NYTT LIV: Per Ingolf Økland ønskjer mange nye lam velkomen til verda i desse dagar.
NYTT LIV: Per Ingolf Økland ønskjer mange nye lam velkomen til verda i desse dagar.

Våren er komen til Tysnes

Med over 100 sauer som skal lemma, blir det nokre travle veker for Per Ingolf og Jorunn Økland framover.
Publisert 15.04.2018 kl. 06.00. Oppdatert kl. 10.57.

Tysdag føremiddag var sju lam komne til gards på Økland i Lunde.

– Det er litt oppskrytt å kalla det vårens vakraste eventyr, men når det går bra er det kjekt, seier bonden, og kikkar ned på dei nyfødde lamma. Dei svartkledde lamma er av typen norsk pelssau, og er heilt kolsvarte når dei kjem til verda. – Me har både gamalnorsk spælsau og norsk pelssau. Begge dei sauesortane har stort sett lette lemmingar, men alle sauer må ha tilsyn, seier Økland.


Lite søvn

I vekene som kjem har sauebønder over heile Tysnes mange søvnlause netter framfor seg.

– Me går ein tur kvar natt, i halvfire-tida, for å sjå om dei, fortel Økland.

Han er klar for travle tider og lite nattesøvn, men saman med kona Jorunn og eldstesonen Eivind, blir dei tre som kan dela på nattevaktene.

– Skjer det noko ekstra, er det ofte på natta. Det kjennest i alle fall slik, seier Økland.


Sosialisering

I fjoset dei bygde i 2010, har han plass til 150 sauer. Med rundt 100, slik dei har no, er det god plass under lemminga.

Dei nyfødde har fått eigne små plastkassar, inne i inngjerdinga saman med mora. Det tek ikkje lang tid før dei små nøsta finn seg godt til rette i kassen med høy.

Etter to til tre dagar set Økland dei i ein samlegarde, med andre sauer og lam.

– Dei treng sosialisering, akkurat som oss menneske, forklarer bonden.

Når det er gått to-tre veker er dei gamle nok til å sleppa ut på beitet.


Viktig med dyrlege

Bonde Per Ingolf Økland synest at det er kjekt med nytt liv på garden. Nøyaktig kor mange lam som kjem i år, veit han ikkje.

– Det er 104 sauer som skal lemma. Me har ikkje hatt fosterteljing, men det ideelle er to friske lam per sau, fortel Økland. I fjor fekk dei 182 lam, og alle overlevde fødselen. Det takkar han kona for, som redda nokre av dei i ein kritisk fase. Jorunn har tilpassa turnusen som ambulansearbeidar etter lemmingsesongen, og har også teke ut ei ferieveke i den mest hektiske perioden.

Per Ingolf er nestleiar i Tysnes Sau og Geit, og nyttar høvet til skryta over dei flinke dyrlegane på Tysnes, som er tilgjengelege om noko skulle skjera seg.

– Før eller seinare blir det alltid behov for å tilkalla dyrlegen, forklarer han. Dette året fekk lemminga ein litt trasig start for Økland, med to sauer som kasta (aborterte).


Tar vare på skinnet

Sjølv om det går mest i lemming for tida, er Økland-familien oppteken av at sauen er eit nyttedyr.

I kjellaren på Økland syr Jorunn forskjellige skinnfeller, med ulike trykk på baksida av saueskinnet. No har dei også fått seg eiga heimeside, der dei viser fram produkta.

Men i desse dagar er merksemda mest retta mot sauefjøset, og lamma som kjem til verda. Snart er dei klare for å sleppa dei svartkledda lamma ut på beitet.

– No ventar me berre på varme og vår, seier den blide bonden Per Ingolf.


PASSAR PÅ: Lammet held seg nær mora den første tida.
PASSAR PÅ: Lammet held seg nær mora den første tida.
KASSE: Det kolsvarte lammet, av typen norsk pelssau, finn seg godt til rett i den oransje plastkassen.
KASSE: Det kolsvarte lammet, av typen norsk pelssau, finn seg godt til rett i den oransje plastkassen.
SITJEUNDERLAG: På garden på Økland blir det laga mange fine produkt av skinnfeller.
SITJEUNDERLAG: På garden på Økland blir det laga mange fine produkt av skinnfeller.

Siste saker Gå til framsida

Ådnastegen lokkar to- og firbeinte til fjells

Stølen på Ådnastegen har vore brukt i lange tider. Enno ligg der åtte små sel og to noko større hytter. Juniane Vevatne Lunde (32) gjekk dit ofte som liten, og no fører ho og mannen Matthias Tønnessen tradisjonen vidare med borna sine.