HUSFLYTTING (1): Flytteprosessen steg for steg. (Alle foto: Alsaker Fjordbruk)
HUSFLYTTING (1): Flytteprosessen steg for steg. (Alle foto: Alsaker Fjordbruk)

Løfta hus på over 50 tonn

Ein kjempestor krane frå Stord Mobilkran måtte tysdag på plass for å ta unna det store løftet med å flytta rognkjeksanlegget sitt administrasjonsbygg på Onarheim.
Publisert 16.05.2018 kl. 14.24.

– Kraninga gjekk fint. Det var strålande ver til å utføra ein slik jobb, seier prosjektingeniør Magnar Solheim hjå Alsaker Fjordbruk.


Over 50 tonn

Løftet var på over 50 tonn. Huset som vart flytta vert nytta til administrasjonsbygg, matrom og garderobar for dei tilsette ved Onarheim Bruk.

– Det einaste me kopla frå var straum og vatn. Inventaret er som før, og er bygget flytta heilt ute på kanten på anleggsområdet. Her skal det etablerast fascilitetar som før. Frå huset blir det flott utsikt utover heile Onarheimsfjorden. Me satsar på gjenbruk i staden for å kjøpa nye brakker, seier Solheim.

Det var ein diger mobilkran frå Stord Mobilkran som hadde løfteoppdraget. For å kunna utføra jobben måtte dei også ha tre store trailarar på plass med utstyr frå Stord. Dei tok opp store delar av ferjedekket på MF Folgefonn tysdag morgon.


Skal byggja ny hall

Bakgrunnen for husflyttinga er bygging av ein ny stor produksjonshall for rognkjeksanlegget.

– Det skal byggjast ein heilt ny hall på kring to tusen kvadratmeter for heile anlegget. Me er i gang med grunnarbeidet, fortel Solheim.

Målet er at den nye hallen skal stå ferdig om halvtanna år.

Ole Skaten


Siste saker Gå til framsida