: Folk koste seg med humoren til Gjerstad Nærradio.
TO FØRESTELLINGAR: Vel 30 personar fekk med seg Gjerstad Nærradio si fyrste framføring.
TO FØRESTELLINGAR: Vel 30 personar fekk med seg Gjerstad Nærradio si fyrste framføring.

Siste saker Gå til framsida