KJEMPA GODT: Sjølv om Thea Sløgedal var «ute av spel» størstedelen av kampen, vart ho likevel dagens toppscorar.
KJEMPA GODT: Sjølv om Thea Sløgedal var «ute av spel» størstedelen av kampen, vart ho likevel dagens toppscorar.

Slo dei uslåelege

Fram til laurdag føremiddag hadde Askøy vunne alle kampane sine denne sesongen. No har Tysnes øydelagt den perfekte statistikken deira.
Publisert 14.04.2018 kl. 18.55. Oppdatert kl. 18.58.

Etter 60 nervepirrande speleminutt, vann Tysnes 20-19 mot tabelleiaren.

Før det stod gjestene utan eit einaste tap, og dei hadde heller ikkje spelt uavgjort mot nokon. Sist Askøy spela mot Tysnes, vann dei med fire mål, men i dag fekk altså heimelaget sin søte hevn.


Kjip skade

Å møta ein tabelleiar er alltid tøft, men Tysnes IL sitt damelag heldt tritt med Askøy frå fyrste stund. Kampen var jamn, og det vart mange utlikningar.

Midtvegs i 1. omgang leia Tysnes 6-5.

For dei med svake nerver var dette ein heftig kamp, og betre vart det ikkje då toppscorar Thea Sløgedal skada seg stygt, fire minutt før pause.

Men kampen måtte halda fram, og med Thea gråtande på sidelinja var det berre for tysnesjentene å prøva å leggja inn eit ekstra gir.

Det gjorde dei også, og til pause var stillinga 12-12.


Gav alt

Andre omgang starta med mål frå Askøy, men Julie Bakke utlikna raskt for Tysnes. Ho og dei andre yngste spelarane på laget fekk vist seg godt fram i denne kampen, der det var veldig viktig at alle var skjerpa.

Etter kvart som klokka gjekk, vart både publikum og tysnesspelarane stadig meir gira, og det var stor jubel i hallen for kvart mål som blei laga av heimelaget.

Det var nok likevel forsvarsspelet deira som var den store suksessfaktoren for Tysnes i denne kampen. Her var dei så fokuserte og sterke at ein rett og slett kunne bli litt rørt av å sjå på.

Tysnes leia 20-18 då det var få minutt igjen av kampen, og no byrja det å hasta for Askøy. Men sjølv ikkje på den siste straffen deira blei det mål, her redda til og med tysneskeeper Lea Sofie Trondsen Dalland returen.

Askøy reduserte til 20-19 i siste speleminutt, men slaget var tapt for gjestene. Tysnesdamene var i ekstase etter at sigeren var eit faktum.


Kom seg på beina att

Som trenar (i lag med Sveinung Halvorsen) var dette ein ekstra tøff kamp for Terje Sløgedal, som er far til Thea.

– Kjenslemessig har det vore ein berg- og dalbane, kommenterer han til «Tysnes» etter kampslutt.

Men heldigvis gjekk det betre med Thea enn ein fyrst frykta.

– Eg fekk ei vriding i kneet, og kneet har eg slite ein del med frå før av. Men det kjennest heldigvis betre ut no. Eg klarar å gå på foten, seier ei letta Thea.

Ho er utruleg imponert over laget sin innsats.

– Me fortente dette, eg er superstolt! Forsvarsdelen var heilt fantastisk, smiler ho.

– Forsvarsspelet i dag står det respekt av, seier pappa Terje Sløgedal.

Allereie i morgon, søndag, blir det ny damekamp i Tysneshallen. Då møter dei NHH2, som ligg to hakk lenger nede på tabellen. Tysnes ligg framleis på 4. plass, men kan enda på ein 3. plass om dei vinn dei to siste kampane sine.


Desse var med:

Lea Sofie Trondsen Dalland, Kristin van der Meeren (5), Hannah Rød Halvorsen, Signe Pettersen Opdal, Maria Lillesletten Hagen (3), Linn Bergesen (2), Karoline Helland (1), Eline Teigland Bakke, Thea Sløgedal (6), Sara Reimdal Vee, Norunn Ebbesvik (1) og Julie Bakke (2).


LYKKERUS: For jentene på Tysnes K05 var dette ein siger som smaka ekstra godt.
LYKKERUS: For jentene på Tysnes K05 var dette ein siger som smaka ekstra godt.
FULLTREFFAR: Karoline Helland skreiv seg på scoringslista i 1. omgang.
FULLTREFFAR: Karoline Helland skreiv seg på scoringslista i 1. omgang.
SOM EIN MUR: Askøy skulle ikkje få det lett i angrep denne dagen.
SOM EIN MUR: Askøy skulle ikkje få det lett i angrep denne dagen.
GOD STEMNING: Kristin van der Meeren hadde all grunn til å smila i kampen mot Askøy.
GOD STEMNING: Kristin van der Meeren hadde all grunn til å smila i kampen mot Askøy.
KJIPT FOR TYSNES: Det var få minutt før pause at Thea Sløgedal fekk ei vriding i kneet og låg nede med store smerter.
KJIPT FOR TYSNES: Det var få minutt før pause at Thea Sløgedal fekk ei vriding i kneet og låg nede med store smerter.

Siste saker Gå til framsida

Ådnastegen lokkar to- og firbeinte til fjells

Stølen på Ådnastegen har vore brukt i lange tider. Enno ligg der åtte små sel og to noko større hytter. Juniane Vevatne Lunde (32) gjekk dit ofte som liten, og no fører ho og mannen Matthias Tønnessen tradisjonen vidare med borna sine.